Read tharaka AGARATIA 5 Bible Online

AGARATIA 5 - tharaka bible

AGARATIA 5

¹Tûtirî ûkombooni kaîrî. Kîrîstû naatûkûûrire twauma ku. Kwoogu rûngamaani bwîrikîîtie. Na bûtigaacookere gîcooki gîa ûkombo kaîrî.

²Nthikîîriani bwega bwîgue bûra nkûbwîra, ndî Paûrû. Na mma ga nkûbwîra, bwatua gûtaanagwa gûtirî bu Kîrîstû akaabûguna na bu.

³Na ka mbuge kaîrî atî, muntû ûra ageetîgîîria gûtaanwa nwa aathîkîîre bûra bunthe *watho buugîîte.

⁴Weegua bûrîîrîgîîra bweetîgîîrîka i Ngai na njîra ya kûthingata watho, na bûkamenya bûkwathûkana na Kîrîstû na bûrî ome ya ûtugi bwa Ngai.

⁵Îndî tiû twîrîgîîrîîte na mma tûgeetîgîîrîka tûrî baagîru. Na ûgu i bu tweteereete tûrî na wîtîgio kwa inya ya Kîrundu.

⁶N'ûntû ndeni ya Yiesû Kîrîstû, gûtaanwa kana kûrega gûtaanwa i bûmwe. Kîra kîrî gîtûmi i wîtîgio bûra bûrutaga ngûgî na njîra ya wendo.

⁷Ibûrarûngîîte njîra bwega intakûmenya n'ata bûrakarire! N'ûû arabweneerie bwatiga kûthingata ûmma?

⁸Ûra arûthîîte ûgu ti Ngai ûra abwîtîîte aramûtûmîîte.

⁹Na wata bûra kwîragwa, i kandawa kaniini geekagîrwa mûtuuni na gakaûmba kwimbithia mûtu unthe!

¹⁰Îndî amwe na ûgu, ndî na wîtîgio bûûganu naabi n'ûntû bwa Mwathani atî, bûkaagwatanîra naani ûntûûni bûbû. Na inkûmenya ûra akûbwîngîîra akîenda kûbûbîtithia njîra, ûyu wana kinya weegua narî ûû nakaagambithua i Ngai.

¹¹Î niû naani, aruayia na aarayia, ûkaaya kwîgua ntûmagîîria mantû ma ntaano nkauga antû bataanagwe rî, i kî îîndî n'ûntû nnyamaaragua? Ûkaaya kwîgua n'ûmma, ûgu i bu ndûthaga, ntûmîîri îno ntûmagîîria ya mûtharaba wa Kîrîstû îtireeta thîîna nwa aniini.

¹²Bara bakûbûta baroetemanga barî bo![1]

¹³Biû, aruayia na aarayia, Ngai ataabwîta bûtuîka nkombo. Îndî amwe na kwîgua bûrî baathaûre, bûbu bûtigaatûme bûreka mantû ma nthîgûrû îno mara mîîrî yetû îîriragîîria mabweneeria. Bûbatîîrue bûteethanagia bûkîendaga.

¹⁴Ûkaingia yathana rîra rîmwe riugîîte, “Enda mûtûûri waku ta bûra wîbendeete,” ûkwathîkîra bûra maathana monthe meendaga.

¹⁵Bûgatua kûrûa bûrî bwingwa ta nyamû cia kîthaka ibûkeethûûkia bwingwa.

¹⁶Bûra nkûbwîra n'atî tûûragaani kwa inya ya Kîrundu na mûtugo wa kîîmuntû, ta uu wa wîyia ûtibûûmba.

¹⁷Bûra mûtugo wa kîîmuntû wendaga ûtigwatanagîra na bûra Kîrundu eendaga. Kîrundu na mûtugo wa kîîmuntû bitigwatanîra. Na n'ûntû birî biîrî bikaraga bikîrûaga, ûtiûmba kûrûtha bûra ûkwenda ûrî woû na bwaku.

¹⁸Bûkaaya gwîtîgîîria gûtongoragua i Kîrundu bûticooka *wathooni kaîrî.

¹⁹Mantû maathûûku ma mûtugo wa kîîmuntû i maiyîkeene. Na mo i ta ûtheria, ûmaramari, mantû ma rûko,

²⁰kûrombaga ngai cia ûrongo, ûrogi, gûtumana ûthû, gûcûanîra ûgîti, rûriitho, mûthûûro, kwenda kûgîta wenka, nkarari, kwathûkana,

²¹kwîrirîîria, ntogoona, biatho bitaagîrîte, na mantû mangî ta mamu. Ka mbûkaanieni kaîrî wata bûra mbûkaanîîtie na tene ndabwîra atî, antû bara barûthaga mantû ta mamu batiewa rûgai ûneneeni bwa Ngai.

²²Îndî maciaro ma Kîrundu i wendo, nkena, ûkiri, kûûmîîria, kwîganagîîrua kîao, wega, wîtîgio,

²³ûbooreeru, na kûrega mîîrî yetû îtwatha bûra îkwenda. Na gûtirî watho bûûmba kûrega kûgwatanîra na mantû ta mamu.

²⁴Antû bara barî ba Yiesû Kîrîstû ibaambire mûtharabaani mûtugo wa kîîmuntû amwe na wîrirîîria bwa uu bûûthûûku.

²⁵Kwoogu ûkeegua tûtûûraga na Kîrundu, ga tûtongorague n'we ûtûûrooni bwetû.

²⁶Tûtigeekumagie, tûtigaacûanîre ûgîti, na tûtikeeganague rûriitho.