Read tharaka AGARATIA 6 Bible Online

AGARATIA 6 - tharaka bible

AGARATIA 6

¹Aruayia na aarayia, ûmwe wacienu akaaya kûgwa meeyiani, bara bûrî agima gîîkîrundu geriani kûmûteethia acooke kûrûthaga bûra kwagîrîte. Îndî ingî ti na ûgîti. I mpoora, bûkîmenyagîîra bûtikaaye kûthûngîra magerioni na biû.

²Twaranagiani mîrigo. Na bwarûthaga ûgu ûkeegua bûkiingia watho bwa Kîrîstû.

³Ûkaaya kwîgua muntû eebonaga taka arî wa gîtûmi, ûyu i kwîbenia eebenagia, atirî nwa mûthigi.

⁴Îndî woora muntû nathime mûkarîre wake we wengwa. Ûkaaya kwîgua ûrî mûkarîre ûmwega, rîru muntû nwa akeneere uu, n'ûntû bwa mantû mara arûthîîte arî we. Îndî t'akîîbuanaanagia na bûra muntû ûngî arûthîîte.

⁵Woora muntû akaûrua n'ûntû bwa mûkarîre wake.

⁶Muntû ûra akûrutanwa rûtheto rwa Ngai nabatîîrue arûmagia mûrutani wake ûra akûmûrutana into biega bionthe bira arî na bio.

⁷Bûtikeebenie mana. Muntû atiûmba kweneeria Ngai. Kîra muntû akaanda i kîo agaaketha.

⁸Ûra aandaga mantû ma mûtugo wa kîîmuntû, ta uu wa wîyia agaaketha gîkuû. Îndî ûra aandaga mantû ma gîîkîrundu agaaketha ûtûûro bwa tene na tene kuumania na Kîrundu.

⁹Tûtikaanoge i kûrûtha mantû meega n'ûntû twaûmîîria tûgaaketha kagiita gaakinya.

¹⁰Kwoogu, rîra tûrî na kaanya tûbatîîrue tûrûthagîra muntû wonthe mantû meega, na mûno mûno, aruayia na aarayia bo barî na wîtîgio bûmwe na bwetû.

¹¹Tacûûbaani bwone bûra mbwandîkîrîte na ntemwa iinene na njara yakwa ningwa.

¹²Antû bara bakwenda kûbûkinyîîria bûtaanwa i bara beendaga kwonwa barî beega meethooni ma antû. Na gîtûmi kîra gîgûtûma barûtha ûgu i kîmwe akî. Na kîo i kaingo batanyamaarua n'ûntû bwa mûtharaba wa Kîrîstû.

¹³Wana bo bongwa barî bataane woogu, twaka baathîkagîra watho. Barîenda bûtaanwa kaingo beekumagîria biû.

¹⁴Îndî niû gûtirî gîntû ndîîkumîria, tatiga mûtharaba wa Mwathani wetû Yiesû Kîrîstû, n'ûntû niû nûtûmîîte mantû ma nthîgûrû maakua naani ndakua kîrî mo.

¹⁵Gûtaanwa kana kûrega gûtaanwa t'ûntû. Bûra bûrî gîtûmi i kûgarûka na gûtuîka kîûmbe kîîyerû.

¹⁶Bara bathingataga ûrutani bûbû, ûkiri na kîao birookaraga na bo na bara bonthe barî antû ba Ngai.[2]

¹⁷Nkîthiria ka mbwîre, muntû atikaanthîînie kaîrî n'ûntû marema mama ndî na mo mwîrî ûyû wakwa i makwonania na mma ndî wa Yiesû.

¹⁸Aruayia na aarayia, ûtugi bwa Mwathani wetû Yiesû Kîrîstû bûrookaraga naabi. Aameni.