Read tharaka AEBEESO 3 Bible Online

AEBEESO 3 - tharaka bible

AEBEESO 3

¹Gîku i kîo gîtûmaga mbûrombera Ngai, niû, Paûrû, mûthaîkwa wa Kîrîstû n'ûntû bwenu bara bûtarî Ayaundi.

²Na mma ibwîgîîtue bûra Ngai ampete ngûgî ya mwanya ya kûbûtûmîîria.

³Ngai nangwûrîîre kîriga ta bûra mbandîkîîte bûûkai mantû ma kîo baarûani îno.

⁴Bwamîthooma bûkaamenya bûra nciûkîrîtwe i kîriga gîku bûgana mantûûni ma Kîrîstû.

⁵Kîriga gîku gîtaamenyithanîîtue kîrî bara baarî oogo mbere yetû, ta bûra îgiitaani rîrî kîgwûrîrîtwe atûmwa baake baatheru na iroria na njîra ya Kîrundu.

⁶Na kîriga n'atî, bara batarî Ayaundi na bara barî Ayaundi bakeewa rûgai rûmwe gûkûrûkîîra nthetooni îmbega. Tûrî ta icuncî bia mwîrî ûmwe na wîrane bwa Ngai i bwetû twinthe gûkûrûkîîra kîrî Kîrîstû Yiesû.

⁷Niû ndatuîkithiirue mûruti ngûgî wa Ngai ntûmagîîria ntheto îno îmbega, kîrî kîewa kîa mwanya kîra Ngai aampeere kwa inya yake îra îrutaga ngûgî ndeni yakwa.

⁸Wana weegua ndî ûmûniini nkûrûki ya antû bara bangî ba Ngai, i ndeerwe ngûgî îno ya mwanya ya gûtûmîîria ntheto îmbega kîrî bara batarî Ayaundi îgûrû rîa ithaarimo bia gîîkîrundu bitarî mûthia bia Kîrîstû.

⁹Ngai aanthuurire mmenyithania kîriga kîra we Mûûmbi wa bionthe aakarîîte aithîîte kuuma wo tene.

¹⁰Rîarî yerekeeria rîa Ngai amenyithanie gûkûrûkîîra kîrî kanica îgiitaani rîrî tûrî ûûme bwake bwa mîthemba îmingî kîrî aathani na mainya mara maathanaga maanganyoni.

¹¹Na ûyu n'uu warî mûbango wake kuuma tene na tene, ûra aingîîtie ndeni ya Kîrîstû Yiesû, Mwathani wetû.

¹²Tûrî ndeni ya Kîrîstû na tûmwîtîgîîtie tûrî na ûcamba bwa kûthi kîrî Ngai tûtarî na nkanja.

¹³Kwoogu bûtigaakue nkoro i kûnyamaarua gwakwa n'ûntû bwenu. Ndînyamaarua bûteetheka.

¹⁴Gîtûmi gîku i kîo gîtûmaga nturîria Baaba maru, Îthe wa Mwathani wetû, Yiesû Kîrîstû,

¹⁵ûra eete mîgongo yonthe na araîka bonthe mariîtwa.

¹⁶Inkûbûrombera Ngai ûra arî ûtonga bwa kûrigaria, abwîkîra inya nkorooni cienu gûkûrûkîîra kîrî Kîrundu wake ûra arî ndeni yenu.

¹⁷Inkûromba Kîrîstû atûûrage nkorooni cienu n'ûntû bwa wîtîgio bwenu. Inkûbûrombera bwîrikia wendooni na bwakîka rwaraani rwa wendo,

¹⁸kaingo amwe na eetîgîri bara bangî bonthe bûûmba kûmenya bûra wendo bwa Kîrîstû bwaramîîte bûgana, bûra bûraayîîte bûgana, bûra bwîndamîîte bûgana, na bûra bwîtîtie îgûrû bûgana.

¹⁹Bûroomenya wendo bwake kaingo bûûmba kûûyûrwa kûrû n'ûngai, kinya ûkeegua bûtimenyekana bunthe.

²⁰Arookumua Ngai ûra aûmbaga gûtûrûthîra mantû na agakûrûkîîria na kûraaya bûra tûmûûragia atûrûthîre, kana bûra tûthûgaanagia gûkûrûkîîra kîrî inya yake îra îrutaga ngûgî ndeni yetû. Arookumagua i kanica gûkûrûkîîra kîrî Kîrîstû Yiesû magiita monthe tene na tene! Aameni.