Read tharaka 2 AKORINTHO 7 Bible Online

2 AKORINTHO 7 - tharaka bible

2 AKORINTHO 7

¹Eendwa, n'ûntû bwa mawîrane mama Ngai atwete, ga twîtherieni kuumania na ûntû bunthe bûra bûûmba gûtûma mîîrî yetû kana mîoyo yetû îrûtha meeyia. Ga twîtherieni buru tûkarage tûkuthûkîîte Ngai.

²Twîtîgîreeni bûrî na wendo. Gûtirî we twabîtîria kana tûbîtithia njîra. Na gûtîri we twatûmîra bûra gûtaagîrîte.

³Na kuuga ûgu ti kuuga ga nkûbûgiitîra îgamba. Wata bûra mbwîrire i tûbwendeete mûno, nwa tûtûûre kana tûgakua naabi.

⁴Inkûbwîtîgia mûno na nwa ndîkumîrie biû. Ibûmbûmagîîria mûno nkeegua nkeneete mûno mathîînaani mara monthe tûrî na mo.

⁵Rîra twayire Macendonia tûtaanogoka i mathîîna mara maatûthiûrûkîîte nteere cionthe. Anthû beetû baatûkarariirie twamaka.

⁶Îndî Ngai ûra aûmagîîria bara barî thîînaani naatûûmîîrie aatûma Tito aaya.

⁷Kûmûûmîîria kûra bwamûûmîîrie kinya ku igwatûûmîîrie. Naatwîrire i bûkwenda kûmbona mûno na bûrî na kîeba n'ûntû bwa bûra gwakarîkire. Na kinya naatwîrire bûra bûrî na mwoyo wa kwenda gûnteethia ndeegua ndakena mûno.

⁸Wana kinya ûkeegua baarûa îra ndabwandîkîîre nîatûmire bûgwatwa i kîeba, ntikwona ndî na mabîtia kûmîandîka. Mbereeni ndaroonaga maarî mabîtia kûbwandîkîra yo n'ûntû nîabûgwatithiirie kîeba gîa kagiita gaakai.

⁹Îndî îîndî ndîîgua nkeneete mûno. T'ûntû bwa bûra baarûa yakwa yabûgwatithiirie kîeba, îndî n'ûntû bwa kwîgua kîeba kîra kîabûgwatire i gîatûmire bwîrira meeyia meenu. I Ngai aatûmîîre kîeba. Kwoogu tiû gûtirî bu twabûtonya na bu.

¹⁰Kîeba kîra Ngai atûmagîra kîreetaga kwîrira kwa meeyia kûra gûtûmaga muntû oonokua. Na gûtirî mabîtia marî agu! Îndî kîeba gîa kuumania na mantû ma kîînthîgûrû kîreetaga gîkuû.

¹¹Ndîenda bûmenya baita ya Ngai gûtûmîra kîeba kîrî biû. Îîndî bûrî na wîru nkûrûki, i bûkwenda kwîtheteera, na igîatûmire bwathûûra bwakuthûka. Kîeba gîku igîatûmire bwenda kûmbona mûno na bûgîa wîru. Na igîatûmire bwona gûkûrûthwa bûra kwagîrîte. Ibwonanîîtie bûtirî na mabîtia mantûûni monthe maakoneetie ûntû bûbû.

¹²Ntaabwandîkîra baarûa îra n'ûntû bwa ûra aabîtîîtie kana n'ûntû bwa ûra aabîtîrîtue. Ndaandîkire yo kûbûmenyithia bwega, Ngai akîonaga, bûra bwîrutîîte bûgana n'ûntû bwetû.

¹³Na gîku i kîo gîatûmire tûûmîîria. Ti kûûmîîria gunka twaûmîîrie. Wana gûkena i twakenire na inya mûno tûkwona bûra Tito aakeneete bûgana, n'ûntû bwa bûra bwinthe bwatûmire nkoro yake îîgua bwega.

¹⁴Indeerire Tito bûra bûnkeneetie. Na ibwonanîîtie wabu i nkeneete. Bûra bunthe twabwîrire n'ûmma. Na ibwonanîîtie mantû mara twerire Tito wabu i ma mma.

¹⁵Na kwoogu kûbwenda kûra abwendeete ikwongeerekeete, aaririkana bûra bwinthe bwendeete kwathîka. Bwamûthûkiirie na gîtîîyo kîînene mûno.

¹⁶Ingûkena mûno n'ûntû inkûbwîtîgia kûrû.