Read tharaka 1 AKORINTHO 2 Bible Online

1 AKORINTHO 2 - tharaka bible

1 AKORINTHO 2

¹Rîra ndaayire kwenu, aruayia na aarayia, ntaatûmîra mîgambo îmînene kana kîthoomo kîa îgûrû tûbwîra ûkûûyî bwa Ngai.[1]

²Ndoonire rîra ndî amwe naabi mbwîre mantû ma Yiesû ûra aambirwe mûtharabaani monka, gûtarî ûntû bûngî.

³Kwoogu rîra ndaayire kwenu ntaarî na inya na indainainaga n'ûguaya.

⁴Ntaabûtûmîîria ntheto îmbega na mîgambo ya ûûme bwa kîîmuntû, mbûkuuyia n'yo. Ntûmîîri yakwa nîonanagia nîarî na inya ya Kîrundu wa Ngai.

⁵N'ûntû bwa ûgu wîtîgio bwenu ti bwa ûûme bwa kîîmuntû, i bwa kuumania na inya ya Ngai.

⁶Tûtûmagîra ûûme kwaria na bara barî baagima wîtîgioni. Îndî ûûme bûbû ti bwa kîînthîgûrû kana bwa kuuma kîrî anene ba nthîgûrû îno bara batagîkarakaranga.

⁷Ûûme bûra twaragia bûkoneetie kîriga kîra Ngai atwoneetie. Mbere ya nthîgûrû yûmbwa Ngai naabangîîte na ûûme wabûbu gûtûreeta mwagooni, îndî abwitha mwanka îîndî.

⁸Gûtirî we wa anene ba nthîgûrû îno aaciûkîrwa amenya ûûme bûbû. Ûkaaya kwîgua baaciûkîîrwe batikîamba Mwathani ûra arî mwago mûtharabaani.

⁹Îndî na rîo wata bûra kwandîkirwe *Maandîkooni Maatheru, “Gûtirî muntû oona, gûtirî muntû eegua, na gûtirî muntû aaromenya kîra Ngai aathuuranîrîte bara bamwendeete.”

¹⁰Îndî tiû natûgwûrîrîte na Kîrundu wake mantû mamu. Kîrundu nwa amenye mantû monthe wana kinya mantû ma ndeni mûno ma Ngai.

¹¹Wata bûra kîrundu kîa woora muntû kîmwiyî bûra bunthe akari, i ta bu Kîrundu wa Ngai aiyî mantû monthe ma Ngai.

¹²Tiû Kîrundu ûra twetwe ti kîrundu gîa kîînthîgûrû, i Kîrundu kuuma kîrî Ngai kaingo tûûmba kûmenya bûra Ngai atûtugîîte bûgana.

¹³Na tûtiaragia mantû mara twaragia na mîgambo îra twarutanirwe na ûûme bwa kîîmuntû. Tûtûmagîra mîgambo îra twarutanirwe na ûûme i Kîrundu wa Ngai. Tûtaûraga mantû ma gîîkîrundu ma ntheto îmbega na mîgambo ya gîîkîrundu.[2]

¹⁴Muntû wa kîînthîgûrû atiûmba kûgwata mantû ma Kîrundu wa Ngai. Kîrî we oonaga marî waa. Aticiûkîrwa amenya bûra makuuga n'ûntû mathûkagua i ma mma i Kîrundu.

¹⁵Muntû wa gîîkîrundu nwa amenye ûmma bwa ûntû bunthe, îndî we gûtirî muntû aûmba kûmûgiitîra îgamba.

¹⁶Maandîko Maatheru maugîîte, “N'ûû aaromenya mathûgaania ma Mwathani? N'ûû aûmba kûmûrutana ûntû?” Îndî tiû itwiyî bûra mathûgaania ma Kîrîstû makari.