Read tharaka 2 AKORINTHO 5 Bible Online

2 AKORINTHO 5 - tharaka bible

2 AKORINTHO 5

¹Mîîrî yetû îkari ta mîciî îra tûtûûraga gûkû nthîgûrû. Itwiyî rîra mîîrî yetû îkoomboranua tûrî na îngî îgûrû îtarî ya gwakwa na njara cia antû kûra tûgaatûûra tene na tene.

²Kagiitaani gaka tûtûîre mûciî ûyû itûkiiaga n'ûntû twendaga gûtûûra mîciî ya îgûrû.

³Tûtiaga a gûtûûra n'ûntû tûgeekîrwa yo.

⁴Kagiitaani gaka tûrî mwîrîîni ûyû tûkiiaga i mûrigo ûra tûrî na uu. Tika twendaga twîgua tûtarî na mwîrî, îndî ga twendaga twîgua tûrî na ûngî kaingo kaanya ka ûyû ûra ûkuyaga kathûkua n'ûra ûtûûraga tene na tene.

⁵Gîku i kîo gîgûtûma Ngai atûthuuranîra, na natwete Kîrundu kwonania wabu i bu akaarûtha.

⁶Kwoogu tiû rîonthe twîgagua tûrî na kûûmîîria. Itwiyî kagiitaani gaka tûrî mwîrîîni ûyû, tûtitûûraga kûra Mwathani atûûraga.

⁷Tûtûîrue i wîtîgio ti kwona.

⁸I ntûma tûrî na kûûmîîria. Twenda mûno mûno kuuma mwîrîîni ûyû, ûkeegua tûrî mûciî amwe na Mwathani.

⁹Îndî nwîgue tûrî mûciî amwe na Mwathani kana tûrî gûkû mûciî ûyû, mworooto wetû i gûkenia Mwathani.

¹⁰Nwa mwanka twinthe tûkaarûngama mbere ya Kîrîstû atûgiitîre îgamba. Na woora ûmwe wacietû akaagiitîrwa bûra kwagîrîte, kûringana na mantû mara twaarorûtha tûrî mwîrîîni ûyû wa kîînthîgûrû, meega kana maathûûku.

¹¹Itwiyî gûkuthûka Mwathani i ta kuuga ata. Na i ntûma tûcûûgagia na inya kûreeta antû bara bangî kîrî we. Ngai naiyî bwega bûra tûkari. Inkwîrîgîîra wana biû ibûkûmenya na nkoro cienu bûra tûkari.

¹²Tika tûgûcûûgia kaîrî kûbwonia bûra tûrî antû beega. Ga tûkwenda kûbwonia gîtûmi kîenu gûtûkeneera,[5] kaingo bwîgagua bûrî na bwa kwîra bara beekumagîria mantû mara moonagwa, bantû a beekumîria bûra bûrî nkorooni.

¹³Weegua bûrîona taka tûthûûkîîte biongo, tûthûûkîîte bio n'ûntû bwa Ngai. Na weegua itûkûthûgaania bwega, i biû tûkûthûgaanîria.

¹⁴Tûtongoragîîrua i wendo bwa Kîrîstû bûra arî kîrî tiû n'ûntû itwiyî n'we aakuîrîîre antû bonthe gwatuîka i taka antû bonthe baakuire.

¹⁵Kîrîstû aakuîrîîre antû bonthe kaingo bara barî mwoyo batigaatûûre n'ûntû bwa mantû maao bongwa, îndî ibatûûre kûrutîra ngûgî ûra aabakuîrîîre na aariûka.

¹⁶Îgiitaani rîrî tûtithûgaanagîria antû ta bûra antû ba nthîgûrû babathûgaanagîria. Tene twathûgaanagîria Kîrîstû ta bûra antû ba nthîgûrû bamûthûgaanagîria. Îndî îîndî tûtimûthûgaanagîria ûgu.

¹⁷Muntû akeegua arî ndeni ya Kîrîstû atuîkaga kîûmbe kîîyerû. Mantû mara makûrû imathiraga akeerûua kûrû.

¹⁸Mantû mamu monthe maumanagia na Ngai. Ngai aatûmîîre Kîrîstû aatûma tûtuma ûnyanya n'we na tûrî atûmwa atwa ngûgî ya kwîraga antû bûra baûmba gûtuma ûnyanya n'we.

¹⁹Ngai aatumire ûnyanya na antû ndeni ya Kîrîstû atagûtara meeyia maao. Na natwete ngûgî ya gûtambia ntûmîîri îno ya ûnyanya.

²⁰Kwoogu ga tûtûmîîtwe i Ngai bantû a Kîrîstû. I taka Ngai agûtûtûmîra kûbwîta arî we wengwa. Itû tûkûbwereka tûrî kaanyaani ga Kîrîstû, tumaani ûnyanya na Ngai.

²¹Kîrîstû ataarî na meeyia. Îndî Ngai aamûtuîkithiirie kîgongwana kîa meeyia n'ûntû bwetû kaingo ndeni yake twîgua tûrî baagîru kîrî Ngai.