Read tharaka APIRIPI 1 Bible Online

APIRIPI 1 - tharaka bible

APIRIPI 1

¹I tiû Paûrû na Timotheo tûkûbwandîkîra baarûa îno, tûrî aruti ngûgî ba Yiesû Kîrîstû. Tûrîbwandîkîra biû antû ba Ngai bûrî Piripi, atongoria beenu na ateetheeria bara bûrî ndeni ya Kîrîstû Yiesû.

²Ngai Baaba na Mwathani wetû Yiesû Kîrîstû baroobwaa ûtugi na ûkiri.

³Magiita monthe rîra mbûririkanaga incookagîria Ngai wakwa nkaatho.

⁴Na rîonthe rîra mbûrombagîra, mbûrombagîra bwinthe nkeneete,

⁵n'ûntû bwa bûra bûnteetheetie ngûgîîni ya gûtûmîîria ntheto îmbega kuuma ntugû îra bwamîîtîgîîre mwanka îîndî.

⁶Ngûgî îra Ngai aanjîîrie ndeni yenu i ngûgî îmbega. Na ndî na mma Ngai akaathi na mbere n'yo mwanka îthire, rîra Kîrîstû agaacooka.

⁷Imbagîîrue kwîgua ûgu îgûrû rîenu bwinthe, n'ûntû imbwendeete mûno. Ibûnteetheetie ngûgîîni îno ya mwanya, îra Ngai ampete nduta. Ibwanteethiirie kûrûîrîîra ntheto îmbega twonania n'ya mma na ibûgûnteethia ndî niû îîndî ndî nceera.

⁸Ngai naiyî n'ûmma nkwaria inkwenda kûbwona bwinthe n'ûntû imbwendeete na wendo bwa Kîrîstû Yiesû.

⁹Îromba rîakwa rîra nkûbûrombera i rîrî, atî wendo bwenu bûthi na mbere kwingîa, bwîgue bûrî na ûmenyo bunthe,

¹⁰na bûmenye kûthuura bûrûthage mantû mara meega kîrî monthe. Rîru i rîo bûgaatuîka antû baatheru, na batarî na mabîtia mwanka rîra Kîrîstû agaacooka.

¹¹Na i rîo bûgaatuîka antû bakûrûthaga mantû maingî meega gûkûrûkîîra kîrî Yiesû Kîrîstû. Bwarûtha ûgu bûkoonania ibûgûtîîya Ngai na ibûkûmûkumia.

¹²Aruayia na aarayia, ndîenda bûmenya mantû monthe mara ndarûthîîrwe imaateethiirie ntheto îmbega yatamba.

¹³Acikaarî na antû bara bangî bonthe ba nyomba ya mûnene ibaiyî nthaîkîîtwe n'ûntû ndî mûthingati wa Kîrîstû.

¹⁴Na n'ûntû bwa kûthaîkwa gwakwa, eetîgîri baingî ibagîîte ûcamba mûno na batigûkuthûka gûtûmîîria ntheto cia Ngai.

¹⁵I mma antû bamwe batûmagîîria mantû ma Kîrîstû barî na rûriitho na bakîthetanagia. Îndî kûrî bara batûmagîîria n'ûntû bwa wendi bûra barî na bu.

¹⁶Na barûthaga ûgu na wendo, n'ûntû ibaiyî i Ngai ampete ngûgî ya kûrûîrîîra ntheto îmbega.

¹⁷Îndî kûrî babu batûmagîîria mantû ma Kîrîstû barî na itûmi bitarî biega. I bo bakwenda kûndeetera thîîna îîndî ndî nceera.

¹⁸Îndî nwîgue barîtûmîîria n'ûntû bwa itûmi biega kana biithûûku, bûbu t'ûntû. Bûra bûrî na gîtûmi n'atî, ntheto cia Kîrîstû nigûtûmîîrua na njîra cionthe. Kwoogu ingûkena na nkaathi na mbere gûkena.

¹⁹N'ûntû bwa maromba meenu na ûteethio bûra buumaga kîrî Kîrundu wa Yiesû Kîrîstû, ndî na mma nkaatharua mbuume nceera.

²⁰Ndî na wîrîgîîro bûûnene mûno atî, kîrî bûra bunthe ndûthaga, gûtirî rîo nkaarûtha ûntû bwa kûmbîkîra nthoni. Na ûgu i bu nkaraga mbîrîgîîrîîte. Wîrîgîîro bwakwa n'atî, ngaakaraga na ûcamba bwingî mûno îîndî na magiita monthe, mbonanagie na mantû mara ndûthaga bûra Kîrîstû arî ûmûnene, nwîgue ingaatûûra mwoyo kana inkaûragwa.

²¹Weegua ngaatûûra mwoyo ngatûûrîra Kîrîstû. Naka na ngakua nwa baita.

²²Ndathi na mbere gûtûûra, ûkeegua ndî na kaanya ga kûthi na mbere kûrutîra Mwathani ngûgî. Kwoogu ntithuura.

²³Kîrî mantû mamu marî maîrî, ntiuga i bûrîkû bwega. Inkwenda gûtigana na ûtûûro bûbû mbîgue ndî amwe na Kîrîstû. Na ûgu i bu bwega mûno.

²⁴Îndî kwîgua ndî mwoyo ndeni ya mwîrî kûrî gîtûmi mûno kîrî biû.

²⁵Na ndî na mma ûgu i bu gûgaakara. Kwoogu, nkeegua ndî amwe naabi bwinthe mbûteetheerie bûkûre, bûkeneere wîtîgio bwenu.

²⁶Rîra nkauma gûkû mbûye, bûkeegua bûrî na itûmi biiganu bia gûnkeneera[1] n'ûntû bwa mantû mara Kîrîstû Yiesû arûthîîte naani.

²⁷Îndî wana ndakara ata, bûtikaariganîrueni i gûkaraga mûkarîre ûra ûgaatûma ntheto îmbega ya Kîrîstû îtîîywa. Kwoogu ndaaya kûbwona kana ndaremwa kûûya, ndeenda kwîgua ibûrikîîte wîtîgioni bûgwatanîrîte. Ndeenda kwîgua bûrîrûîrîîra wîtîgio bûra tûrî na bu kuumania na ntheto îmbega bûgwatanîrîte.

²⁸Bûtikaamakue n'anthû beenu ûntûûni kinya bûrîkû. Ûcamba bwenu i bu bûgaatûma bamenya i bo bakaathirua, biû bwonokue. Na i Ngai akaarûtha ûgu.

²⁹Ngai atibûthaarimîîte na kaanya ga gwîtîgia Kîrîstû gonka. Abûthaarimîîte kinya na kaanya ga kûnyamaarua n'ûntû bwa Kîrîstû.

³⁰Ibwoneete bûra nnyamaarîîtue bûgana n'ûntû bwa Kîrîstû. Na ibwîgîîtue wana îîndî nwa nkûnyamaarua. Îndî na wana biû ibûkûnyamaarua nkînyamaarua.