Read tharaka 2 AKORINTHO 8 Bible Online

2 AKORINTHO 8 - tharaka bible

2 AKORINTHO 8

¹Aruayia na aarayia, tûrîenda bûmenya bûra Ngai atugîîte makanica ma Macendonia.

²Baageriirue na mathîîna maingî mûno na nwa bu baarî na ûkîa bûgana. Îndî amwe na ûgu, gûkena kûra baakeneete kwarî kûnene mûno. Beeyanire na gûkûrûkîîria baakûrûkîîria kaingo bateethia nkîa batagûtara.

³Ga nkûbwîra, beeyanire bûra bakîûmba na gûkûrûkîîria baakûrûkîîria bûra baûmbaga. Beeyanire bakîendaga.

⁴Igûtwereka baatwerekire twîtîgîra biewa biao, wana bo baathûngîra mûtariini wa ngûgî îno ya gûteethia antû ba Ngai.

⁵Baarûthire ûntû tûteerîgîîrîîte. Mbere baambire beenenkanîra kîrî Mwathani na kîrî tiû, wata bûra Ngai eendeete barûtha.

⁶Tito n'we aambanîîrie naabi ngûgî ya kwîthîrania mbia. Kwoogu i ntûma twamwîrire abûteetheerie bûthirîkîrie ngûgî îno ya kwîganua kîao.

⁷Bûtongeete na bionthe—wîtîgio, rwaria, ûmenyo, kwenda gûteethia na nkoro yonthe, na wendo bûra bûtwendeete na bu. Kwoogu i tûkwîrîgîîra bwîgua bûkari ûgu kinya mantûûni ma kweyana bûtagûtara.

⁸Îndî tika nkûbwîra nwa mwanka bûrûthe ûgu ndauga. Ga nkwenda kwona bûra wendo bwenu bûrî bwa mma rîra nkûbûganaania na antû bangî bara bakwenda gûteethania.

⁹Ibwiyî ûtugi bwa Mwathani wetû Yiesû Kîrîstû. Amwe na kwîgua aarî ûmûtongu eetuîkithiirie nkîa n'ûntû bwenu kaingo abûtongia na ûkîa bwake.

¹⁰Ndîona i kaaba îîndî bûkathirîkîria kîra bwanjîîrie mwanka mûthiru. I biû ba mbere kweyana. Na ti na kweyana gunka, i kinya na kwîgua bûrî na wendi bwa kweyana.

¹¹Kwoogu îîndî thirîkîriani ngûgî înu. Onaniani wendi bwenu bwa kûmîthirîkîria i bûûnene ta bûra bwarî na bu rîra bwamîanjagîîria.

¹²Ûkeeyana ûrî na wendi, Ngai ageetîgîra kûringana na bira ûrî na bio, ti bira ûtarî na bio.

¹³Tûtikwenda bûûmîrwa i mantû bûgîcûa kûthirîria bara bangî thîîna ciao. Tûrîenda kwîgua kûrî na nganaano.

¹⁴Kagiitaani gaka n'ûntû bûrî na bio nwa bûteethie bara batarî na gîntû. Kagiita kangî rîra ûkeegua na bo barî na bio biingî, nwa babûteethie rîra bûtakîîgua bûrî na gîntû na rîru i rîo ûkeegua bûrî nganaano.

¹⁵Wata bûra kwandîkîîtwe *Maandîkooni Maatheru, “Ûra ooyaniirie mûno tika eegua arî na nkûrûki. Na ûra ooyaniirie bûûkai tika aaga.”

¹⁶Ingûcookeria Ngai nkaatho n'ûntû bwa kwaa Tito nkoro ta îra ndî ya kwenda kûbûteethia.

¹⁷Tûkûûria Tito kana eetîgîra tûkamûtûma kîrî biû ataarega. Kwaria mma, we wengwa neendaga mûno mûno kûûya.

¹⁸Tûrîmûtûma barî na mûruayia ûngî akumagua mûno i makanica n'ûntû bwa ngûgî ya ntheto îmbega îra arutaga.

¹⁹Na nkûrûki ya ûgu, mûruayia ûyû naathuurirwe i makanica athiyanagia naati ngendooni cietû twirîîte ûteethio bwetû. Itûtûmaga Mwathani akumua na bu na ibwonanagia wendi bwetû bwa gûteethia.

²⁰Tûtikwenda kwîgua kûrî na ûntû bwa kûnung'unîra îgûrû rîa ûteethio bûbû bwa mbia inyingî bûra tûgûtûmîra antû ba Ngai ba Njundea.

²¹Itûgûcûûgia mûno bûra kûûmbîka tûrûthe bûra kwagîrîte kîrî Mwathani na kîrî antû.

²²I ntûma tûgûtûma mûruayia ûngî wetû kaîrî baayania na Tito. Itûmûgereetie mantûûni maingî twona arî na wîru mûno bwa kwenda gûteethia. Îîndî nakwenda kinya nkûrûki n'ûntû nakûbwîtîgia mûno.

²³Tûrutaga na Tito ngûgî îmwe ya kûbûteethia. Aruayia baba na bo baayanîîtie n'we i batûmîîtwe i makanica, na i bakwonania mwago wa Kîrîstû.

²⁴Kwoogu boonieni wendo bwenu i bwa mma na oniani makanica tûtikenaga[6] i biû mana.