Read tharaka 2 AKORINTHO 3 Bible Online

2 AKORINTHO 3 - tharaka bible

2 AKORINTHO 3

¹Ka îîndî tûkwanjîîria kuuga kaîrî bûra tûrî beega? Kûrî antû boonaga kûrî na gîtûmi kwandîkîrwa baarûa cia kuuga bûra barî antû beega. Îndî kîrî tiû baarûa ta inu itirî gîtûmi. Gûtirî gîtûmi tiû kwandîkîrwa baarûa ta inu tûbûreetera kana tûbûûria biû bûtwandîkîra cio.

²Biû bwingwa i biû baarûa mantûûni meetû. Bwandîkîîtwe nkorooni cietû bûmenyeka i muntû wonthe na bûthoomwa.

³Ibwonanagia bûrî baarûa îra Kîrîstû atûmîîte kuuma naati. Baarûa îno îtiandîkîîtwe na rangi. Yandîkîîtwe na Kîrundu wa Ngai ûra atûûraga mwoyo. Yo îtiandîkîîtwe maigaani ma rûbaariû, yandîkîîtwe nkorooni cia antû.

⁴Tûriuga ûgu n'ûntû bwa bûra Kîrîstû atûmîîte twîgua tûrî na mma îgana na Ngai.

⁵Îndî tika tûkuuga nwa tûrute ngûgî îno twingwa. I Ngai atûûmbithagia kûrûtha mara monthe tûrûthaga.

⁶N'we aatûûmbithiirie kwîgua tûrî aruti ngûgî tûrutana kîrîîkanîro kîîyerû. Na kîo kîrîîkanîro gîkî kîîyerû ti watho bwandîkîîtwe, kîo i gîa Kîrundu. Watho bûra bwandîkîîtwe ibûûragaga, îndî Kîrundu we neeyanaga mwoyo.

⁷*Watho bûra bwareetire gîkuû bwandîkîîtwe maigaani ma rûbaariû. Na mwago wa Ngai nwonekanire rîra bwanenkanagîrwa, watûma ûthiû bwa Musa bûtharara mûno mwanka Aisiraeri baaremwa kûthi na mbere kûbucûûba. Îndî mpoora mpoora ibwacookire ta wîthîre.

⁸Ûkaaya kwîgua watho ibwarî na mwago ûgana ûgu rî, n'ata gûtûmîka gûkû gwa gîîkîrundu kûrî mwago nkûrûki?

⁹Ûkaaya kwîgua kîrîîkanîro kîra gîatuuyagîra antû ibeeyîîtie i kîarî na mwago, n'ata kîrîîkanîro kîra gîtuîkithagia antû baagîru kîrî mwago mûno nkûrûki?

¹⁰Nwa tuuge kîra kîarî na mwago, îîndî gîtirî na uu kîganaanîîtue na mwago ûmûnene mûno nkûrûki ûra kîrîîkanîro kîîyerû kîrî.

¹¹Ûkaaya kwîgua kîrîîkanîro kîra gîkûrû, kîra gîtaakarakaranga ikîarî na mwago, n'ata kîrîîkanîro kîîyerû, kîra gîgaatûûra tene na tene ûkeegua kîrî na mwago ûgana?

¹²Kwoogu, n'ûntû tûrî na wîrîgîîro bûbu, tûrî na ûcamba bûûnene mûno.

¹³Tiû tûtikari ta Musa ûra aakunîkîîre ûthiû bwake kaingo Aisiraeri batoona mwago ûkîthira.

¹⁴Mathûgaania ma Aisiraeri imaatigire kûruta ngûgî. Wana îmunthî gûkunîkwa wagûku ikûbaithaga batikaamenye ûmma bungwa baathooma mabuku ma kîrîîkanîro gîîkûrû. Gûkunîkwa gûku kûthiraga rîra muntû eetîgia Kîrîstû.

¹⁵Wana îmunthî warîonthe Ayaundi baathooma watho bwa Musa, ibakunîkagîrwa mathûgaania maao.

¹⁶Îndî muntû aagarûka kîrî Mwathani, gûkunîkwa gûku ikûthiraga.

¹⁷Mwathani i Kîrundu, na ara Kîrundu wa Mwathani eegagua arî, i kwîgagua kûrî na kûthaûrwa.

¹⁸Twinthe itwonaga[4] mwago wa Mwathani. Gûtirî gîtûmi gîetû gûkunîkîra moothiû. Na wabûra Mwathani, ûra arî Kîrundu, athiyaga na mbere kûruta ngûgî arî ndeni yetû i tûgarûkaga tûkabuanaana n'we na tûkoonania mwago wake mûno nkûrûki.