Read tharaka 1 AKORINTHO 9 Bible Online

1 AKORINTHO 9 - tharaka bible

1 AKORINTHO 9

¹Anga ntirî na rûûtha rwa kûrûtha bunthe bûra nkeenda? Ntirî mûtûmwa? Ntoonire Yiesû Mwathani wetû? Anga biû bûtirî matunda ma ngûgî yakwa îra ndutîrîte Mwathani?

²Wana kinya ûkeegua bara bangî batinthûkagia ndî mûtûmwa, na mma biû bûnthûkagia ndî mûtûmwa n'ûntû biû bwingwa i biû ûkûûyî bwa kwonania ndî mûtûmwa wa Mwathani.

³Antû bambîîra bûra bakwona ta mabîtia nkûrûtha nkîîtheteera mbeeraga ûûgû,

⁴ka niû ntarî na aki ya kweyagwa irio na biakûnyua ndî ta mûtûmwa?

⁵Ka ntarî na aki ya kûgûra mûka mwîtîgîri nthiyanagia n'we rîra ndî rûgendooni ta bûra atûmwa bara bangî, kana aruagina ba Mwathani, kana Petûrû barûthaga?

⁶Kana nwa niû tûrî na Baranaba twinka tûbatîîrue tûmenyaga twingwa naara tûkaarutaga bira tûrî bata na bio?

⁷Gûtirî mûcikaarî arutaga ngûgî ya ûcikaarî akîîrîaga mûcaara wengwa. Na gûtirî we aandaga mûnda wake ta wa ncabiibû ûgu, na atarîe maketha mamwe ma mûnda ûyu. Na kaîrî gûtirî we arîîthagia ng'ondu na atanyue îria rîmwe rîa rîra ciumaga.

⁸Ntikuuga mantû mama woogu na watho bwakwa bwa kîîmuntû. Anga watho bwa Ngai bûtiugîîte mantû wamama?

⁹*Wathooni bwa Musa kwandîkîîtwe ûûgû, “Ûtikaathaîke ng'ombe mûcomo rîra ûkûmîtûmîra kûbûûra.” Ka Ngai akiuga ûgu aaragîîria îgûrû rîa ng'ombe akî?

¹⁰Arî, augire ûgu n'ûntû bwetû. Na kwandîkirwe ûgu îgûrû rîetû n'ûntû ûra acimbaga mûnda na ûra abûûraga maketha ibabatîîrue beegua barî na wîrîgîîro bwa gûtûmîra irio bimwe bia bira bikethe, bira barutîrîte ngûgî.

¹¹Anga tûtaandire mbeû ya gîîkîrundu ndeni yenu? Kwoogu ka wîgua tûkîbûthîînia bûtwete bira twîgagua tûrî na bata na bio ûtûûrooni bûbû?

¹²Ûkaaya kwîgua bara bangî barî na aki ya kweyagwa gîntû i biû, na mma wana tiû tûrî n'yo. Îndî tika tûtûmagîra aki inu. Bantû a kûrûtha ûgu, twendaga kûûmîîria mantû monthe, kaingo tûteekîra kîrigîîria gûtambiani kûra tûtambagia ntheto îmbega îgûrû rîa Kîrîstû.

¹³Ka bûtaiyî bara barutaga ngûgî nyomba ya Ngai boonaga irio biao kuumania na nyomba ya Ngai? Na bara na bo ngûgî yao îrî kîthînjîrooni, bimwe bia bira birutagwa kîthînjîrooni biîgagua birî biao?

¹⁴Kîrî bara batûmagîîria ntheto îmbega, Mwathani augîîte nwa ta bu wana kinya bo babatîîrue beeyagwa bira barî bata na bio kuumania na ngûgî yao.

¹⁵Îndî amwe na ûgu, ntaatûmîra aki nwa îmwe ya inu. Na ntikûbwandîkîra îîndî kaingo bûmpa nwa mbi. I kaaba ngakua bantû a gîtûmi kîra gînkenagia gûtuîka i kîa ûtheri.

¹⁶Gûtûmîîria ntheto îmbega gûtitûma ndîîkumia, n'ûntû imbagîrîtwe ntûmîîria. Wîgua mbîtîîtie mûno ntagûtûmîîria!

¹⁷Ûkaaya kwîgua ndîîrutîîte gûtûmîîria, agu imbatîîrue mbîrîgîîra kwewa gîntû. Na ûkeegua ndîtûmîîria n'ûntû imbatîîrue ntûmîîria, i ngûgî tu wîgua nkîruta îra Ngai ampete nduta.

¹⁸Kwoogu kîewa gîakwa i kîbi? Kîewa gîakwa i kaanya kara ndî na ko ga gûtûmîîria ntheto îmbega ntakûrîwa, na ti ntûmîra aki îra îrî yakwa ngûgîîni îra nkûruta ya gûtûmîîria ntheto îmbega.

¹⁹Ntirî nkombo ya muntû, îndî na amwe na ûgu ndeetuîkithîîrie nkombo ya antû bonthe, kaingo mbonera Kîrîstû antû baingî bûra kûûmbîka.

²⁰Kîrî Ayaundi, ndeetuîkithiirie taka ndî ûmwe wao kaingo mbagarûra. Na kîrî bara bathingataga watho bwa Musa, ndeetuîkithiirie taka na niû mbûthingataga kaingo mbagarûra amwe nakwîgua niû watho bûtimbathaga.

²¹Na kîrî bara na bo batarî watho bwa kûthingata, ndeetuîkithiirie taka na niû ntarî watho bwa kûthingata kaingo mbagarûra, îndî tika ntarî na watho bwa kûthingata. Mbathagwa i watho bwa Kîrîstû.

²²Kîrî bara barî antû woogu ndeetuîkithiirie taka na niû ndî muntû woogu kaingo mbagarûra. Ndîîtuîkithagia mîthemba ya antû yonthe kaingo ngarûra bamwe na njîra yonthe îra yûmbîkana.

²³Na ndûthaga ûgu n'ûntû bwa ntheto îmbega, kaingo ntarîrwa ithaarimooni bira îrî.

²⁴Ririkanaani macindanooni ma rwîro, bara bonthe bagûcindana i baugagia, îndî n'ûmwe wao eeyagwa kîewa.

²⁵Bara bonthe bacindanaga macindanooni mana, nwa mwanka baathîkîre mawatho. Na barûthaga ûgu kaingo beecindîra kîewa, na i kîewa gîtagîtûûra oogo. Îndî kîewa kîra tiû tûkeewa gîgaatûûra tene na tene.

²⁶Gîku i kîo gîtûmaga mbugia ntarîîte mbere ntheri nkinyîîra rûrigi. I kîo kaîrî gîtûmaga ndingana nkundi ta bara batabîtagia.

²⁷Mmenyagîîria mwîrî wakwa kûrûthaga mantû marî inya na ngautuîkithia nkombo yakwa kaingo ntaregwa na ntûmîîrîîtie antû bara bangî.