Read tharaka 1 AKORINTHO 1 Bible Online

1 AKORINTHO 1 - tharaka bible

1 AKORINTHO 1

¹I niû Paûrû nkûbwandîkîra tûrî na mûruayia wetû Sosithenes. Ndeetirwe ntuîka mûtûmwa kûringana na wendi bwa Ngai.

²Tûrîbwandîkîra biû eetîgîri ba kanica ya Ngai ya Korintho, biû bûtuîkithîîtue antû baatheru ndeni ya Kîrîstû Yiesû. Bwîtîîtwe bûtuîka antû ba Ngai amwe na bonthe bara gûntû kunthe beetîgîrîte Yiesû Kîrîstû aatuîka Mwathani wao. N'we Mwathani wao na wetû.

³Ngai Baaba wetû na Mwathani Yiesû Kîrîstû baroobwaa ûtugi na ûkiri.

⁴Incookagîria Ngai nkaatho rîonthe n'ûntû bwenu, n'ûntû bwa ûtugi bûra aabûtugire na bu ndeni ya Kîrîstû Yiesû.

⁵Kwîgua bûrî ndeni ya Kîrîstû îgûtûmîîte bûtongua na njîra inyingî. Bûtongeetue na rwaria na ûmenyo.

⁶Ûgu i ta kwonania ntûmîîri yetû îra tûbûtûmagîîria îgûrû rîa Kîrîstû n'ya mma.

⁷Kwoogu gûtirî kîthaarimo bûkwaga îîndî kuuma kîrî Ngai wabweteereete kûûya kwa Mwathani wetû Yiesû Kîrîstû.

⁸Ngai agaatûma bûkaraga bûrikîîte mwanka ntugû ya mûthia, kaingo bwîgua bûrî na riîtwa rîega rîra Mwathani wetû Yiesû Kîrîstû akaaya kaîrî.

⁹We i mwîtîgua ûra aabwîtire bwîgua bûrî na ngwatanîro na Mwana wake, Yiesû Kîrîstû Mwathani wetû.

¹⁰Aruayia na aarayia, kwa riîtwa rîa Mwathani wetû Yiesû Kîrîstû ndîbwîra bûgwatanagîre bwinthe bûtakwathûkana. Karagaani bûrî gîntû kîmwe, bûrî na meeciiria mamwe na mworooto ûmwe.

¹¹Aruayia na aarayia, imbîîrîîtwe n'antû ba Kiroe atî bûrîkara bûkîthetanagia.

¹²Bûra nkuuga n'atî bamwe beenu baugaga, “Tiû tûrî ba Paûrû,” bangî bakauga, “Tiû tûrî ba Apooras,” bangî na bo bakauga, “Tiû tûrî ba Kebas,” na bangî bakauga, “Tiû tûrî ba Kîrîstû.”

¹³Kîrîstû aûmba kûgaanua? I Paûrû aambirwe mûtharabaani n'ûntû bwenu? Kana ka bwabaatithiirue riîtwaani rîa Paûrû?

¹⁴Ingûcookeria Ngai nkaatho n'ûntû bwa kwîgua gûtirî we wacienu ndabaatithia, tatiga Kîrîspas na Gayas.

¹⁵Kwoogu gûtirî we aûmba kuuga aabaatithiirue riîtwaani rîakwa.

¹⁶Kaîrî indabaatithiirie Stebanas na antû baake, na nkîthûgaania gûtirî ûngî ndabaatithia tatiga babu bonka.

¹⁷Kîrîstû ataantûma mbaatithanagia, îndî i ntûmîîria ntheto îmbega, na ti na mîgambo ya ûûme bwa kîîmuntû mûtharaba wa Kîrîstû ûûya kwaga inya.

¹⁸Bara baûrîîte boonaga ntûmîîri ya gîkuû gîa Kîrîstû mûtharabaani îrî waa. Îndî tiû bara twonokeetue twonaga n'inya ya Ngai.

¹⁹*Maandîkooni Maatheru kwandîkîîtwe, “Nkeenyangia ûûme bwa bara baûme, ngaatuîkithia gûciûka kwa bara bathoomu kwa mana.”

²⁰Ûra îîndî mûûme n'ûû? Ûra îîndî mûthoomu n'ûû? Ûra îîndî aiyî ûgambi nthîgûrû îno n'ûû? Anga Ngai ationanîîtie ûûme bwa kîînthîgûrû i waa?

²¹Ngai aatûmîîre ûûme bwake gwatuîka antû ba nthîgûrû batiûmba kûmûmenya batûmîrîte ûûme bwao. Aabangire akoonokagia bara bageetîgagia baatûmîîrua ûntû bûra bara barî ba nthîgûrû boonaga bûrî waa.

²²Ayaundi beendaga kwona biama kaingo beetîgia. Angiriki na bo bacûaga ûûme.

²³Îndî tiû tûtûmagîîria Kîrîstû ûra aambirwe mûtharabaani, ntûmîîri îra Ayaundi bateendaga kwîgua, îra Angiriki baugaga i waa.

²⁴Kîrî bara Ngai eetîîte, nwîgue n'Ayaundi kana i bara batarî Ayaundi, Kîrîstû n'we inya na ûûme bwa Ngai.

²⁵Bûra antû boonaga bûrî waa bwa Ngai, i bûkûrûkîîte ûûme bwa antû. Na bûra antû boonaga taka bûrema Ngai i bûkûrûkîîte bûra antû baûmba kûrûtha.

²⁶Aruayia na aarayia, ririkanagaani bûra bwakari rîra Ngai aabwîtire. Ti baingî beenu bwarî baûme bûkîonwa n'antû ba nthîgûrû. Na ti baingî bwarî bûkiûmba kûrûtha ûntû bûkwonekana n'antû na ti baaibgî bwarî ba gîtûmi.

²⁷Ngai aathuurire bara antû ba nthîgûrû boonaga ta biaa kaingo bara baûme baconoka. Ngai aathuurire bara bataûmba kûrûtha ûntû kaingo bara baûmba kûrûtha ûntû baconoka.

²⁸Ngai aathuurire bara batarî gîtûmi na bamenagîîrua gûkû nthîgûrû, bara boonagwa barî ba mana, kaingo atuîkithia bara antû ba nthîgûrû boonaga barî ba gîtûmi ba mana.

²⁹Kwoogu gûtirî we eekumîria Ngai.

³⁰I Ngai aatûmire bwîgua bûrî ndeni ya Kîrîstû. N'we aatuîkithiirie Kîrîstû ûûme bwetû, ta bu wagîru, ûtheru bwa nkoro na ûkûûri kuuma meeyiani.

³¹Kwoogu, wata bûra kwandîkîîtwe *Maandîkooni Maatheru, “Ûra eekumagia neekumie na ûntû bûra Mwathani arûthîîte.”