Read tharaka AEBEESO 5 Bible Online

AEBEESO 5 - tharaka bible

AEBEESO 5

¹Tuatiani Ngai n'ûntû bûrî aana baake bara eendeete.

²Karagaani bwendeene ta bûra Kîrîstû aatwendire, aakua n'ûntû bwetû arî kîgongwana, Ngai eetîgîîria akeneete.

³Gûtikeegue kûrî na ûmaramari, mantû mataagîrîte kana wîrirîîria gatîgatî keenu. Wana kûgweta bûtikaagwete mantû mama n'ûntû biû bûrî antû baatheru ba Ngai.

⁴Bûtikaagwete mantû ma nthoni, ma waa, kana mathee matarî meega. Mantû ta mama matiagîrîte kîrî biû. Îndî bûbatîîrue bûcookagîria Ngai nkaatho.

⁵Menyaani bwega gûtirî we akaathi ûneneeni bwa Kîrîstû na Ngai arî mûmaramari, kana arûthaga mantû mataagîrîte, kana arî mwîrirîîria (n'ûntû wîrirîîria bûthûkagia kaanya ka Ngai).

⁶Muntû atikaabweneerie na rwaria rwa waa n'ûntû Ngai akoonania mûthûûro wake kîrî bara batamwathîkagîra, bara barûthaga mantû ta mamu.

⁷Kwoogu bûtikaagwatanîre na bo bûrûtha mantû mara barûthaga.

⁸Bûratûûraga mwinduuni, îndî îîndî bûrî werûûni ndeni ya Mwathani. Kwoogu karaani ta aana ba werû.

⁹Maciaro ma werû bûbû i mîthemba yonthe ya wega, wagîru na ûmma.

¹⁰Geriani kûmenya mantû mara makenagia Mwathani.

¹¹Bûtikaagwetanîrueni na mantû ma ûtheri ma mwindu. Gondokagîraani bara bamarûthaga.

¹²Bûrî nthoni kinya kûgweta mantû mara antû bara bataiyî Ngai barûthagîra withooni.

¹³Mantû mara barûthaga maumîra werûûni i rîo ûthûûku bwa mo bwonekaga,

¹⁴n'ûntû werû ibûtûmaga mantû monthe mamenyeka. Na i ntûma kwîrîîtwe, “Ûka, woû ûmaami, riûka uume kîrî bara bakuû, na Kîrîstû agakûmûrîkîra.”

¹⁵Kwoogu îmenyeereeni mûno mûtûûrîreeni wenu. Bûtigaakareeni ta bia. Karagaani ta antû baûgî.

¹⁶Tûmagîraani îgiita rîenu bwega, n'ûntû ntugû ino i ntugû cia ûthûûku.

¹⁷Kwoogu bûtigaakare ta bia. Ciûragaani bûra Mwathani eendaga bûrûtha.

¹⁸Bûtigaatogoone i ncoobi n'ûntû ntogoona nîtûmaga muntû arûtha mantû mataagîrîte. Ûyûragwaani i Kîrundu.

¹⁹Aranagîriani na cabuurî, nyîmbo cia Ngai na nyîmbo cia gîîkîrundu. Inaani bûkumie Mwathani nkorooni cienu.

²⁰Cookagîriani Ngai Baaba nkaatho n'ûntû bwa mantû monthe riîtwaani rîa Mwathani wetû, Yiesû Kîrîstû.

²¹Woora muntû neenyithagie kîrî ûra ûngî n'ûntû bwa gûtîîya Kîrîstû.

²²Eekûrû, înyithagieni kîrî arûme beenu ta bûra bwînyithagia kîrî Mwathani.

²³N'ûntû mûrûme n'we kîongo kîa mwekûrû wake ta bûra Kîrîstû arî kîongo gîa kanica. Kanica i mwîrî wa Kîrîstû, Mwonokia wa uu.

²⁴Ta bûra kanica îînyithagia kîrî Kîrîstû, i ta bu eekûrû babatîîrue beenyitha kîrî arûme baao mantûûni monthe.

²⁵Naabi, arûme, endagaani eekûrû beenu ta bûra Kîrîstû eendire kanica eeruta, aakua n'ûntû bwa yo.

²⁶Kîrîstû aarûthire ûgu amîtuîkithia întheru, amîthambia na rûûyî na njîra ya kiugo.

²⁷Na gîtûmi gîake kûrûtha ûgu, eendaga kwîrûthîra kanica îrî mwago, îtarî karanga, îtarî nkûnjaru, kana îkari ûntû nwa bûrîkû ta bûbu kaingo îîgua îrî ntheru na îtarî na îbîtia.

²⁸Ûgu i ta bu arûme babatîîrue beenda eekûrû baao, ta bûra beendeete mîîrî yao bongwa. Rîra mûrûme eendeete mwekûrû wake n'we wengwa eebeendaga.

²⁹Gûtirî muntû ameneete mwîrî wake. Muntû nareraga na akamenyeera mwîrî wake. Ûgu i ta bu Kîrîstû amenyagîîra mwîrî wake, ta uu kanica.

³⁰Tiû tûrî icuncî bia mwîrî wake.

³¹Ta bûra kwandîkîîtwe *Maandîkooni Maatheru, “N'ûntû bwa gîtûmi gîku muntû mûrûme agaatiga îthe na gina, agwatithanue na mwekûrû wake, na barî baîrî batuîke mwîrî ûmwe.”

³²Gîku i kîriga kîînene kîra niû mbonaga gîkari ta Kîrîstû na kanica.

³³Kwoogu wakîra ûmwe wacienu nabatîîrue eenda mwekûrû wake ta bûra eebendeete wengwa. Mwekûrû n'we nabatîîrue atîîya mûrûme wake.