Read tharaka AGARATIA 2 Bible Online

AGARATIA 2 - tharaka bible

AGARATIA 2

¹Nyuma ya mîanka îkûmi na îna indacookire ndathi Njerusaremu tûrî na Baranaba na Tito.

²Kûthi gwakwa kwarî n'ûntû bwa bûra Ngai angwûrîrîte ambonia nthi. Nkûthi twonanire na bara baataragwa barî atongoria bonka, ndabataranîria bwega ntheto îra ntûmagîîria bara batarî Ayaundi. Na gîtûmi gîa kûrûtha ûgu ga nteendaga gûtuîka i ngûgî ya ûtheri ndarutaga.

³Gûtirî we wa atongoria babu aakinyîîria gûtaanwa wa Tito ûra twarî n'we, n'ûntû aarî Mûngiriki na ataarî ûmûtaane.

⁴Îndî kûrî antû bangî beendaga Tito ataanwa. Baarî eetîgîri ba ûrongo. Baayîîte beecinîkîîria gîkundiini gîetû bathigaana kûthaûrwa kûra tûthaûrîîtwe ndeni ya Kîrîstû Yiesû kaingo batûtuîkithia nkombo ciao.

⁵Îndî tûteetîgîîria ûgu beendaga nwa aniini kaingo bûtauma ûmmaani bwa ntheto îmbega.

⁶Gûtirî kîo babu boonekaga taka baarî gîtûmi boongeera ntûmîîriini îra ntûmagîîria (îndî nwîgue baarî ba ûû, gûtirî mûkûûrani kîrî niû n'ûntû Ngai atitûmagîra kîmenyano).

⁷Iboonire wabu Ngai nambîtîgiirie ntûmîîria ntheto îmbega kîrî antû ba nthîgûrû ira ingî, ta Petûrû bûra aatûmagîîria Ayaundi.

⁸Ngai ûra aatûmire Petûrû aruta ngûgî ya ûtûmwa kîrî Ayaundi nwa we aatûmire nduta ngûgî ya ûtûmwa kîrî bara bangî.

⁹Na wana Njakubu, Petûrû na Njoana bara boonagwa barî atongoria ba kanica batûkeethia tûrî na Baranaba îrî njîra ya kwonania ngwatanîro, bakwona wabu Ngai nampete ngûgî înu ya mwanya. Twacooka twagwatanîra twauga bo ibarute ngûgî kîrî Ayaundi, naani tûrî na Baranaba tûtûmîîrie antû ba nthîgûrû ira ingî.

¹⁰Bûra baatwîrire tûririkane kûrûtha, i tûririkanage bara batarî na bio. Na wana niû nwa bu ndoonaga itwagîrîte kûrûtha.

¹¹Îgiita rîmwe Petûrû akûûya Antiokia, indamûtheteerie antûûni n'ûntû kwaria mma naabîtîîtie.

¹²Akûûya warîo naarîyaga irio na eetîgîri bataarî Ayaundi. Îndî Ayaundi bamwe baugaga i Njakubu aabatûmîîte arî Njerusaremu bakûûya, Petûrû eebathûrana na eetîgîri babu n'ûntû naakuthûkaga Ayaundi babu.

¹³Na wana Ayaundi bangî baarî Antiokia baarûtha ûgu Petûrû aarûthire, ta eebwithia. Na wana Baranaba mwene i bu aarûthire.

¹⁴Nkwona bataarûthaga bûra kwagîrîte kûringana na ûmma bûra bûrî nthetooni îmbega, i rîo ndeerîîre Petûrû mbere yao bonthe, “Ûkaaya kwîgua woû ûrî Mûyaundi ûtikûthingata maathana ma Kîîyaundi na ûrîkara ta bara batarî Ayaundi, kûrî na gîtûmi kîrîkû gûkinyîîria bara batarî Ayaundi bo bakara ta Ayaundi?”

¹⁵Tiû tûrî Ayaundi gûciarwa, tûtirî bara batarî Ayaundi, bara tuugaga bo n'eeyia.

¹⁶Na itwiyî kîra gîtûmaga muntû atuîka ûmwagîru. Muntû atuîkaga ûmwagîru eetîgia Yiesû Kîrîstû. T'ûntû bwa kûthingata *watho. Itweetîgiirie Kîrîstû Yiesû, na wîtîgio bwetû kîrî we i bu bwatûtuîkithiirie baagîru. T'ûntû bwa kûthingata watho, n'ûntû kûthingata watho gûtituîkithia muntû ûmwagîru kîrî Ngai.

¹⁷Ûkaaya kwîgua rîra tûgûcûa kwagîrithua ndeni ya Kîrîstû antû barîtwona tûrî ‘eeyia’ ta bara batarî Ayaundi, i Kîrîstû atûmaga twîyia? Arî buru!

¹⁸Nûkeegua nkîîyia waya kwîgua watho bûra ndareganire na bu îrî njîra ya gûtuîka ûmwagîru i bu ncookeete kûthingata.

¹⁹Indaathingataga watho. Îndî îîndî ndî ûmûkuû kîrî bu, na i bu bûmbûragîîte kaingo ntûûrîra Ngai.

²⁰Indaambanîîrue amwe na Kîrîstû mûtharabaani na ndakuyanîria n'we kaingo gûtuîka niû ntirî mwoyo, i Kîrîstû atûîre ndeni yakwa. Ûtûûro bûbû ndî na bu îîndî, ntûîre na wîtîgio kîrî Mwana wa Ngai ûra aambendire aakua n'ûntû bwakwa.

²¹Ntiûmba kûrega ûtugi bwa Ngai. Ûkaaya kwîgua muntû aûmba kwonokua aathingata watho, gûkua gwa Kîrîstû i kwa ûtheri kwarî.