Read tharaka AGARATIA 1 Bible Online

AGARATIA 1 - tharaka bible

AGARATIA 1

¹I niû Paûrû nkûbwandîkîra, biû eetîgîri ba Garatia. Mwîto wakwa wa gûtuîka mûtûmwa t'wa kuuma kîrî muntû kana gûkûrûkîîra kîrî muntû. Mwîto wakwa n'wa kuuma kîrî Yiesû Kîrîstû na Îthe Ngai ûra aamûriûkiirie.

²Ndîbwandîkîra tûrî amwe na aruayia bara bangî bonthe ndeni ya Kîrîstû.

³Ngai Baaba wetû na Mwathani Yiesû Kîrîstû baroobwaa ûtugi na ûkiri.

⁴I kaingo atûthaûra tuuma ûthûûkuuni bwa nthîgûrû îno, Yiesû neepeyanire n'ûntû bwa meeyia meetû kûringana na bûra Ngai Baaba wetû eendeete.

⁵Ngai arookumua tene na tene. Aameni.

⁶Ibûkûndigaria mûno! N'ata bûûmba kûgarûkanga na mpwî ûgu bûgatiga ûra abwîtîîte ûtugiini bwa Kîrîstû, bûkaanjîîria gwîtîgîîria ntheto îngî îtarî ya mma?

⁷Kwaria mma gûtirî ntheto îngî îmbega. N'antû bamwe bakwenda kûbûreeteera thîîna bakîenda kûgarûra ntheto îmbega ya Kîrîstû.

⁸Îndî ka mbwîreeni, nwîgue n'ûmwe wetû tûrî atûmwa, kana i mûraîka kuuma îgûrû akûbûtûmîîria ntheto îngî îtarî îra twabûtûmîîrie kuuma mbere, ûyu n'ûmûrîrîke i Ngai!

⁹Ka mbwîreeni kaîrî bûra twabwîrire atî, muntû akaaya kûbûtûmîîria ntheto îngî îtarî îra bwarutanirwe, ûyu n'ûmûrume i Ngai!

¹⁰Î rîo rî, ga nkuuga ûgu nkîenda mbendwa n'antû kana i Ngai? Ka ngûcûûgia gûkenia antû? Arî. Ûkaaya kwîgua n'antû nkwenda gûkenia ûtiîgua ndî mûruti ngûgî wa Kîrîstû.

¹¹Ndîenda bûmenya ntheto îno îmbega ngûtûmîîria t'ya kuuma kîrî muntû.

¹²Na ntaarutanwa yo i muntû. I Yiesû Kîrîstû aangwûrîîre yo.

¹³Ibwîgîîtue bûra mûtûûrîre wakwa wakari rîra ndathingataga wîthîre bwa Kîîyaundi, na bûra ndanyamaaragia athingati ba Ngai ntakûbeegua kîao ngîcûûgia kûthiria kanica cwe.

¹⁴Gûtirî we wa taarîetû agîncinda kûthingata wîthîre bwa Kîîyaundi. Ndarî mûthingati wengwa wa moorutani ma akûrû beetû.

¹⁵N'ûtugi bwa Ngai bwatûmire anthuura kinya mbere ya nciarwa na aambîta mmûrutîra ngûgî. Rîra aabangire

¹⁶kûngwûrîra mmenya Mwana wake kaingo mmûtûmîîria kîrî bara batarî Ayaundi, ntaathi kwîra muntû antaûrîre,

¹⁷kana nthi Njerusaremu kûromba ûkûrû kîrî bara baarî bagûtuîka atûmwa mbere yakwa. Ndathiire Arîbia na nyumaani ndacooka Ndamasiki kaîrî.

¹⁸Mîanka îthatû îkûthira, indathiire Njerusaremu kûriûngîra Petûrû na twakarire n'we ntugû îkûmi na îtaano.

¹⁹Na ntugû înu ndarî Njerusaremu i Petûrû na Njakubu mûruagina wa Mwathani twonanire na bo bonka. Tûtoonana na atûmwa bara bangî.

²⁰Mantû mama monthe nkûbwîra i ma mma na Ngai i mûkûûyî, mbîtîgiani.

²¹Nkuuma Njerusaremu, indacookire ndathi Sîîria na Sirîsia.

²²Kagiita gaku twaka eetîgîri ba gîteere kîa Njundea baarî bakûmbona ningwa.

²³N'antû beegîîtue bakîngweta bakiugaga, “Muntû ûra aratûnyamaaragia îîndî nagûtûmîîria wîtîgio bûra aracûûgagia kwînyangia!”

²⁴Baakumia Ngai n'ûntû bwa kûgarûka gwakwa.