Read tharaka 1 AKORINTHO 7 Bible Online

1 AKORINTHO 7 - tharaka bible

1 AKORINTHO 7

¹Îîndî ka ngwete mantû mara bwambandîkîîre bwambûûria. Wata bûra bûkûthûgaania, i kaaba muntû akarîîte atagûreene.

²Îndî n'ûntû bwa ûgwati bwa wîyia bwa ûmaramari, i kaaba woora muntû akeegua arî na mûka wake na woora mûka arî na mûrûme wake.

³Mûrûme nabatîîrue aingîria mûka wake thîîna ciake. Na mûka n'we nabatîîrue aingîria mûrûme wake thîîna ciake.

⁴Mûka atirî na watho bwa kûrûtha wabûra akeenda na mwîrî wake, i mûrûme wake arî na watho bûbu. Na mûrûme atirî na watho bwa kûrûtha wabûra akeenda na mwîrî wake, i mûka wake arî na watho bûbu.

⁵Gûtikaagîte we aregeera ûra ûngî, nwanga bûgwatanîrîte bûkarûngamîîra aniini kaingo bûromba Ngai bûtarî na ûntû bûngî. Bwarîîkia bûbatîîrue bûcookanîîra kaîrî, kaingo Saitaani atabûgeria n'ûntû bwa kwaga inya ya gwota wîrirîîria bwa mîîrî.

⁶Îndî bûbu tika nkuuga bûrî watho, ga nkwona bûrî ûntû bwega.

⁷Ûtakîîgua woora muntû akari ta niû! Îndî ingî na rîo woora muntû neetwe kîewa gîake i Ngai. Kûrî we eetwe kîewa kîna, ûngî n'we eewa kîra kîngî.

⁸Bara naabi bûtagûreene kana bûtarî bagûre na ntigwa, ndîona i kaaba bûgakara bûtarî na muntû ta niû.

⁹Îndî muntû akeegua atirî na inya ya gwota wîrirîîria bwa mwîrî nabatîîrue agûrana kana agûrwa. I kaaba kûgûrana kana kûgûrwa bantû a muntû akara akîrîyagwa i bata.

¹⁰Bara bûgûreene kana bûgûrîîtwe ndî na yathana kuuma kîrî Mwathani, na ti niû nkuuga. Mûka atikaume kîrî mûrûme wake.

¹¹Auma nwanga agakara wenka. Weegua t'ûgu acooke kîrî mûrûme wake. Na mûrûme n'we atigaacookie mûka wake.

¹²Na bara naabi mûka kana mûrûme atarî mwîtîgîri, ntirî na yathana kuuma kîrî Mwathani, îndî ka mbwîreeni ûûgû—ûkaaya kwîgua ûrî mwîtîgîri mûka atarî mwîtîgîri, mûka waku ûkeegua nagwîtîgîîria kûthi na mbere gûtûûrania naawe, ûtibatîîrue ûmûcookia.

¹³Na ûkaaya kwîgua ûrî mûka mwîtîgîri mûrûme atarî mwîtîgîri, mûrûme ûyu waku ûkeegua nagwîtîgîîria kûthi na mbere gûtûûrania naawe, ûtibatîîrue ûmûtiga.

¹⁴Kûgûrana kûra bwagûranire gûgaatarwa kûrî kûûtheru i Ngai n'ûntû bwa mûrûme kwîgua arî mwîtîgîri kana n'ûntû bwa mûka kwîgua arî mwîtîgîri. Ûkeegua gûtakari ûgu, aana beenu batiîgua barî baatheru. Îndî îîndî Ngai abathûkîîtie barî baatheru.

¹⁵Îndî ûkaaya kwîgua mûrûme atarî mwîtîgîri atikwenda kûthi na mbere gûtûûrania na mûka ûra aagûrire mbere ya atuîka mwîtîgîri, mûrûme ûyu nwa batigane na mûka ûyu. Na mûka ûra atarî mwîtîgîri wana we akeegua atikwenda kûthi na mbere gûtûûrania na muntû ûra aamûgûrire mbere ya atuîka mwîtîgîri, mûka ûyu nwa batigane na muntû ûyu. Gûkaaya gûkarîka ûgu, t'wa mwanka mwîtîgîri atûûranie na muntû atari mwîtîgîri, n'ûntû Ngai agwîtîîte kîrî we ûtûûraga na ûkiri.

¹⁶Mwekûrû, ûtiûmba kûmenya kana ûgaatûma mûkûrû waku oonoka! Na naawe, mûkûrû, ûtiûmba kûmenya kana ûgaatûma mwekûrû waku oonoka!

¹⁷Muntû abatîîrue akara wabûra aakari Ngai akîmwîta, na ûgu i bu abatîîrue akaraga akari ûgu. Bûbu i bu watho bûra ntûmagîra makanicaani monthe.

¹⁸Ûkaaya kwîgua muntû aataanîîtwe mbere ya Ngai amwîta, atibatîîrue athûgaania i kaaba ûkeegua atarî ûmûtaane. Na ûra n'we Ngai aamwîtire atarî ûmûtaane, atibatîîrue athûgaania nabatîîrue ataanwa.

