Read tharaka 1 AKORINTHO 10 Bible Online

1 AKORINTHO 10 - tharaka bible

1 AKORINTHO 10

¹Aruayia na aarayia, inkwenda bûririkana bûra gwakarîkire kîrî biûyûûyû beetû bara baatongoreereetue i Musa rwanda. Bonthe baatongoreerue n'îtu baaringa îria na magûrû bathiîrîîte nthîgûrû îmbûmo.

²Bonthe baabaatithîîrue îtuuni na îriani baatuîka athingati ba Musa.

³Na bonthe ibaarîîre irio bimwe bia gîîkîrundu beetwe i Ngai birî kîama.

⁴Na kûnyua ibaanyuire gîakûnyua kîmwe gîa gîîkîrundu n'ûntû baanyuire kuuma kîrî iiga rîa gîîkîrundu rîra rîathiyanagia na bo. Na rîo iiga rîru i rîo Kîrîstû.

⁵Îndî amwe na ûgu, Ngai ataakenua i baingî baao. Na i kîo gîatûmire bakua, biimba biao bianyagaara rwanda rûrû.

⁶Mantû mama maakarîkire matuîka ngerekano kîrî tiû, kaingo tûtiga kwendaga kûrûthaga mantû maathûûku ta bûra Aisiraeri baarûthire.

⁷Na kaîrî, i kaingo tûtaromba ngai cia ûrongo, ta bûra bamwe baao baarûthire. Na wata bûra kwandîkîîtwe *Maandîkooni Maatheru, “Antû baarûthire kîatho, baakara nthî baarîa, baanyua, rîru baarûngama baina ndanci.”

⁸Tûtikeeyieni wîyia bwa ûmaramari, ta bûra bamwe ba Aisiraeri baarûthire, baakua antû ngiri mîrongo îîrî na bathatû ntugû îmwe.

⁹Tûtikaagerieni Mwathani, ta bûra bamwe baao baarûthire, baarûmangwa i njoka baakua.

¹⁰Na tûtikaanunguneeni ta bûra bamwe baao baarûthire, baûragwa i mûraîka ûra aathiranagia.

¹¹Mantû mamu maakarîkire kîrî bo, maakarîkire matuîka ngerekano kîrî tiû, matûrutana, tiû tûrî ku ntugûûni ino cia kwingia mûbango wake.

¹²Kwoogu, ûra akûthûgaania narikîîte wîtîgioni abatîîrue eemenyeera atikaaye kûthûngîra wîyiani.

¹³Na ririkanagaani atî, magerio mara mabûûyagîîra matirî mûkûûrani na ma antû bara bangî. Na Ngai i mwîtîgia. Atiireka bûgerua nkûrûki ya bûra bûûmba kûûmîîria. Akabwonagia bûra bûkaarûthaga bûtacindîîrwe i magerio.

¹⁴Kwoogu, eendwa baakwa, bûtikaarombageeni ngai cia ûrongo.

¹⁵Ndîaria naabi ta antû baûgî nkwaria na bo. Wana biû ibûkûmenya n'ûmma nkwaria.

¹⁶Rîra tûnyunyanagîra gîkombeeni kîra tûûragia Ngai athaarime, anga ti ngwatanîro ya nthakame ya Kîrîstû wîgagua tûrî n'yo? Na rîra tûrîyaga mûgaate ûra tûng'enyûranaga, anga ti ngwatanîro ya mwîrî wa Kîrîstû wîgagua tûrî n'yo?

¹⁷Kûrî mûgaate ûmwe, kwonania twinthe wana kinya ûkeegua tûrî baingî, tûrî mwîrî ûmwe n'ûntû twinthe tûrîyaga mûgaate ûyu ûrî ûmwe ûgu.

¹⁸Tathûgaanîriani Aisiraeri. Bara barîyaga igongwana anga ti ngwatanîro îra barî n'yo na kîra kîrî kîthînjîrooni boonanagia?

¹⁹Tika nkuuga ngai ya ûrongo i gîntû kûrî, kana irio bira irutîrîtwe i gîntû.

²⁰Bûra nkuuga n'atî, bira birutagwa birutagîrwa irundu bithûûku, îndî ti Ngai arutagîrwa bio. Na ntikwenda bûgwatana na irundu bithûûku.

²¹Bûtinyua kuuma gîkombeeni kîa Mwathani na kîa irundu bithûûku. Na bûtirîîra meethaani ya Mwathani na ya irundu bithûûku.

²²Ga tûkwenda Mwathani agwatwa i rûriitho? Ga tûkwona taka tûmûkîria inya?

²³Bamwe beenu baugaga, “Tiû gûtirî ûntû twonaga bûrî bûthûûku.” Nwa buuge ûgu, îndî narîo mantû mara tûûmba kûrûtha ti meega monthe. Nwa buuge, “Tiû gûtirî ûntû twonaga bûrî bûthûûku,” îndî ti mantû monthe mateethia bara bangî.

²⁴Ûtikeende ûganîrwa wenka. Enda muntû ûra ûngî wana we aganîrwe.

²⁵Muntû nwa arîe nyama ira ciendagua thokooni. Ûtikaûrie biûria ûgîcûa kûmenya kana i nyama ira ûthûgaanagia i mabîtia gûcirîa.

²⁶Nwa ûcirîe n'ûntû *Maandîkooni Maatheru kwandîkîîtwe, “Nthîgûrû n'ya Mwathani, na bionthe bira birî ku.”

²⁷Muntû atarî mwîtîgîri agakûthookia gwake bûrîyanîra, ûkaaya kûthi, îrîa kîonthe kîra gîkaareetwa. Ûtikaûrie biûria ûgîcûa kûmenya kana i gîntû kîra ûthûgaanagia i mabîtia gûkîrîa.

²⁸Îndî muntû agakwîra, “Nyama îno nîrarutîrîtwe ngai cia ûrongo,” ûtikaamîrîe n'ûntû muntû ûyu agûkwîra ûgu, waûmba kwîgua akîthûgaanagia i mabîtia kûmîrîa.

²⁹Ntikuuga i thîîna kîrî woû kûmîrîa, îndî i kîrî muntû ûra ûngî. Na i kî n'ûntû mantû mara mbûmba kûrûtha matabatîîrue makûrûkana na bûra mwîtîgîri ûra ûngî athûgaanagia?

³⁰Ûkaaya kwîgua incookagîria Ngai nkaatho ampa irio bina rî, i kî n'ûntû muntû akauga inkûbîtia ndabirîa na n'irio ncookeretie Ngai nkaatho n'ûntû bwa gûmpa bio?

³¹Kwoogu gîntû kîonthe kîra bûkaarîa kana bûkaanyua, kîrîyageeni na kînyunyageeni bûgîkumagia Ngai.

³²Bûtikaarûtheeni ûntû bûûmba kûreetera Ayaundi, bara batarî Ayaundi, kana kanica ya Ngai, thîîna.

³³Rûthagaani bûra ndûthaga. Ncûûgagia gûkenia muntû wonthe na mantû monthe mara ndûthaga. Nticûaga nganîrwa ninka. Ncûaga kwona nkûrûtha bûra bûgaateethia antû bonthe, kaingo boonokua.