Read tharaka 2 AKORINTHO 9 Bible Online

2 AKORINTHO 9 - tharaka bible

2 AKORINTHO 9

¹Ntikwona kûrî na gîtûmi gîa kûbwandîkîra nkûrûki mantû mama ma ûteethio kîrî antû ba Ngai ba Njundea.

²Imbiyî bûra bûrî na wendi bûgana bwa gûteethia. Ndareeraga antû ba Macendonia bûra biû bûrî Akaaya bûnkeneetie[7] bûgana n'ûntû bwa bûra bwendire kweyana kuuma mwanka mûthiru. Na bakwîgua ûgu, wana bo baîngî baao i baagîîre wendi bwa kweyana.

³Ndîtûma aruayia baba baaya kwona ntikenaga[8] i biû mana, na bakîona wabu ibwîthuuranîrîte wabûra mbeerîîte.

⁴Weegua ûkeegua tûrî na antû ba Macendonia rîra tûkaaya, tweethîra bûteethuuranîrîte bûgatwîkîrithia nthoni n'ûntû i tûbwîtîgîîtie mûno. Îndî ingî ga ntakwenda kûbwîra wana biû bûkaagîa îgi rîru!

⁵I ntûma ndaroonire i kaaba mbûrie aruayia baba baaye mbere ya tûûya, boone kîewa kîenu kîra bwaugire bûkeeyana kîrî oogo. Na kîewa kîenu i kîo gîkoonania bweyanîîte bwendeete, tika bûkinyîîrîîtue.

⁶Ririkanagaani ûra aandaga biikai akethaga biikai. Îndî ûra aandaga biingî akethaga biingî.

⁷Woora muntû abatîîrue eeyanaga kûringana na bûra akwîgua nkorooni yake. Bûtikeeyaneeni bûkîîgagua bûtikwenda kana taka bûkinyîîrîîtue. Ngai eendaga muntû ûra eeyanaga akeneete.

⁸Ngai nwa abwongeere bigakûrûkîîria bira bûkwenda kaingo rîonthe bwîgagua bûrî na bionthe bira bûkwenda na bingî bia gûteethagia bara bangî.

⁹Kwandîkîîtwe ûûgû *Maandîkooni Maatheru, “Eeyaga nkîa atagûtara. Wagîru bwake bûgaatûûra tene na tene.”

¹⁰Ngai ûra eeyaga mwandi mbeû na akaa antû irio bia kûrîa agaatûma mbeû îra abwete yuma maketha maingî mûno ma wagîru bwenu.

¹¹Akaabûtongia na bionthe kaingo bweyanaga bûtagûtara. Na baingî bagaacookeria Ngai nkaatho rîra tûkaabairîra biewa bienu.

¹²Ngûgî îno bûkûruta ti gûteethia îgaateethia gunka antû ba Ngai bara nkîa. Kinya îgaatûma antû baingî bacookeria Ngai nkaatho.

¹³Ngûgî îno bûkûruta nîkwonania ûmma bwa wîtîgio bwenu. Ibwathîkagîra ntheto îmbega ya Kîrîstû îra bûkûûyagîîra bûkauga ibûmîîtîgîîtie. Kwathîka kwenu na biewa bira bweyanîîte na nkoro îmbega bigaatûma antû baingî bakumia Ngai n'ûntû bwa kûbaa bio bo, amwe na bara bangî bonthe.

¹⁴Na bakaabûrombera na wendo bûûnene n'ûntû bwa ûtugi bûûnene bûra Ngai abwete.

¹⁵Tûcookagîrieni Ngai nkaatho n'ûntû bwa kîewa gîake gîa kûrigaria!