Read tharaka 1 AKORINTHO 6 Bible Online

1 AKORINTHO 6 - tharaka bible

1 AKORINTHO 6

¹Rîra ûmwe wacienu arî na ntheto na mwîtîgîri ûra ûngî bwiranaga kîrî agambithania batarî eetîgîri i kî, bantû a bwirîra ntheto inu antû ba Ngai baithikîîria bagiita îgamba?

²Ka bûtaiyî ntugû îmwe antû ba Ngai bakaagiitîra antû ba nthîgûrû îgamba? Na ûkaaya kwîgua antû ba nthîgûrû yonthe bakaagiitîrwa îgamba i biû rî, n'ata bûtaûmba kûgiita tûgamba tûûkai?

³Ibwiyî îgiita rîgaakinya tûgiitîre araîka îgamba. Kwoogu na mma nwa tûgiite magamba ma mantû ma ûtûûro bûbû.

⁴I kî n'ûntû rîra bûrî na magamba makoneetie ûtûûro bûbû bwiragîra mo bara batarî watho bwa gîîkanica?

⁵Rîru n'îgi kîrî biû! Kagûtarî we kanicaani arî na ûûme bwa kûgana ûntû aûmba kûgiita îgamba rîa mwîtîgîri na ûra ûngî?

⁶Kûrîtuîkîka mwîtîgîri arîthitanga ûra ûngî kootiini kîrî antû batarî eetîgîri!

⁷Rîra bamwe beenu bûkûthitanga bara bangî kootiini i bûgwîteera nkuma. Ti kaaba bûgakara bûbîtîrîtue woogu rîmwe? Kana bûgakara bweneetue woogu weegua i bweneetue rîmwe?

⁸Îndî na rîo, bamwe beenu naabi i biû bûkûbîtîria bara bangî kana bûkabeenia, na n'aruanyûkwe na aaranyûkwe bûrî eetîgîri.

⁹Ka bûtaiyî bara barûthaga mantû mataagîrîte batiewa rûgai rwa ûnene bwa Ngai? Bûtikeebenie. Gûtirî we kîrî bara barûthaga mantû mama akeewa rûgai rwa ûnene bwa Ngai—mûmaramari, mûrombi ngai cia ûrongo, mûthûngîîri, ûra amaamaga na antû arûme ta we, mwamba, mwîrirîîria, mûtogooni, ûra aatuuyagîîra ûra ûngî, na mûtunyani.

¹¹Bamwe beenu i bu bwakari ûgu. Îndî ibwathambiirue bwathira meeyia, bwatherua na bwagîrithua riîtwaani rîa Mwathani Yiesû Kîrîstû na gûkûrûkîîra kîrî Kîrundu wa Ngai wetû.

¹²Waûmba kwîgua muntû akiuga, “Niû gûtirî ûntû mbonaga bûrî bûthûûku.” Îndî na rîo, mantû mara ûûmba kûrûtha ti meega monthe. Nwa mbuge gûtirî ûntû mbonaga bûrî bûthûûku, îndî niû gûtirî ûntû mbenda bûmbatha.

¹³Na waûmba kwîgua ûngî n'we akiuga, “Nda n'ya gwîkîra irio, na irio i bia gwîkirwa nda.” Bûbu n'ûmma, îndî Ngai akeenyangia bionthe birî biîrî. Mwîrî t'wa gûtûmîka na njîra ya ûmaramari. Ûbatîîrue ûtûmîka n'ûntû bwa Mwathani, Mwathani n'we amenyagîîra mwîrî.

¹⁴Kwa inya yake, Ngai naariûkiirie Mwathani. Na kwoogu wana kinya tiû twakua agatûriûkia.

¹⁵Ka bûtaiyî mîîrî yenu n'icuncî bia mwîrî wa Kîrîstû? Gûtiûmbîka nthûkia gîcuncî gîa Kîrîstû nkîgwatithania na îrwaya!

¹⁶Ka bûtaiyî ûra eegwatithanagia na îrwaya batuîkaga mwîrî ûmwe na rîo. *Maandîko Maatheru maugaga, “Barî baîrî bagaatuîka mwîrî ûmwe.”

¹⁷Îndî ûra we eegagua arî na ngwatanîro na Mwathani atuîkaga kîrundu ûmwe n'we.

¹⁸Kuthûkaani wîyia bwa ûmaramari. Meeyia mara mangî monthe muntû arûthaga, amarûthagîra ome ya mwîrî wake, îndî ûra eeyagia wîyia bwa ûmaramari, i mwîrî wake wengwa eeyagîria.

¹⁹Ga ûtaiyî mwîrî waku i nyomba ya Ngai ya Kîrundu Ûmûtheru ûra atûûraga ndeni yaku, ûra weerwe i Ngai? Ûtirî waku na bwaku,

²⁰n'ûntû ka bwagûrirwe goro mûno. Kwoogu ibûbatîîrue bûkumagia Ngai na njîra ira bûtûmagîra na cio mîîrî yenu.