Read tharaka AGARATIA 4 Bible Online

AGARATIA 4 - tharaka bible

AGARATIA 4

¹Kwoogu bûra nkûbwîra n'atî, mwene rûgai rwa îthe arî ûmûniini atirî mwanya na nkombo, amwe na kwîgua n'we mwene ûtonga bunthe.

²Arî ûmûniini kûrî bara bamûmenyagîîra, na bara bamwîraga bûra akaarûtha mwanka rîra kagiita kara kaagîrîte gagaakinya.

³Wana tiû rîra twarî baaniini twarî wathooni bwa mawatho ma nthîgûrû îno.

⁴Kagiita kara kaagîrîte gagûkinya, Ngai naatûmire Mwana wake. Aaciarirwe i mûka wathooni bwa Kîîyaundi.

⁵Aatûmirwe aaya gûkûûra bara baatûîre baathagwa i watho, kaingo twîtîgîîrîka tûrî aana ba Ngai.

⁶N'ûntû îîndî naabi bûrî aana baake, Ngai natûmîîte Kîrundu wa Mwana wake nkorooni cienu, Kîrundu ûra eetanaga, “Aba,” na bu i ta kuuga “Baaba.”

⁷Kwoogu i ta kwonania atî, woû ûtirî nkombo kaîrî, ûrî mwana. Na n'ûntû ûrî mwana wake, îîndî Ngai agûtuîkithîîtie mwene rûgai rwake.

⁸Mbereeni rîra bûtaiyî Ngai bwarî nkombo cia ngai gûtarî.

⁹Îîndî ibwiyî Ngai. Kana nwa tuuge Ngai nabwiyî. N'ata kaîrî bûûmba gûcooka kîrî irundu bia ûtheri, bitarî ûteethio? I kî n'ûntû bûkwenda gûtuîka nkombo cia bio kaîrî?

¹⁰Bwonaga ntugû nna, kana mîerî mîna, kana îgiita rîna, kana mîanka mîna îrî gîtûmi, bûkîthûgaanagia kwathîkîra cio i gûkenagia Ngai!

¹¹Bûmmakîîtie mûno n'ûntû waûmba kwîgua ngûgî îra yonthe ndutîîte n'ûntû bwenu îraarî ya ûtheri!

¹²Aruayia na aarayia, nkûbwereka karaani ta niû n'ûntû wana niû indakarire ta biû. Gûtirî ûthûûku bwandûthîra.

¹³Ibwiyî thîîna ya mwîrî îra ndarî n'yo nîatûmire mbona kaanya ga kûbûtûmîîria ntheto îmbega kagiita ka mbere.

¹⁴Îndî amwe na kwîgua ndarî magerio kîrî biû, bûtambûthia kana bûnthekeera n'ûntû bwa bûra ndakari. Bwanthûkiirie ta bûra bûkîthûkia mûraîka kana Kîrîstû Yiesû we wengwa.

¹⁵Mbereeni bwarî antû ba nkena. N'ata îîndî bûrakarire? Nwa mbuge gûkîûmbîkire bûgînkûûrîra meetho meenu bûgampa.

¹⁶Ntikûbûûria, ka ndaratuîkire mûnthû wenu n'ûntû bwa kûbwîra ûmma?

¹⁷Antû babu bangî babwenagîîria bakîîriragîîria kûbûkuuyia kîrî bo, îndî ti na wega. Beendaga kûbûtigithania naani kaingo bûboonia bûrî bata na bo.

¹⁸I bwega kwîrirîîria ûntû, bunka gîtûmi kîrî kîega. Kwoogu ûgu i bu bûbatîîrue bûrûthaga rîonthe, ti warîra rîonka ndî amwe naabi.

¹⁹Aana baakwa, mwanka rîra bûgaakara ta Kîrîstû kaîrî ntiitiga kwîgua rûgakaî ta rwa mwekûrû arî akubî kûgîa na mwana.

²⁰Ûtakîîgua i ndî akubî naabi thaa ino bûkoona bûra bûmmakîîtie bûgana. Bûndigarîîtie mûno mûno!

²¹Tatiga mbûûrieni biû bara bûkwenda gûkara *wathooni. Anga bûtiiyî bûra watho buugîîte?

²²Îbukuuni rîa watho kwandîkîîtwe atî, Îburaîmu naarî na nthaka ciîrî. Îmwe aaciarire na mûka nkombo, îra îngî aaciara na mûka ataarî nkombo.

²³Nthaka înu ya mûka nkombo yaciarirwe kûringana na wîthîre. Îndî înu îngî ya mûka ûyu ataarî nkombo yaciarirwe kûringana na bûra wîrane bwa Ngai bwakari.

²⁴Mantû mamu i ngerekano. Eekûrû babu baîrî i ngerekano ya irîîkanîro biîrî. Kîrîîkanîro kîa mbere i kîra gîa Kîrîma gîa Sinaî. I kîo kîonanîîtue n'Aga. Aana baake bonthe baaciarîîrwe ûkombooni.

²⁵Aga i ta Kîrîma gîa Sinaî kîra kîrî nthîgûrû ya Arîbia, na i ngerekano ya taûni ya Njerusaremu îra îrî oogo îîndî. Yo na antû ba yo bonthe i nkombo.

²⁶Îndî Njerusaremu ya îgûrû i Njerusaremu îtarî ûkombooni na n'yo taata wetû twinthe.

²⁷Ûûgû i bu kwandîkîîtwe *Maandîkooni Maatheru, “Kena, woû mwekûrû nthaata! Tûmîîria, ugîîria na inya îra nene ûkeneete, woû ûteegua ûrûrû bwa gûciara! Gîtûmi n'atî mwekûrû aatigirwe wenka akaagîa na aana baingî mûno, acinde ûra ataatigwa wenka.”

²⁸Biû, aruayia na aarayia, bûrî aana ba wîrane bwa Ngai ta Isaka.

²⁹Îndî bûririkanage, ta bûra mwana ûra aaciarirwe kûringana na wîthîre aanyamaaragia ûra aaciarirwe na njîra ya Kîrundu, nwa ta bu gûkari kinya ntugûûni ino.

³⁰Maandîko Maatheru maugîîte ata? Maugîîte, “Mûka nkombo na mwana wake ibeengatue n'ûntû mwana wa mûka nkombo atiewa rûgai mwana wa mûka ûra atarî nkombo akîgaîrwa.”

³¹Kwoogu, aruayia na aarayia, tiû tûtirî aana ba mûka nkombo, tûrî aana ba mûka atarî nkombo.