Read tharaka 2 AKORINTHO 2 Bible Online

2 AKORINTHO 2 - tharaka bible

2 AKORINTHO 2

¹Kwoogu i ntûma nteendaga gûcookeera naagu mbûya gûtûma bûgwatwa i kîeba.

²Ngatûma bûgwatwa i kîeba i ba ûû bangî batûma nkena? Gûtirî ûngî nwa muntû woora nkîgwatithia kîeba aûmba gûnkenia.

³Gîku i kîo gîatûmire mbwandîkîra baarûa îra. Nteendaga kûûya ngwatithua kîeba i bara babatîîrue baankenia. Ndî na mma rîra nkenaga wana biû bwinthe ibûkenaga.

⁴Rîra ndabwandîkîîre, indanyamaaraga mûno nkorooni ntaakeneete. Ndaandîkire ngîtûûraga meethori maingî mûno. Ntaabwandîkagîra bûngwatithia kîeba. Ndabwandîkagîra mbûmenyithia bûra mbwendeete bûgana.

⁵Ûra areeteete kîeba, ti ninka agwatithîîtie. I bwinthe agwatithîîtie na njîra nna (ntikwenda kûthûûkia mantû nkûrûki ya bûra makari).

⁶Îndî n'we muntû ûyu îkaanûkia rîra baingî beenu bûmwete i rîkûgana.

⁷I kaaba îîndî bûkamûrekera na bûkamwîkîra wîru i kaingo n'we atagwatwa i kîeba athira wîrîgîîro.

⁸Kwoogu inkûbûûria bûmwonie wendo bwenu kîrî we i bwa mma.

⁹Ndabwandîkîîre baarûa îra îngî nkîbûgeria mbona kana bûrî aathîki mantûûni monthe.

¹⁰Warekera muntû, wana niû nkamûrekera. Na ûkaaya kwîgua kûrî we wabu mbatîîrue nderekera, nkûmûrekera n'ûntû bwenu, Kîrîstû arî mûkûûyî wakwa.

¹¹Ndamûrekera kaingo Saitaani atoona kaanya n'ûntû itwiyî mîbango yake bûra îkari.

¹²Nkûûya Tiroas gûtûmîîria ntheto îmbega ya Kîrîstû, Mwathani nampeere kaanya keega ga gûtûmîîria.

¹³Îndî ntaarî na ûkiri n'ûntû ntoona mûruayia, Tito. I ntûma ndeerire antû ba Tiroas i bwega, ndathi bwa Macendonia.

¹⁴Amwe na kwîgua ûgu i bu kwarî, nkaatho i kîrî Ngai ûra atûûmbithagia gûcinda rîonthe tûrî ndeni ya Kîrîstû na agatûtûmîra gûtambia ûmenyo bwake gûntû kunthe bûkari ta mîtaa.

¹⁵Tiû tûkari ta mîtaa îkûrutîrwa Ngai i Kîrîstû îgîtambaga kîrî bara boonokeetue na bara baûrîîte.

¹⁶Kîrî antû bamwe i kîrumba gîa gîkuû. Îndî kîrî bangî i mûnunko ûrî mûreo ûra weyanaga mwoyo. N'ûû arî mûganu wa kûruta ngûgî îno ya ûtûmîîria?

¹⁷Tiû tûtikari ta antû baingî bara bacûaga kwona mbia na gûtûmîîria kiugo kîa Ngai. Tûtûmagîîria ntûmwa îra Kîrîstû atwete tûrî aruti ngûgî ba Ngai tûtarî na mantû mangî. Na wana Ngai naiyî ûgu.