Read tharaka AEBEESO 1 Bible Online

AEBEESO 1 - tharaka bible

AEBEESO 1

¹I niû Paûrû nkûbwandîkîra, biû antû ba Ngai ba Ebeeso. Ntuîkithîîtue mûtûmwa wa Kîrîstû Yiesû kûringana na wendi bwa Ngai. Ndîbwandîkîra biû bûrî eetîgua ndeni ya Kîrîstû Yiesû.

²Ngai Baaba wetû na Mwathani Yiesû Kîrîstû baroobwaa ûtugi na ûkiri.

³Ngai, Îthe wa Mwathani wetû, Yiesû Kîrîstû arookumua n'ûntû natûthaarimîîte na ithaarimo bionthe bia gîîkîrundu bira birî îgûrû. Na arûthîîte ûgu n'ûntû bwa bûra tûrî ndeni ya Kîrîstû.

⁴Mbere ya kûûmbwa kwa nthîgûrû, Ngai naarî agûtûthuura tûtuîka antû baake tûrî ndeni ya Kîrîstû, kaingo tûtûûra tûrî baatheru na tûtarî na mabîtia kîrî Ngai.

⁵N'ûntû bwa wendani bwake, kuuma mbere, wendi bwa Ngai na yeerekeeria rîake rîarî gûtûtuîkithia aana baake na njîra ya Yiesû Kîrîstû.

⁶Kwoogu îîndî ga tûkumagieni Ngai n'ûntû bwa gûtwaa kîewa gîa ûtugi, kîra aatûnenkeere kîa ûtheri gûkûrûkîîra kîrî Mwana wake ûra eendeete.

⁷Tûkûûrîîtwe i nthakame ya Kîrîstû. Na ûgu i kuuga tûrî baarekere meeyia meetû n'ûntû bwa ûtugi bûbû bûnene ûûgû.

⁸Aatwere ûtugi bwingî mûno, ûûme bunthe, na ûmenyo.

⁹Kûringana na mûbango wa wendi bwake ndeni ya Kîrîstû, Ngai natûmenyithîîtie kîriga kîra eekîîre oogo kuuma wo tene.

¹⁰Na mûbango ûyu ûkaingîka kûrû rîra îgiita rîgaakinya rîongwa, rîra rîagîrîte. Rîru i rîo akaaringanîra biûmbe bionthe amwe ndeni ya Kîrîstû, bira birî gûkû nthîgûrû na bira birî îgûrû.

¹¹Ngai naatûtaarire tûtuîka antû baake ndeni ya Kîrîstû n'ûntû bwa yeerekeeria rîake warîra aarî na rîo mbere. Ngai rîonthe arûthaga mantû monthe kûringana na bûra abangîîte na bûra yeerekeeria rîake rîkari.

¹²Atûtaarîîte kaingo tiû bara twarî ba mbere buru kûgîa na wîrîgîîro na Kîrîstû tûkumithia Ngai ûra arî mwago.

¹³Kinya biû ibwagwatire ntheto ya mma, ntheto îmbega îra îbwonokagia. Rîra bwetîgiirie Kîrîstû, Ngai noonaniirie na mma bûrî baake na njîra ya kûbwaa Kîrundu Ûmûtheru kûringana na wîrane bwake.

¹⁴Kîrundu n'we oonanagia wabu ûgu i bu kûrî, mwanka rîra Ngai agaakûûra antû baake rîa mûthia, rîra agaatwa rûgai rwetû. Arookumua Ngai ûra arî mwago.

¹⁵N'ûntû bwa ûgu, kuuma rîra ndeegiirue bûra bwîtîgîîtie Mwathani Yiesû na bûra bwendeete antû ba Ngai bonthe,

¹⁶ntitigaga gûcookeria Ngai nkaatho rîra mbûririkanaga marombaani maakwa.

¹⁷Mbûrombagîra atî, Ngai wa Mwathani wetû Yiesû Kîrîstû, Baaba ûra arî mwago, abwe ûûme bwa gîîkîrundu na abûgwûrîre nkûrûki bûra akari kaingo bûmûmenya bwega.

¹⁸Marombaani maakwa mbûûragia Ngai abûkunûre mathûgaania meenu kaingo bûmenya wîrîgîîro bûra Ngai aabwîtîîre na bûmenya bûra mwago wa rûgai rûra akaa antû baake ûgana.

¹⁹Na indombaga abûmenyithia bûra inya yake îgana îra îrutaga ngûgî ndeni yetû, tiû eetîgîri.

²⁰Inya înu nwa yo îra Ngai aariûkiirie Kîrîstû n'yo na aatûma akara nthî rûteere rwa njara yake ya ûrîo gûku îgûrû.

²¹Gûku i ku Kîrîstû aathanaga arî mûnene kîrî anene bonthe, aathani, mainya monthe, na antû bonthe ba îgweta gûkû nthîgûrû îgiitaani rîrî na rîra rîkaaya.

²²Ngai agaigîîte into bionthe birî wathooni bwa Kîrîstû arî mûnene wa bio n'ûntû bwa kanica. Kîrîstû n'we kîongo gîa kanica.

²³Kanica i mwîrî wa Kîrîstû. Yûyûri Kîrîstû ûra arî kîrî into bionthe.