Read tharaka AEBEESO 4 Bible Online

AEBEESO 4 - tharaka bible

AEBEESO 4

¹Îîndî inkwenda kûbûkinyîîria ndî nceera n'ûntû bwa Mwathani, bûtûûrage mûtûûrîre ûkwonania bûrî na mwîto wa Ngai.

²Rîonthe îgaguani bwînyiîtie na bûrî abooreeri. Bûtikeegue bûrî antû ba mûthûûro. Onanagiani wendo kîrî bara bangî, kinya bara babûbîtagîria.

³Cûûgiani mûno kûmenyeera ngwatanîro îra Kîrundu areetaga, bûgwatithanîîtue n'ûkiri.

⁴Kûrî mwîrî ûmwe na Kîrundu ûmwe ta bûra bweetirwe i Ngai bwîgua bûrî na wîrîgîîro bûmwe.

⁵Kûrî Mwathani ûmwe, wîtîgio bûmwe na ûbaatithio bûmwe.

⁶Kûrî Ngai ûmwe, Baaba wa antû bonthe. N'we aathaga antû bonthe na n'we arutaga ngûgî na bo bonthe. Atûûraga ndeni yetû twinthe.

⁷Woora ûmwe wacietû n'ûmwe kîewa kîa mwanya kûringana na bûra Kîrîstû atûgaîrîte.

⁸Wata bûra kwandîkîîtwe *Maandîkooni Maatheru, “Rîra eetiirie îgûrû naathaûrire agwate na aapa antû biewa.”

⁹Kuuga Kîrîstû “eetiirie” i kwonania naambîîte aaya gûkû nthîgûrû.

¹⁰Na Kîrîstû wooyu aayire nthîgûrû n'we eetiirie îgûrû kaingo eegua arî gûntû kunthe.

¹¹Kîrîstû n'we wengwa eeyanire biewa bibi kîrî kanica. Bamwe abaa kîewa gîa gûtuîka atûmwa, bangî abatuîkithia iroria, bangî atûmîîria, bangî arîîthi na bangî aarimû.

¹²Eeyanire biewa bibu athuuranîra antû ba Ngai baruta ngûgî yake na aaka kanica ta yo mwîrî wake.

¹³Na kwoogu twinthe tûgaakûra tûkare ûntû bûmwe wîtîgioni bwetû na tûmenye Mwana wa Ngai ûntû bûmwe, mwanka tûtuîke eetîgîri agima tûkare ta Kîrîstû bûra akari.

¹⁴Tûtiîgua tûkari ta twana tûnyi wîtîgioni bwetû. Tûtiigarûkaga mathûgaania îgûrû rîa bûra twîtîgîîtie tweegua ûrutani bwa bara barî ûûme bwa gûkangayia antû, bara beendaga kûbîtithia bara bangî njîra na ûrongo bwao.

¹⁵Ga twîrage antû ûmma na tûbeendage kaingo tûkûra nkûrûki na njîra cionthe tûkare ta Kîrîstû. Kîrîstû n'we kîongo gîa kanica.

¹⁶Kwoogu n'we agwatithanîîtie kanica, ta yo mwîrî wake. Mwîrî ûgwatithanîîtue amwe i tûrûngo mwanya mwanya, tûra Ngai acuûmbîrîte. Rîra tûcuncî tunthe tûkûruta ngûgî ya tu, kanica yonthe nîkûraga îkagîa inya, antû bakîonanagia wendo.

¹⁷Riîtwaani rîa Mwathani ndîbwîra bûtigaakare ta bara bataiyî Ngai. Mathûgaania maao maûyûri mantû ma ûtheri,

¹⁸i mwindu ûrî ku. Batitaragîrwa mwoyooni ûra Ngai eeyanaga, n'ûntû gûtirî kîo baiyî, ibaûmagia biongo.

¹⁹Bationaga mantû maathûûku mara barûthaga ta ûntû. Ibeetîîyîîre gûtirî ûntû boonaga bataagîrîtwe barûtha. Barîrûtha mantû ma rûko ma mîthemba yonthe bakîîriragîîria kûthi na mbere kûmarûtha.

²⁰Îndî biû rîra bwatuîkire eetîgîri ndeni ya Kîrîstû bwarutanirwe mûtûûrîre ûngî wa mwanya na ûyu.

²¹Na mma ibwiyî mantû ma Yiesû monthe na ibwarutanirwe ûmma bwake.

²²Kwoogu bûtikeegue bûrî ba mûkarîre ûra bwatûûraga mbereeni. Mûkarîre wenu warî wa mîtugo ya mawîrirîîria maathûûku, ma ûrongo, mara maabwînyangagia.

²³Erûuani mathûgaania meenu,

²⁴bwonanie kûgarûka kwa mûkarîre wenu wa wagîru bwa mma, na ûtheru bwa mma.

²⁵Kwoogu, bûtikaarie ûrongo. Îranagaani ûmma n'ûntû twinthe tûrî tûcuncî twa mwîrî ûmwe.

²⁶Bûtikaareke mûthûûro ûtûma bwîyia. Bûtikaareke riûa rîthûa bûthûûri.

²⁷Bûtikaanenkere Nkoma kaanya ga gûtûma bwîyia.

²⁸Mwamba natige kwiya. Narute ngûgî oone mbia kaingo aûmba gûteethia bara bakwenda ûteethio.

²⁹Bûtikaaragieni mîgambo îtaagîrîte. Bunthe bûra bûkaaragia ibwîgue bûrî ûntû bwega, ûntû bûûmba gûteethia muntû wonthe ûra ûkaabwîgua.

³⁰Bûtikaathûûrie Kîrundu Ûmûtheru ta we rwano rwa kwonania bûgaakûûrwa wîyiani ntugû ya mûthia.

³¹Bûtikeegue bûrî antû ba marûrû. Na bûtikeegue bûrî antû ba mûthûûro, na bûtikaagondokagîre antû. Bûtikaarume antû. Na nwa mwanka bwîgue bûtarî na rûmena rwa mûthemba nwa ûrîkû.

³²Nwa mwanka bûteethanagie na bwîganague kîao. Rekanagîraani ta bûra Ngai aabûrekeere ndeni ya Kîrîstû.