Read tharaka 2 AKORINTHO 1 Bible Online

2 AKORINTHO 1 - tharaka bible

2 AKORINTHO 1

¹I niû Paûrû nkûbwandîkîra tûrî na mûruayia wetû Timotheo. Ntuîkithîîtue mûtûmwa wa Kîrîstû Yiesû kûringana na wendi bwa Ngai. Tûrîbwandîkîra biû eetîgîri ba kanica ya Ngai ya Korintho na antû bonthe ba Ngai ba gûntû kunthe Akaaya.

²Ngai Baaba wetû na Mwathani Yiesû Kîrîstû baroobwaa ûtugi na ûkiri.

³Ga tûkumieni Ngai Îthe wa Mwathani wetû Yiesû Kîrîstû. We i Baaba ûra atwîgagua kîao na i Ngai ûra atweyaga kûûmîîria kûûnene.

⁴Atûûmagîîria mathîînaani meetû monthe kaingo naati tûûmîîria bara barî na mathîîna ma mîthemba yonthe na kûûmîîria kûra tiû Ngai atwete.

⁵Wata bûra tûnyamaaragua mûno n'ûntû bwa Kîrîstû nwa ta bu tweyagwa kûûmîîria kûûnene mûno n'ûntû bwa Kîrîstû.

⁶Twathîînua, kûthîînua gwetû gûgaatûma bûûmîîria na bûteetheka. Twaûmîîrua, kûûmîîrua gwetû gûgaatûma bûûmîîria. Na kwoogu nwa bwote kûûmîîria kûnyamaaruani ta kûra tûnyamaaragua.

⁷Wîrîgîîro bwetû îgûrû rîenu i bûûnene. Itûkûmenya wabûra bûkûnyamaarua tûkînyamaarua, wana biû ibûkwewa kûûmîîria tûkîewa.

⁸Aruayia na aarayia, itûkwenda kûbûririkania thîîna îra twoonire rîra twarî nthîgûrû ya Îcia. Twoonire thîîna înene îtainyîkîrîka mwanka yatûma tûthira wîrîgîîro bunthe bwa gûtûûra mwoyo.

⁹Nkorooni cietû itweegagua tûgaakua îgamba rîetû i rîîgiite. Îndî mantû mama maatuîkîkire kaingo wîtîgio bwetû bûteegua bûrî kîrî inya yetû twingwa, îndî i kîrî Ngai ûra aûmba kûriûkia muntû ûmûkuû.

¹⁰Ngai naatwonokiirie twauma moogwatiini ta mamu manene ûgu makîûmba gûtûreetera gîkuû. Na wana îîndî natwonokagia. Tûrî na mma akaathi na mbere gûtwonokia.

¹¹Wana biû ibûtûteethagia na gûtûrombera. Na kwoogu antû baingî bagaacookeria Ngai nkaatho n'ûntû bwetû. Maromba ma antû baingî bara batûrombagîra imacookagua.

¹²Nkorooni cietû itwîgagua tûtirî na mabîtia. Nwa tuuge tûkeneete[1] mantû mara tûrûthaga gûkû nthîgûrû, na mûno mûno kîrî biû, twarûthire mo tûtarî na ûntû bûûthûûku, tûrî na mathûgaanio meega mbere ya Ngai. Tûûmbîîte kûrûtha mantû mamu monthe n'ûntû bwa ûtugi bwa Ngai, t'ûntû bwa ûûme bûra antû barî.

¹³Tûrîbwandîkîra mantû mara bûûmba kûthooma bûgaciûra. Na wata bûra bûtwiyî mantûûni mamwe, inkwîrîgîîra bûgatûmenya caû. Na rîru nwa bûtûkeneere,[2] ta bûra wana tiû tûkaabûkeneera[3] ntugû îra Mwathani wetû Yiesû akaaya kaîrî.

¹⁵Indaiyî ûgu i bu bûgaatûthûkia na i ntûma mbangîîte kwamba kûbûriûngîra mbere kaingo bûthaarimwa maita maîrî.

¹⁶Mbangîîte mbûyîîre kwenu mbûriûngîre nthiîte bwa Macendonia. Na ncookeete mbûye kaîrî nkîbûriûngîra bûkîmbumagaria nthi bwa Njundea.

¹⁷Ntigûceetha nkiuga nkabûriûngîra. Ntikûrûtha ta antû ba nthîgûrû bara baugaga yîî, îndî bataingie bûra bauga.

¹⁸Twîtîgieni ta bûra bwiyî Ngai i mwîtîgua. Twabwîra yîî, ûgu twauga nwa bu tûkaarûtha.

¹⁹Yiesû Kîrîstû, Mwana wa Ngai, ûra twabûtûmîîrie tûrî na Sairas na Timotheo, we t'ûra augaga yîî na agacooka akauga arî kagiita kangî. Augaga yîî kîrî ûntû bunthe,

²⁰kîrî mawîrane ma Ngai monthe. Na i ntûma tûtûmagîra riîtwa rîake kuuga “Aameni,” n'ûntû bwa ûkumio bwa Ngai.

²¹I Ngai atûmaga tûrika wîtîgioni bwetû kîrî Kîrîstû. I Ngai aatûthuurire tûtuîka antû ba mwanya kîrî we.

²²N'we aatwîkîîre rwano rwake rwa kwonania tûrî baake na atwa Kîrundu nkorooni cietû arî mûkûûyî wa mma wa mantû monthe mara atwetwe wîrane bwa mo.

²³Ngai i mûkûûyî n'ûmma nkwaria. Gîtûmi kîra kîagiriirie ncookeera naagu Korintho, ka nteendaga kûbûûmîria mantû.

²⁴Tika tûkwenda kûbwatha wîtîgioni bwenu. Ibûrikîîte wîtîgioni. Tûrutaga ngûgî amwe naabi i kaingo bûkena.