Read tharaka 1 AKORINTHO 12 Bible Online

1 AKORINTHO 12 - tharaka bible

1 AKORINTHO 12

¹Îîndî, aruayia na aarayia, ndîenda bûmenya mantû ma biewa bira Kîrundu Ûmûtheru eeyanaga.

²Ibwiyî bûra bwakari mbere ya bûtuîka eetîgîri. Bwabîtithîîtue njîra bwatua kûrombaga ngai cia ûrongo, gîntû gîtaûmba kwaria.

³Kwoogu ndîenda bûmenya atî, gûtirî muntû akwaria arî na Kîrundu wa Ngai aûmba kuuga, “Araûra Yiesû,” na gûtirî we aûmba kuuga, “Yiesû i Mwathani,” tatiga arî na Kîrundu Ûmûtheru.

⁴Kûrî mîthemba mwanya mwanya ya biewa bia gîîkîrundu. Îndî bionthe biumîîte kîrî Kîrundu ûmwe.

⁵Kûrî njîra mwanya mwanya cia kûrutîra Mwathani ngûgî. Îndî i Mwathani ûmwe wîgagua akîrutîrwa ngûgî.

⁶Na kûrî njîra mwanya mwanya ira Ngai arutaga ngûgî na cio gûkûrûkîîra kîrî antû. Îndî i Ngai ûmwe arutaga ngûgî naati na njîra cionthe.

⁷Muntû eeyagwa kîewa gîa gîîkîrundu gîteethia kanica yonthe.

⁸Ûmwe aûmba kwewa kîewa gîa kwaragia na ûûme i Kîrundu, ûngî n'we akeewa kîewa gîa kwaragia na ûmenyo i Kîrundu wooyu.

⁹Muntû ûngî aûmba kwewa kîewa kîa wîtîgio bûûnene, ûngî n'we akeewa kîewa gîa kworania i Kîrundu wooyu.

¹⁰Muntû ûngî aûmba kwewa kîewa kîa inya ya kûringa biama, na ûngî n'we akeewa kîewa kîa ûroria. Na muntû ûngî aûmba kwewa kîewa gîa kûmenya irundu bia mma na irundu bia ûrongo, na ûngî n'we akeewa kîewa gîa kwaria na ndwaria ingeni. Na muntû ûngî n'we aûmba kwewa kîewa gîa gûtaûra ndwaria inu.

¹¹I Kîrundu wooyu ûmwe arutaga ngûgî înu yonthe, na n'we abangaga i kîewa kîbi akaa woora muntû.

¹²Mwîrî i gîntû kîmwe îndî ûrî tûcuncî twingî. Wana kinya ûkeegua mwîrî ûrî tûcuncî twingî, tûcuncî tûtu tunthe tûrûthîîte mwîrî ûmwe. Kîrîstû i ta bu akari ûgu.

¹³Bamwe beetû n'Ayaundi, bamwe t'Ayaundi, bamwe i nkombo cia bara bangî, na bara bangî ti nkombo. Îndî amwe na ûgu, twinthe tûbaatithîîtue mwîrîîni ûmwe i Kîrundu ûmwe, na twewa Kîrundu ûyu ûmwe tûnyunyaga.

¹⁴Mwîrî ûrî tûcuncî twingî, ti kamwe gonka.

¹⁵Rwayo rûkauga, “Niû ntirî gîcuncî kîa mwîrî n'ûntû ti niû njara,” gûtiûmbîka wîgua ru ti gîcuncî kîa mwîrî.

¹⁶Kana gûtû gûkauga, “Niû ntirî gîcuncî kîa mwîrî n'ûntû ti niû riitho,” gûtiûmbîka wîgua ku ti gîcuncî kîa mwîrî.

¹⁷Ûkeegua mwîrî unthe i riitho akî rî, waûmba kwîgua? Kana ûkeegua mwîrî unthe i gûtû akî rî, waûmba kûgwata mûruke mûna?

¹⁸Ngai eekîrîte wakîra gîcuncî kîna mwîrîîni, kûringana na ara eendire wakîra gîcuncî wîgua kîrî.

¹⁹Wakîra gîcuncî gîkeenda gûtuîka gîcuncî kîna kîa mwîrî, ûtiîtwa mwîrî kaîrî.

²⁰Kwoogu kûrî icuncî biingî, îndî mwîrî n'ûmwe.

²¹Riitho rîtiûmba kwîra njara, “Niû ntirî bata naawe.” Na kîongo na kîo gîtiûmba kwîra rwayo, “Niû ntirî bata naawe.”

²²Arî! Icuncî bira bionekanaga taka bitarî gîtûmi twabiganaania na bira bingî, birî gîtûmi mûno.

²³Icuncî bira bikari taka bitarî gîtîîyo i bio tûtîîyaga nkûrûki. Icuncî bira bitarî bia nthoni nwa bikare bitarî biithe, îndî icuncî bia nthoni nwa mwanka tûbiithe. Kwoogu i Ngai aagwatithaniirie mwîrî amwe, aatuîkithia wakîra gîcuncî kîa ûmenyeeri bûna.

²⁵N'ûntû bwa ûgu, gûtibatîîrue kwîgua kûrî na kwathûkana mwîrîîni. Wakîra gîcuncî kîbatîîrue gîkamata thîîna cia gîcuncî kîra kîngî.

²⁶Gîcuncî kîmwe gîkaaya kûgîa thîîna, icuncî bira bingî wana na bio ibigwatwa i thîîna. Na gîcuncî kîmwe gîgakumua, icuncî bira bingî wana na bio ibikeneera.

²⁷Bwinthe bûrî mwîrî wa Kîrîstû. Woora ûmwe i gîcuncî kîa uu.

²⁸Kanicaani, ta yo mwîrî wa Kîrîstû, Ngai eeyanîîte icuncî bibi: mbere atûmwa, rîru iroria, aarimû, bara baringaga biama, bara beetwe kîewa gîa kworanagia, bara bateethagia bara bangî, bara baûmbaga gûtongoreeria bara bangî na bara baûmba kwaria na ndwaria ingeni.

²⁹Ka antû bonthe barî atûmwa? Kana ka bonthe barî iroria? Ka bonthe barî aarimû? Kana ka bonthe baûmba kûringa biama?

³⁰Ka antû bonthe beetwe kîewa gîa kworania? Ka bonthe baûmba kwaria ndwaria ingeni? Kana ka bonthe baûmba gûtaûra ndwaria inu?

³¹Bûbatîîrue bûrîmia kwewa biewa bira birî bia gîtûmi mûno. Ka mbwîreeni îîndî gîntû kîngî gîkûrûkîîte bira bingî bionthe.