Read tharaka 1 AKORINTHO 16 Bible Online

1 AKORINTHO 16 - tharaka bible

1 AKORINTHO 16

¹Îîndî ka ngwete mantû ma kweyaga antû ba Ngai mwothi. Bûbatîîrue bûrûthaga ta bûra ndeerire makanica ma Garatia marûthage.

²Wakîra ntugû ya mbere ya kwanjîîria kiumia, wakîra ûmwe wacienu nabatîîrue aiga mbia igana ûna bantû kûringana na bûra athaarimîîtwe bûgana. Ciaigeeni irî cia mwothi ûyu ndabûgwetera kaingo rîra nkaaya ciîgua i rîo na tene.

³Ndaaya ngaatûma bara bûkoona baagîrîte baire mwothi wenu Njerusaremu. Nkabaandîkîra baarûa cia kûbamenyithania kîrî bo.

⁴Na twona bûrî bwega na niû nthi, nwa tûthiyanie na bo.

⁵Mbangîîte mbûyîîre Macendonia. Kwoogu nkaaya kwenu mbumîîte noogo.

⁶Kwaûmbîka ngaakarakaranga kwenu wana kinya kagiita ga mpîo konthe. Na rîra ngaakara kûthi wanaara ûkeegua nthiîte, nwa bûmbumagarie.

⁷Ntikwenda mbûya kûbwona nkûrûkanîîtie. Ndîenda nkara kwenu kagiita kaaganu, weegua Mwathani ageetîgîîria.

⁸Îndî ngaakara naaga Ebeeso mwanka kagiita ga kîatho gîa ntugû ya *Pentekosti gîkinye.

⁹Inkwona mwanya wa kûruta ngûgî inyingî naaga, wana kinya ûkeegua i baingî bakûrûa naani.

¹⁰Timotheo akaaya kûûya naagu bwone bûkûmûgwata ûgeni bwega aaganîrwa kwîgua arî amwe naabi, n'ûntû i Mwathani akûrutîra ngûgî ta bûra na niû nkûmûrutîra.

¹¹Bûtikaareke muntû amûmeneeria. Aakara gûcooka bûmuumagarieni na ûkiri acooke kaîrî kîrî niû. Ndîîrîgîîra aayania na aruayia babu barî naagu.

¹²Îgûrû rîa mûruayia Apooras, ndamûkinyîîrie ndamwîra aayanie na aruayia bara baayîîte, îndî atireenda kûûya îîndî. Akaaya rîra akeegua arî na kaanya.

¹³Îkaragaani bwîmenyeereete. Karagaani bwîrikîîtie wîtîgioni bwenu, bûrî na kûûmîîria na bûrî na inya.

¹⁴Bunthe bûra bûkaarûthaga, bûbatîîrue bûburûthaga bûrî na wendo.

¹⁵Ibwiyî Stebanas na antû ba mûciî wake i bo antû ba mbere nthîgûrû ya Ngiriki gûtuîka eetîgîri, na ibeerutîîte kûrutîra antû ba Ngai ngûgî. Ndîenda kûbwîra, aruayia na aarayia,

¹⁶bwîtîgagîîrie bûgaatongoragîîrua n'antû ta baba na muntû wonthe ûra arutanagîria na bo ngûgî îno îrî inya ûûgû.

¹⁷Inkeneete mûno n'ûntû Stebanas, Botunatas, na Akaikas ibarakinyire. I bo baingîîte kaanya keenu.

¹⁸Ibaambîkîrîte wîru bûûnene mûno ta bûra na biû baabwîkîîre. Bathûkagieni barî antû ba gîtûmi.

¹⁹Bûgûkeethua i makanica ma gîteere gîa Îcia. Akuira barî na Pirisiira, na eetîgîri bara barîîkanaga kwao bakûbûkeethia mûno riîtwaani rîa Mwathani.

²⁰Aruayia na aarayia bara barî naaga bonthe wana bo bakûbûkeethia. Keethanagiani na wendo bwa eetîgîri.

²¹I niû Paûrû ndî ningwa mbwandîkîrîte nkeethi ino na njara ciakwa ningwa.

²²Ûkaaya kwîgua kûrî na muntû ateendeete Mwathani, ûyu n'ûmûrume i Ngai. Mwathani arooya na mpwî.

²³Ûtugi bwa Mwathani Yiesû Kîrîstû bûrookaraga naabi.

²⁴Wendo bwakwa bûrookaraga naabi bwinthe ndeni ya Kîrîstû Yiesû.