Read tharaka 1 AKORINTHO 4 Bible Online

1 AKORINTHO 4 - tharaka bible

1 AKORINTHO 4

¹Kwoogu antû babatîîrue batwonaga tûrî aruti ngûgî ba Kîrîstû bara twetwe ngûgî ya kûrutana iriga bia Ngai.

²Kîra kîendekanaga kîrî aruti ngûgî i gûtuîka eetîgua kîrî mûnene wao.

³Aakwa niû, ntikûmaka nwîgue i bûkangambithia kana inkairwa kootiini cienu. Wana ndî niû ningwa ntiîgiitîra îgamba.

⁴Ntikwîgua nkoro yakwa îkîngambithia, îndî bûbu bûtiûmba kûmbagîrithia. Ûra aiyî bûra îgamba rîakwa rîkari i Ngai.

⁵Kwoogu menya kûgîta muntû agiitîra ûra ûngî îgamba mbere ya Mwathani acooka. Mwathani akaathararia werû bûmûrîke mara monthe marûthagîrwa mwinduuni, oonanie mantû ma nkoro cia antû. Rîru Ngai ape muntû kîra kîmwagîrîte.

⁶Aruayia na aarayia, ntûmîrîte ngerekano yakwa na Apooras kaingo kuumania naati bûmenya kuuga, “Menya bûra bwandîkîîtwe bunka,” i ta kuuga ata. Bûkarûtha ûgu bûtikumia muntû ûmwe nkûrûki ya ûra ûngî.

⁷Mûkûûraani waku na bara bangî i mbi? I mbi ûrî îtarî ya kwewa? Na weegua nwetwe rî, aabu gîtûmi gîaku gîa gwîkumia taka ûtarî mwe i kîbi?

⁸We! Mwanka agu gûtirî kîo gîa gîîkîrundu bûtarî! Bûrî itonga! Naka bûrî anene îndî tûtirî bo tiû! Îndî wabu ûkeegua bûrî anene wana tiû twîgua tûrî anene amwe naabi.

⁹Ndîona tiû tûrî atûmwa taka Ngai atûmîîte tûrega kwewa gîtîîyo nwa aniini. Tûkari ta antû batûîre kûûragwa. Twonagwa ta mûceetho gûntû kunthe, kîrî antû na kîrî araîka.

¹⁰Tiû tûrî biaa n'ûntû bwa Kîrîstû, îndî biû bûrî baûme ndeni yake. Tiû gûtirî bu tûkûûmba, îndî biû gûtirî bu bûtaûmba. Biû ibûtîîyagwa, îndî tiû tûtitîîyagwa.

¹¹Wana ndarîkaani îno tûrî tûtirî na biakûrîa, rûûyî, kana nguo cia gwîkîra. Magiita maingî itûturagwa na tûtirî mîciî.

¹²Tûrutaga ngûgî na inya na njara cietû twingwa. Antû batwîra mantû mataagîrîte, tiû tûûragia Ngai abathaarime. Batûreetera thîîna, itûûmagîîria.

¹³Rîra twarumwa tûcookagia na mîgambo ya ûbooreru. Mwanka agu tûkinyîîtie îîndî tûkari ta rûko rwa nthîgûrû, rûra antû bateeyaga.

¹⁴Ntikûbwandîkîra mantû mama mbwîkîrithia nthoni. Ndîbwandîkîra mbûkaania kûrî oogo ta aana baakwa bara mbendeete mûno.

¹⁵N'ûntû wana ûkeegua i bûrî na aarimû ngiri îkûmi ndeni ya Kîrîstû, bûtirî na baabaagu ba gîîkîrundu baingî. Ndatuîkire abaagu ndeni ya Kîrîstû Yiesû rîra ndabûtûmîîrie ntheto yake îmbega.

¹⁶Kwoogu ndîbwîra ngîkinyagîîria atî, bûthingate ngerekano yakwa.

¹⁷Gîku i kîo gîgûtûma ntûma kîrî biû mwana wakwa ûra mbendeete mûno na mwîtîgua ndeni ya Mwathani, ta we Timotheo. Akabûririkania bûra mûkarîre wakwa ûkari ndeni ya Kîrîstû, ta bûra ncurutanaga makanicaani monthe gûntû kunthe.

¹⁸Bamwe beenu ibaûyûrîîtwe i wîkumia n'ûntû bûrîthûgaania ntiiya naagu.

¹⁹Îndî nkaaya naagu nyuma ya kagiita gatarî karaaya, weegua i kwenda kwa Mwathani. Rîru i rîo nkaamenya inya îra eekumia babu barî n'yo, tatiga mîgambo îra baaragia.

²⁰Ûnene bwa Ngai ti bwa kûgwetagwa akî. Bûrî inya.

²¹I bûrîkû bwenda kûthuura? Bwenda ndaaya naagu mbûye na kîbooko gîa kûbwaa îkaanûkia na kîo, kana bwenda ndaaya mbwonie wendo na ûbooreru?