Read tharaka AEBEESO 2 Bible Online

AEBEESO 2 - tharaka bible

AEBEESO 2

¹Mbereeni bwarî baakuû n'ûntû bwa kûrega kwathîkîra maathana ma Ngai na n'ûntû bwa meeyia meenu.

²Bwatûûraga bûkari ta antû ba nthîgûrû bûkîathîkagîra mûnene wa mainya mara maathanaga maanganyoni. Mûnene ûyu i kîrundu kîra kîrutaga ngûgî antûûni bara baregaga kwathîkîra Ngai.

³Ûgu i bu tiû twinthe twatûûraga tûkari, tûkîathîkagîra mawîrirîîria ma mîîrî yetû. Twarûthaga bûra bunthe mîîrî yetû na mathûgaania meetû meeriragîîria. Na Ngai naathûûraga mûno i tiû ta bûra aathûûragua i bara bangî.

⁴Îndî n'ûntû bwa bûra kîao na wendo bwa Ngai bûrî bûûnene kîrî tiû,

⁵wana kinya ûkeegua itwakuîte n'ûntû bwa kûrega kwathîka gwetû, Ngai naatwere mwoyo bûmwe na Kîrîstû. N'ûtugi bwa Ngai bûtûmîîte bwonokua.

⁶Ngai naatûriûkanîîrie amwe na Kîrîstû, aatûma tûkaranîîra n'we kûra îgûrû n'ûntû tûrî ndeni ya Kîrîstû.

⁷Ngai aarûthire ûgu kwonia nthuke cionthe ira ikaaroo ciiya bûra ûtugi bwake bwingîîte bûgana. Ûtugi bûbu bwonekanaga na mantû meega mara atûrûthîrîte gûkûrûkîîra kîrî Kîrîstû Yiesû.

⁸Bwonokiirue n'ûntû bwa ûtugi bwa Ngai rîra bwetîgiirie Yiesû Kîrîstû. Bûtoonokua n'ûntû bwa mantû meega mara bwarûtha. Wonokio bwenu i kîewa kîa ûtheri kuuma kîrî Ngai.

⁹Na n'ûntû twaka twonokagua i ngûgî imbega ira tûrutaga, muntû atibatîîrue eekumîria bu.

¹⁰I Ngai atûmîîte twîgua tûkari ûgu tûkari. Ngai aatûûmbire tûrî ndeni ya Kîrîstû Yiesû, kaingo tûrûthaga mantû meega ta bûra mûbango wake wakari kuuma tene.

¹¹Bara bûtaaciarwa bûrî Ayaundi, biû bwîragwa n'Ayaundi bûtirî bataane, (îndî ingî gûtaanwa kwao i kwa mwîrî tika kûrî gwa nkoro), bûtikaariganîrueni i bûra bwakari mbereeni.

¹²Mbereeni bwatûûraga bûtaiyî Kîrîstû. Bwarî kwa itha na bûtaataragwa bûrî Aisiraeri, antû ba Ngai. Bûtaataragîrwa irîîkanîrooni na mawîraneeni mara Ngai aarîîkanagîra na bo. Bwatûîre nthîgûrû îno bûtarî na wîrîgîîro na bûtarî na Ngai.

¹³Îndî îîndî n'ûntû bwa nthakame ya Kîrîstû, biû bara bwarî kûraaya ibwareetirwe akubî na Ngai gûkûrûkîîra kîrî Kîrîstû.

¹⁴Kîrîstû naareetire ûkiri kîrî Ayaundi na bara batarî Ayaundi, twatuîka gîntû kîmwe. Noomboraniirie rûthingo rûra rwatwathûranaga, aathiria ûthû bûra twarî na bu.

¹⁵Kîrîstû naathiriirie watho bwa kîîyaundi na maathana ma bu, kaingo Ayaundi na bara batarî Ayaundi atûûmba ndeni yake tûtuîka muntû ûmwe ûmûyerû. Ûgu i bu aareetangire ûkiri kîrî twinthe.

¹⁶N'ûntû bwa gûkua gwake mûtharabaani, Kîrîstû naatûmire Ayaundi na bara batarî Ayaundi tûrî ta muntû ûmwe tweeganua na Ngai, aathiria ûthû bûra twarî na bu.

¹⁷Kîrîstû aayire aareeta ntheto îmbega ya ûkiri kîrî biû bara bûtarî Ayaundi, bara bwarî kûraaya na Ngai, na kîrî biû Ayaundi bwarî akubî n'we.

¹⁸Kwoogu gûkûrûkîîra kîrî Kîrîstû twinthe twaûmba kûthengeera Îthe tûrî Kîrunduuni ûra ûmwe.

¹⁹Kwoogu bûtirî kwa itha na bûtirî ageni kaîrî. Îîndî bûrî atûûri amwe na bara bangî ba Ngai. Bûrî antû ba nyomba ya Ngai

²⁰îra aakîîte mûcingiini rwa atûmwa na iroria. Yiesû Kîrîstû we wengwa n'we iiga rîa koona rîa nyomba înu.

²¹I Kîrîstû agwatithanîîtie nyomba înu yonthe, kaingo îkûra îtuîka nyomba întheru ndeni ya Mwathani.

²²Ngai arîbûtûmîra gwaka ndeni ya Kîrîstû, bûtuîka ara aûmba gûtûura gûkûrûkîîra kîrî Kîrundu wake.