Read tharaka 2 AKORINTHO 6 Bible Online

2 AKORINTHO 6 - tharaka bible

2 AKORINTHO 6

¹Tûrutaga ngûgî na Ngai. Na kwoogu tûtikwenda bûreka ûtugi bûra aabwere bûtuîka bwa ûtheri.

²Ngai augîîte, “Ndabwîgiirue kagiita kara kaagîrîte ndabûteethia ntugû ya kwonoka.” Ga nkûbwîra, “kagiita kara kaagîrîte” n'îîndî, na “ntugû ya kwonoka” n'îîndî.

³Tûtikwenda ngûgî yetû yonekana îrî na mabîtia. Kwoogu i tûcûûgagia mûno kwona gûtirî muntû tûreekîîra kîrîgîîria.

⁴Mantûûni monthe mara tûrûthaga i twonanagia mûkarîre wetû n'ûmwega na tûrî aruti ngûgî ba Mwathani. Ûgu i bu mûkarîre wetû ûkari mathîînaani maingî ma mîthemba îmingî mara tûûmagîîria.

⁵Tûturagwa na tûkaingîrwa nceera, na wana gîtuma tûraûkîrua n'antû. Tûrutaga ngûgî na inya rîmwe tûtakwona toro na rîngî tûtarîîte.

⁶Itûkwonania tûrî aruti ngûgî ba Ngai n'ûntû bwa ûkembu bwetû, ûmenyo, kûûmîîria, kûbua kûra tûbuîte, Kîrundu Ûmûtheru ûra arutaga ngûgî arî ndeni yetû, na n'ûntû bwa wendo bwa mma bûra tûrî na bu.

⁷Tûrutanaga antû ûmma na tûrî na inya ya Ngai. Tûtûmagîra wagîru kwîrûîrîîra mbarî cionthe.

⁸Kûrî batweyaga gîtîîyo na kûrî batûmenagîîria. Kûrî batûrumaga na kûrî batûkumagia. Na kûrî bo baugaga tûrî arongo, îndî twaragia ûmma.

⁹Twonagwa tûrî ageni, îndî twiyîkeene mûno. Tûkari ta antû bagûkua, îndî tûtigûkua. Na wana weegua i tûnyamaaragua, tûtiûragagwa.

¹⁰Tûrî na kîeba, îndî rîonthe itûkenaga. Tûrî nkîa, îndî itûtûmîîte baingî baatonga wîtîgio. Gûtirî kîo tûrî, îndî ûmma n'atî bionthe i bietû.

¹¹Akorintho, tûbwîrîîte mantû gûtarî bu tûkûbwitha na tûbwendeete kûthiria.

¹²Tiû tûtitigîîte kûbwenda, i biû bûtigîîte gûtwenda.

¹³Ndîaria naabi ta aana baakwa bongwa nkwaria na bo. Rûthaani ûgu tûrûthîîte, bûtwende na biû ta bûra tûbwendeete!

¹⁴Bûtikaagwatane na bara bateetîgîîtie. N'ata wagîru bûûmba gûtuîka mûnyanya wa ûthûûku? Werû bwengîrana na mwindu?

¹⁵N'ata Kîrîstû na Berio, ta we Nkoma, baûmba kwîgua barî na ngwatanîro? N'irîkû mwîtîgîri aûmba kwaria na muntû ateetîgîîtie?

¹⁶Nyomba ya Ngai yaûmba gûtuma nthungurumi na mîbuanaano? Tiû, i tiû nyomba ya Ngai ûra atûûraga mwoyo. I Ngai augire, “Ngaatûûra kîrî antû baakwa na nkarage na bo. Nkeegua ndî Ngai wao, na bo barî antû baakwa.”

¹⁷“Kwoogu Mwathani ariuga, ‘Umaani kîrî bo, bwîbathûre. Weegua bûtiitonga gîntû kîrî na mûgiro, nkabwîtîgîra.’ ”

¹⁸“Nkeegua ndî abaagu, naabi bûrî aana baakwa, ba arûme na ba aarî. Ûgu i bu mwene inya Mwathani augîîte.”