Read tharaka AGARATIA 3 Bible Online

AGARATIA 3 - tharaka bible

AGARATIA 3

¹N'ata bûtakîîte bûgana, Agaratia baba! Ka bûrî baaroge? Ka bwariganîîrue ibwooniirue bwega gîtûmi kîa Yiesû Kîrîstû kwambwa mûtharabaani?

²Ka mbûûrieni ûntû bûmwe. I kûthingata *watho gwatûmire bwewa Kîrundu Ûmûtheru, kana i bûra bweegiirue ntheto îmbega bwamîîtîgia?

³Anga nwabu bûtakîîte ûûgû? Ka bûkwenda kûthûûkia bûkîthiria mma na bwaanjîîrie bwega na Kîrundu wa Ngai?

⁴Na kûra kûthîîna bwathîînîîte kûgana ûra kwarî kwa mana? Ndî na mma gûtaarî kwa mana.

⁵Ibûkwona taka Ngai aûmba kûbwaa Kîrundu wake na akaringa biama bûkîonaga n'ûntû bwa bûra bwathingata watho, kana i bûra bweegiirue ntheto îmbega bwamîîtîgia?

⁶Tathûkiani ngerekano na Îburaîmu. *Maandîko Maatheru maugaga, “Îburaîmu neetîgîîtie Ngai. Na n'ûntû bwa wîtîgio bwake Ngai aamûthûkiirie arî muntû ûmwagîru.”

⁷Kwoogu, i ta kwonania bara tûûmba kuuga n'aana ba Îburaîmu, i bara barî na wîtîgio.

⁸*Maandîko Maatheru maugîîte Ngai akaagîrithia antû ba mîgongo yonthe na njîra ya wîtîgio. Maandîko maagweteere Îburaîmu ntheto îno mbega kuuma wo tene mamwîra, “Rûciaro rwaku rûgaatûma antû bonthe ba nthîgûrû bathaarimwa.”

⁹Kwoogu muntû wonthe ûra ageetîgia akaathaarimwa ta bûra Îburaîmu eetîgiirie, n'we Ngai amûthaarima.

¹⁰Ûra wonthe eerîgagîîra watho n'ûmûrume n'ûntû Maandîko Maatheru matûrutanaga atî, “Muntû wonthe ûra atathingataga bûra bunthe bwandîkîîtwe îbukuuni rîa watho, ûyu naakamenya n'ûmûrume i Ngai!”

¹¹Kwoogu ibûkwona bwega mma atî, gûtirî we Ngai aûmba kwagîrithia n'ûntû bwa kûthingata watho. N'ûntû Maandîko Maatheru matwîraga, “Ûra aagîrithagua n'ûntû bwa wîtîgio bûra arî na bu agaatûûra.”

¹²N'ûntû kwathîkîra watho twaka kwendaga muntû eegua arî na wîtîgio. Bûra kûrî, Maandîko marîtwîra, “Muntû ûra aathîkagîra maathana ma watho agaatûûra n'ûntû bwa mo.”

¹³Îndî kinya ûkeegua watho ibwatûreeteere kîrumi, Kîrîstû naatûthambiirie kîrumi gîku rîra aarumirwe arî we bantû eetû. Maandîko marîtwîra ûûgû, “Muntû wonthe ûra acuuragua mûtîîni n'ûmûrume i Ngai.”

¹⁴Gwakarire ûgu kaingo kîthaarimo kîra Ngai eerire Îburaîmu kiingua kîrî antû ba mîgongo yonthe gûkûrûkîîra kîrî Kîrîstû Yiesû. Na kaingo twewa Kîrundu ûra twerwe arî wîrane n'ûntû bwa gwîtîgia.

¹⁵Aruayia na aarayia, ka mbwe ngerekano na mûtûûrîre wetû wa kîra ntugû. Antû baîrî bakarîîkanîra ûntû gûtirî we arega kwingia, kana oongeera bûngî. Ûgu i ta bu mantû mama makari.

¹⁶Ngai eere wîrane kîrî Îburaîmu na mbeû yake. *Maandîko Maatheru matikuuga “mbeû yake yonthe.” Mariuga “mbeû yake,” îmwe, ta yo Kîrîstû.

¹⁷Bûra nkwenda kuuga n'atî, gûtirî bu *watho bwa kûûya nyuma ya mîanka magana mana ma mîrongo îthatû bûûmba kûthûkia kaanya ga kîrîîkanîro kîra gîtûîre oogo, gûtuîka wîrane bûbu bûtirî na gîtûmi.

¹⁸Ûkaaya kwîgua rûgai rwa Ngai rûrî oogo n'ûntû bwa watho, gûtirî bu rûûmba kwîgua rûrî oogo n'ûntû bwa wîrane bwake kaîrî. Îndî Ngai eere Îburaîmu rûgai rûru n'ûntû bwa kwingia wîrane bwake.

¹⁹Gîtûmi kîa watho i kîrîkû? Watho bweekîîrwe oogo kaingo bwonania bûra antû barî wîyia bûgana, mwanka rîra ûra wa rûciaro rwa Îburaîmu aayire, n'ûntû wîrane bwarî kîrî we. Watho bwareetirwe n'araîka gûkûrûkîîra kîrî muntû, muntû ûyu arî mwîguithania wa antû na Ngai.

²⁰Gûtirî mwîguithania wa muntû ûmwe, îndî Ngai n'ûmwe.

²¹Kuuga ûgu i ta kuuga *watho ibûkûregana na mawîrane ma Ngai? Arî buru! N'ûntû ûkaaya kwîgua kûrî watho bûûmba gûtûma muntû oona mwoyo, muntû neetîgîîrîka i Ngai n'ûntû bwa kwathîkîra watho.

²²Îndî na bu ti bu kûrî ûgu. Kwandîkîîtwe *Maandîkooni Maatheru nthîgûrû yonthe yathagwa n'inya ya meeyia. Kwoogu rûgai rûra rûgweteetwe wîraneeni rweyagwa bara beetîgîîtie n'ûntû bwa wîtîgio bwao ndeni ya Yiesû Kîrîstû.

²³Mbere ya tûgîa wîtîgio, watho bwatûgwete bwatûrikia ta agwate nceera, mwanka rîra twagwûrîîrwe wîtîgio bûra bwarî bûkaaya.

²⁴Kwoogu watho bwarî bwa gûtûtongoreeria mwanka rîra Kîrîstû aayire, kaingo twîtîgîîrîka kîrî Ngai, bara tûkaamwîtîgia.

²⁵Îîndî na rîo n'ûntû kagiita ka wîtîgio i gaakinyu, tûtirî wathooni kaîrî.

²⁶I wîtîgio bwenu ndeni ya Yiesû Kîrîstû bûtûmîîte bwinthe bûtuîka aana ba Ngai.

²⁷Bara bwabaatithiirue ndeni ya Yiesû Kîrîstû, bweekunîkîîre na Kîrîstû.

²⁸Kwoogu gûtirî mwanya wa Mûyaundi na muntû atarî Mûyaundi. Na gûtirî ûyû i nkombo na ûyû ti nkombo. Kana ûyû i muntû mûrûme, na ûyû i mûka. Bwinthe i gîntû kîmwe ndeni ya Yiesû Kîrîstû.

²⁹Na ûkaaya kwîgua bûrî ba Kîrîstû, n'ûgu bûrî rûciaro rwa Îburaîmu na bûkeewa rûgai rûra Ngai eeyanîîte wîrane bwaru.