Read tharaka 1 AKORINTHO 11 Bible Online

1 AKORINTHO 11 - tharaka bible

1 AKORINTHO 11

¹Thingatagaani ngerekano yakwa ta bûra naani nthingataga ngerekano ya Kîrîstû.

²Inkwîgua nkeneete mûno i biû n'ûntû bwa kûndirikanaga mantûûni monthe, na n'ûntû bwa kûthingata ûrutani bûra ndabûrutanire.

³Ndeenda bûmenya kîongo kîa muntû wonthe i Kîrîstû, na kîongo kîa mûka i muntû mûrûme. Kîongo gîa Kîrîstû i Ngai.

⁴Muntû mûrûme ûra arombaga kana aroragia akunîkîrîte kîongo gîake, atiîgagua agîtîîya mûnene wake.

⁵Na mûka ûra arombaga kana aroragia atakunîkîrîte kîongo gîake, atiîgagua agîtîîya mûnene wake. Mûka ta ûyu i bûmwe na ûra agiitaga ntundu ciake ikanyiia.

⁶Weegua mûka atiikunîkagîra kîongo gîake abatîîrue agiitaga ntundu ikanyiia. Îndî na bu n'ûntû bûrî nthoni mûka kûnyiia ntundu kana gûcienja kûrû. Mûka abatîîrue akunîkagîra kîongo gîake.

⁷Îndî muntû mûrûme atibatîîrue akunîkagîra kîongo gîake, n'ûntû we i mûbuanaano na mwago wa Ngai, akari ûgu. Mûka i mwago wa muntû mûrûme.

⁸Muntû mûrûme ataûmbwa kuuma kîrî mûka. I mûka aûmbirwe kuuma kîrî muntû mûrûme.

⁹Muntû mûrûme ataûmbwa n'ûntû bwa mûka. I mûka aûmbirwe n'ûntû bwa muntû mûrûme.

¹⁰Kwoogu mûka nabatîîrue akunîkagîra kîongo gîake n'ûntû bwa araîka, kwonanagia arî wathooni bwa mûrûme wake.

¹¹Îndî amwe na ûgu, mûka arî gîtûmi kîrî muntû mûrûme. Na muntû mûrûme arî gîtûmi kîrî mûka kûringana na mûbango wa Mwathani.

¹²I mma n'ûntû mûka aûmbirwe kuuma kîrî muntû mûrûme na muntû mûrûme n'we aciaragwa i mûka. Îndî Ngai we n'we aabaûmbire bonthe.

¹³Wana biû bwingwa tathûgaaniani bwone kana mûka nabatîîrue aromba Ngai atakunîkîrîte kîongo gîake.

¹⁴Wîthîre ibwonanagia n'ûntû bûrî nthoni muntû mûrûme kwîgua arî na ntundu indaaya.

¹⁵Îndî mûka arî na ntundu indaaya i mwago wake n'ûntû eetwe cio imûkunîkagîra.

¹⁶Weegua kûrî we akwenda gûkararia abatîîrue amenya tûtirî mûtugo ûngî, na wana makanica ma Ngai kinya mo matirî mûtugo ûngî.

¹⁷Bûra nthiîte kûbwîra îîndî bûtigûnkenia na bu n'ûntû rîra bûrîîkanaga amwe, ûthûûku i bu bûrûthaga kwa wingî nkûrûki ya wega.

¹⁸Bwa mbere, ndîîgua rîra bûrîîkanîîte kanicaani bûtîigagua bûkîgwatanîra. Na ingwîtîgia mantû mamwe ma mara mbîgagua i ma mma.

¹⁹Kwîgua bûgîkararanagia i kwega n'ûntû gûkoonania i barîkû barî ûmmaani.

²⁰Rîra bûrîîkanaga amwe, bûtirîîkanaga n'ûntû bwa kûrîa kîatho kîa Mwathani.

²¹Gîtûmi gîa kuuga ûgu, i kwîgua rîra bûrîyaga kîatho kîa Mwathani, woora muntû arîyaga atagûtindanîra na gweteera bara bangî mwanka bamwe beenu bakaaga, îîndî îra bamwe beenu wana gûtogoona batogoonire!

²²Twabûrîe na bûkanyua mîciî yenu? Gûku ti kwagîra kanica ya Ngai gîtûmi na gwîkîra nthoni bara batarî na biakûrîa? Kwoogu n'ata bûkwenda mbwîra? Mbwîre inkeneete? Arî! Ntibwîra ûgu n'ûntû bwa kûrûtha ûntû ta bûbu.

²³Ûrutani bûra ndabûrutanire i bu niû ndeerwe i Mwathani. Atî ûtugû bûra Mwathani Yiesû aakunyanîîrwe, aathûkiirie mûgaate,

²⁴na akûthiria gûcookeria Ngai nkaatho n'ûntû bwa uu, aung'enyûrania auga, “Thûkiani bûrîe, ûyû i mwîrî wakwa ûra ûnenkanîrîtwe n'ûntû bwenu. Rûthagaani ûûgû n'ûntû bwa kûndirikanaga.”

²⁵Bakûrîîkia kûrîa, Yiesû aathûkia gîkombe na kîo auga, “Gîkombe gîkî kîa ndibei i kîrîîkanîro kîîyerû kîra gîgaakûûyagîîrwa i nthakame yakwa îra îgeetûûrwa. Rîra bûkaamînyunyaga mînyunyageeni n'ûntû bwa kûndirikanaga.”

²⁶Rîonthe rîra bûkaarîyaga mûgaate ûyû na bûkanyua ndibei kuuma gîkombeeni gîkî wîgagua bûkîonania gîkuû kîa Mwathani mwanka rîra agaacooka kaîrî.

²⁷Kwoogu ûra arîyaga mûgaate kana akanyua ndibei na njîra îtaagîrîte yumîîte gîkombeeni kîa Mwathani, muntû ûyu neegagua akîîyîria mwîrî na nthakame ya Mwathani.

²⁸Woora muntû abatîîrue eecûnkûûna bwega mbere ya arîa mûgaate kana anyua ndibei ya gîkombe kîa Mwathani.

²⁹Ûra arîyaga mûgaate kana akanyua ndibei na njîra îtaagîrîte, neereetagîra îgamba wengwa n'ûntû atiîgagua akîona mwîrî wa Mwathani ûrî gîtûmi.

³⁰Gîku i kîo n'ûntû baingî beenu bûrî bionje kana bûrî baayie na i kîo gîtûmîîte bamwe beenu bakua.

³¹Îndî tûgeecûnkûûnaga bwega Ngai atitûgambithia.

³²Rîra Mwathani atweyaga îkaanûkia, ka wîgagua akîenda tûrûthaga bûra kwagîrîte kaingo tûtagiitîrwa îgamba bûûthûûku antû ba nthîgûrû bakîgiitîrwa.

³³Kwoogu, aruayia na aarayia, etanagîîraani bûkarîyanîria amwe rîra bûrîîkeene kûrîa kîatho kîa Mwathani.

³⁴Ûra arî na yûûra mûno abatîîrue arîyaga gwake kaingo rîra bwarîîkana bûteereeteera îgamba rîa Ngai bwingwa. Nkabwîra bûra bûkaarûtha mantû mara mangî rîra nkaaya.