Read tharaka 2 AKORINTHO 13 Bible Online

2 AKORINTHO 13 - tharaka bible

2 AKORINTHO 13

¹Rîrî îîndî n'îgiita rîakwa rîa mathatû kûûya. Na wata bûra *Maandîko Maatheru maugîîte, ûra arî na ntheto na ûra ûngî nwa mwanka oonanie bûra abîtangîrîtue “kûrî na ûkûûyî bwa antû baîrî kana bathatû.”

²Rîra ndarî naagu rîa maîrî indakaaniirie bara bonthe beeyîîtie. Ntarî akubî naabi woogu, ka mbîîre bara bangî beeyirie rîra nkaaya naagu bûrî kaîrî bakoona thîîna înene.

³Rîru i rîo bûkoona bûra bûkwenda atî, wabu Kîrîstû nagûntûmîra kwaria. Tika akûruta ngûgî kîrî biû atakwîbûmba. Arî na inya.

⁴Wana weegua aambirwe mûtharabaani atarî na inya, n'inya ya Ngai îtûmîîte eegua arî mwoyo. Na wana tiû tûtirî na inya wata Kîrîstû bûra aakari, îndî tûgaatûûrania amwe n'we kwa inya ya Ngai kaingo tûmûtûmîkîra na ngûgî îra tûkûruta n'ûntû bwenu.

⁵Îraitheeni bwingwa. Îgeriani bwone kana bûrî wîtîgioni. Na mma ibwiyî Yiesû Kîrîstû arî ndeni yenu bunka bûtagwîte kîgerio.

⁶Na inkwîrîgîîra bûkoona tiû tûtaagwa.

⁷Itûkûromba Ngai bûtikaaye kûrûtha ûntû bûtaagîrîte. Na ti kaingo bwonania itwarutire ngûgî îmbega rîra twarî kwenu, îndî i kaingo bûrûtha bûra kwagîrîte wana weegua kûrîonekana tiû tûtigwîtîgîîrîka.

⁸Gûtirî bu tûrûtha tûrigîîria ntheto ya mma, nwa tûrûthire bûra îkwenda.

⁹Tûkenaga rîra tiû tûtarî na inya, biû bûrî n'yo. Itûkûbûrombera bûtuîka agima wîtîgioni.

¹⁰Gîku i kîo gîtûmi gîakwa gîa kûbwandîkîra mbwîra mantû mama kinya ntarî akubî naabi, kaingo rîra nkaaya ntatûmîra watho bûra Mwathani ampete ntakûbwîgua nthoni. Ndeerwe watho bûbû mbûkûria, îndî ti mbwînyangia.

¹¹Nkîthiria, aruayia na aarayia, ka mbwîreeni bûtigwe bwega. Cûûgiani na inya bwone bûgûtuîka eetîgîri agima. Rûthagaani ûgu mbûrîîtie bûrûthage. Îgaguani bûrî na meeciiria mamwe na tûûranagiani na ûkiri. Rîru i rîo Ngai ûra arî wendo na ûkiri akeegua arî amwe naabi.

¹²Keethanagiani na wendo bwa eetîgîri.

¹³Antû ba Ngai bonthe bara barî naaga bakûbûkeethia.

¹⁴Ûtugi bwa Mwathani Yiesû Kîrîstû, na wendo bwa Ngai, na ngwatanîro ya Kîrundu Ûmûtheru birookaraga naabi bwinthe.