Read tharaka 2 AKORINTHO 4 Bible Online

2 AKORINTHO 4 - tharaka bible

2 AKORINTHO 4

¹I Ngai atwete ngûgî îno tûruta n'ûntû bwa kîao gîake. I ntûma tûtakuyaga nkoro.

²Itûrekanîîte na mantû ma witho ma îgi. Tûtienagîîria antû kana tûgarûra bûra kiugo kîa Ngai kîrutanaga. Bûra tûrûthaga, i tûrutanaga ûmma na njîra îtarî ya kîrigicano tûkîonagia antû bonthe tûrî ba ûû. Rîru i rîo bamenyaga na nkoro ciao tûrî antû ba mûthemba mûbi. Na Ngai naiyî ûgu.

³Ûkaaya kwîgua ntheto îmbega îra tûtûmagîîria n'îmbithe, yithîîtwe kîrî bara baûrîîte.

⁴Bara bateetîgagia batuîkithîîtue ntûngi i ngai ûra aathanaga nthîgûrû, ta we Nkoma. Atûmîîte barega kwona werû bwa ntheto îmbega îgûrû rîa mwago wa Kîrîstû, ûra arî mûbuanaano wa Ngai.

⁵Tûtitûmagîîria mantû meetû. Tûtûmagîîria Yiesû Kîrîstû i Mwathani, tiû naati tûrî aruti ngûgî beenu n'ûntû bwa Yiesû.

⁶Ngai ûra augire werû bûtharare mwinduuni natûmîîte kaîrî werû bwake bwatharara nkorooni cietû na njîra ya gûtûmenyithia mwago wake ûra tûgwûrîrîtwe ûthiûni bwa Yiesû Kîrîstû.

⁷Îndî tiû bara tûrî na ûtonga bûbû bwa gîîkîrundu tûkari ta nyûngû ciîkîrîtwe bu. Kwoogu i ta kwonania inya înu nene ûgu n'ya kuuma kîrî Ngai t'ya kuuma kîrî tiû.

⁸Twonaga mathîîna rîonthe îndî matitûthontoragia. Magiita mamwe i tûthîînaga mûno mwanka tûkaaga bwa kûrûtha. Îndî amwe noogu wîrîgîîro bwetû bûtithiraga.

⁹I tûnyamaaragua îndî gûtirî rîo Ngai atûtiganagîria. I tûtonyangagwa îndî tûtithiraga.

¹⁰Magiita monthe wîgagua tûrî ûgwatiini bwa kûûragwa ta Yiesû kaingo inya ya mwoyo wake yonekana bwega naati.

¹¹Tûrî mwoyo îndî tûkaraga tûrî ûgwatiini bwa gîkuû n'ûntû bwa Yiesû kaingo inya ya mwoyo wake yonekana na mîîrî îno îkuyaga.

¹²Kwoogu twîgagua tûrî ûgwatiini bwa gîkuû kaingo bwona mwoyo.

¹³Kwandîkîîtwe *Maandîkooni Maatheru, “Ndaariirie n'ûntû indeetîgiirie.” Wîtîgio bwetû na tiû i ta bûbu. Twaragia n'ûntû îtwîtîgîîtie.

¹⁴Itwiyî Ngai ûra aariûkiirie Mwathani Yiesû agatûriûkanîria amwe n'we atûreete kîrî we tûrî amwe naabi.

¹⁵Mantû mama monthe marî oogo n'ûntû bwenu. Kwoogu ûtugi bwa Ngai bûra bûthiîte bûgîkinyagîîra antû baingî bûgaatûma Ngai acookagîrua nkaatho inyingî mûno agîkumagua.

¹⁶N'ûntû bwa gîtûmi gîku, i ntûma tûtakuyaga nkoro. Mwîrî nûkûraga îndî kîrundu kîra kîrî ndeni yetû ikîanakaga wakîra ntugû.

¹⁷Tûthîîna tûra tûrî na tu i tûniini, na i twa kagiita gaakai. I tûthîîna twa gûtûthuuranîra tûthi mwagooni wa tene na tene ûra tûtaganaania na tu n'ûntû ûkeegua ûrî mwago ûmûnene mûno.

¹⁸Tûtitindanagîra na bira bionekanaga na meetho. Bira bitoonekanaga na meetho i bio birî bia gîtûmi. Bira twonaga na meetho bitikarakarangaga, îndî bira tûtaûmba kwona na meetho i bia tene na tene.