Read tharaka 2 AKORINTHO 12 Bible Online

2 AKORINTHO 12 - tharaka bible

2 AKORINTHO 12

¹Nwa nkaathi na mbere na gwîkumia wana weegua gûtirî kîo gûgûteethia na kîo. Îîndî ka mbuge mantû ma bioneki bira Mwathani amboneetie na kûgwûrîrwa kûra angwûrîrîte.

²Kûrî muntû mbiyî mwîtîgîri aabûriirue airwa îgûrû mûno mîanka îkûmi na îna mîthiru. Ntiyî weegua aarî mwîrîîni kana naumîîte mwîrîîni—i Ngai aiyî.

³Bûra mbiyî, ka mbiyî muntû ûyu naabûriirue airwa îkenero. Îndî ntiyî weegua aarî mwîrîîni kana naumîîte—i Ngai aiyî. Rîru aarî îkenero, eegiirue mantû atamenya kuuga. Muntû atiîtîgîîrîîtue amagweta.

⁵Mbatîîrue ndîîkumîria muntû ta ûyu, îndî ti niû ndîîkumia. Niû nwanga ngeekumia na mantû mara ntarî inya ya kûmarûtha.

⁶Îndî wana nkeenda gwîkumia ntiîgua ndî kîaa n'ûntû wîgua nkîaria ûmma, îndî ntiîkumia. Ntikwenda antû banthûkia mûkûûrani na bûra bakwona nkîrûtha na bûra bakwîgua nkiuga.

⁷Na kaingo nteekumia n'ûntû bwa kûgwûrîrwa mantû maanene mara ndagwûrîîrwe, Ngai naatûmire mbona thîîna îkarî ta mwîgua ûrî mwîrî. Thîîna înu yaumaniirie na Saitaani. N'we amîandîîte înnyamaaria kaingo ntaûyûrwa i wîkumia.

⁸Ndarombire Mwathani maita mathatû nkîmwîraga anthirîrie yo.

⁹Îndî n'we aambîîrire, “Ûtugi bwakwa kîrî woû ibûgûkûgana n'ûntû rîra muntû atarî na inya ya kûrûtha ûntû i rîo inya yakwa îrî nene.” Kwoogu inkwîgua nkeneete mûno na ngeekumîria mantû mara ntarî na inya ya kûmarûtha kaingo inya ya Kîrîstû îruta ngûgî naani.

¹⁰Na n'ûntû bwa ûgu ndî ûmûganîre i kwîgua ntarî na inya, kana ndarumwa, kana ndoona mathîîna ma mîthemba yonthe, kana ndanyamaarua n'ûntû bwa Kîrîstû. Rîra ntarî na inya ningwa ya kûrûtha ûntû i rîo ndî na inya kuuma kîrî Ngai.

¹¹Indîîtuîkithîîtie kîaa na gwîkumia bwakwa, îndî i biû bûtûmîîte ndûtha bu. I biû bûbatîîrue bwîgua bûgînkumagia n'ûntû tika kûrî kîra babu barî ‘atûmwa bongwa’ bancindîte na kîo, wana weegua ndî wa ûtheri.

¹²Indarûthire mantû mara moonaniirie ndî mûtûmwa wa mma rîra ndarî kwenu. Indoonaniirie iriga, magegania na biama ndî na kûûmîîria.

¹³Ûntû bûra ntaarûtha akî ga ntaatuîka mûrigo kîrî biû ta bûra ndûthaga makanica mara mangî. Itû ndekeraani mabîtia mamu!

¹⁴Indîîthuuranîrîte kûûya kûbûriûngîra kaîrî rîa mathatû, na ndaaya ntiituîka mûrigo kîrî biû. I biû ndî bata naabi ti mbia cienu. Twana ti tu tûbatîîrue tûmenyeera aciari ba tu, n'aciari babatîîrue bamenyeera twana twao.

¹⁵Kwoogu ingûkeneera kûbwaa bionthe wana niû mwene. N'ûntû inkûbwenda mûno i ntûma bûkûmbenda bûkai kana?

¹⁶Igûkwoneka bwega ntaarî mûrigo kîrî biû, îndî kûrî bo beenu bathûgaanagia i ûûme ndatûmagîra nkabweneeria na ûrongo bwakwa.

¹⁷Îîndî ata? Ndarabûcegeera na mûtûmwa kîrî bara ndatûmire kîrî biû?

¹⁸Rîra ndeerire Tito aaye twamûtûma barî na mûruayia ûra ûngî baarî n'we, ataabûcegeera. Ti bu? Wabu ataarûtha ûgu. Tûrî baîrî, we na niû, twarutire ngûgî îmwe tûrî na nkoro îmwe.

¹⁹Waûmba kwîgua bûkîthûgaanagia itûreethetagîîra kîrî biû kagiita gaka konthe. Îndî Ngai naiyî tûraaragia ûmma ta antû ba Kîrîstû. Na, eendwa, mara monthe tûrûthaga i makûbûteetheeria bûkûra bûrî eetîgîri.

²⁰Inkwîrîgîîra rîra nkaaya nkeethîra bûkari bûra mbenda bwîgua bûkari, na naabi bûkoona nkari bûra bwenda mbîgua nkari. Ntikwîrîgîîra mbîthîra bûgîkararanagia, bûkîîganagua rûriitho, bûthûûreene, bûthetaanîîtie, bûkîrumanaga, bûkîguutanaga, bûrî eekumia kana bûkîîngagîîra antû bagaûkia gîtuma.

²¹Inkwîrîgîîra rîra nkaaya Ngai atikambooreerie ngwatwa i kîeba n'ûntû bwa baingî beenu bara beeyiirie na bateerira ûthûûku bwao, ûmaramari, na mantû ma îgi mara baarûthire.