¹⁹Kwîgua muntû arî ûmûtaane kana atarî ûmûtaane bûtirî gîtûmi. Bûra bûrî gîtûmi, i kwathîkîra maathana ma Ngai.

²⁰Muntû abatîîrue akara wabûra aakari Ngai akîmwîta.

²¹Warî nkombo Ngai agîgwîta? Bûbu bûtigaakûthîînie nkoro. Îndî ûkaaya kwona kaanya ga gûkûruta ûkombooni bûbu, gatûmîre.

²²Ûra aarî nkombo Ngai akîmwîta, ti nkombo kîrî Kîrîstû. Na ûra n'we ataarî nkombo Ngai akîmwîta, i nkombo ya Kîrîstû.

²³Bwagûrirwe goro mûno. Kwoogu bûtigaatuîke nkombo cia antû.

²⁴Aruayia na aarayia, muntû abatîîrue akara wabûra aakari Ngai akîbwîta. Na ûgu i bu bûbatîîrue bûkaraga bûkari ûgu Ngai arî amwe naabi.

²⁵Bara bûtagûreene kana bûtarî bagûre ntirî na yathana kuuma kîrî Mwathani, îndî ka mbwîreeni bûra nkwona bwagîrîte. Na ibwagîrîtwe bûmbîtîgia n'ûntû bwa bûra Mwathani ambîgîîtue kîao.

²⁶Îgiita rîrî tûrî, n'îgiita rîa kînyamaara. Kwoogu ndîona i kaaba bûkarîîte woogû bûkari.

²⁷Muntû ûra arî na mûka atigaacûe njîra ya gûtigana n'we. Na ûra n'we atarî n'we, atigaacûe njîra ya kûmûgwatithania.

²⁸Kûgûrana kana kûrega kûgûrwa, ti wîyia. Na mwarî akagûrwa ti wîyia. Bara bagûranaga kana bagûragwa batiagaga thîîna ira ciumanagia na ngûrano. Na thîîna inu i cio ntakwenda ibûgwata.

²⁹Aruayia na aarayia, bûra nkuuga n'atî, i taka kagiita gatatigeere kanene. Kwoogu kwanjîîria îîndî, bara bûrî na eekûrû bûbatîîrue bûkara ta bûtarî na bo.

³⁰Bara bûkûrîra bûbatîîrue bûkara taka bûtakûrîra. Bara bûkeneete bûbatîîrue bûkara taka bûtakeneete. Na bara naabi bûringaga biacaara bûbatîîrue bûkara taka bûtarî gîntû.

³¹Bara bûtûmagîra into bia nthîgûrû bûbatîîrue bûkara taka bûtabitûmagîra n'ûntû bûra nthîgûrû îkari îgiitaani rîrî bûkaathira.

³²Ndîenda bûtiga kûmaka. Muntû atagûreene eegagua akîrutîra Mwathani ngûgî rîonthe, agîcûûgia kûmûkenia.

³³Îndî ûra agûreene aunganagia ngûgî ya Mwathani na ngûgî cia kîînthîgûrû agîcûûgia gûkenia mûka wake.

³⁴Mantû i maîrî. Na mûka ûra atarî na mûrûme kana mwarî ûra atakûrî akûgûrwa eegagua akîrutîra Mwathani ngûgî rîonthe. Aûmagia akara arî ûmûtheru kîîmwîrî na gîînkoro. Îndî mûka ûra mûgûre eegagua arî na ngûgî cia kîînthîgûrû cia kûruta, agîcûûgia gûkenia mûrûme wake.

³⁵Ndiuga ûûgû mbûteethia. Tika nkûbûrigîîria. Ga nkwenda bûrûtha bûra kwagîrîte na bwîruta ngûgîîni ya Mwathani bûtarî na ûntû bûngî.

³⁶Muntû akoona taka akwenda kûbîtia kûringana na bûra bagûkarania na mwarî ûra barî ûcoore n'we, agatua kwîgua agîcindîîrwa i bûra akwîgua na arîîgua nwa agûrire mwarî ûyu, namûgûre woogû akwenda. Ûgu ti meeyia, ibagûrane.

³⁷Îndî ûkeegua muntû arî na mma nkorooni yake atî, gûtirî na gîtûmi gîa kûgûrana, na ûkeegua nakûûmba gûkara ûgu atakwîrirîîria mûka, akabanga kûrega kûgûra mwarî barî ûcoore n'we, ûgu n'ûntû bwega.

³⁸Kwoogu muntû ûra agûranaga kana agûragwa, n'ûntû bwega arûthaga. Îndî ûra atagûranaga kana agûrwa narûthaga bwega nkûrûki.

³⁹Mûka n'wa muntû ûra amûgûrîîte, bunka muntû ûyu arî mwoyo. Îndî muntû ûyu agakua, mûka arî na rûûtha rwa kûgûrwa i muntû ûngî, woora akeenda. Îndî ûra akaamûgûra nwa mwanka eegue eetîgîîtie Mwathani.

⁴⁰Îndî ndîona mûka ûyu aakena nkûrûki atagûrîîtwe kaîrî. Na nkîbwîra ûgu inkûthûgaania ndîbwatha kûringana na bûra Kîrundu wa Ngai eenda wîgua gûkari.