Read tharaka APIRIPI 4 Bible Online

APIRIPI 4 - tharaka bible

APIRIPI 4

¹Eendwa, aruayia na aaraayia, inkwenda twonana mûno. Ndîenda twonana n'ûntû ibûnkenagia mûno na indîîkumagîria biû. Eendwa, karagaani bwîrikîîtie wîtîgioni bwenu kîrî Mwathani.

²Ndeenda eekûrû babu baîrî, Euondia na Sintike beeganua n'ûntû i ba Mwathani.

³Woû tûrutaga ngûgî naawe, ingûkûûria ûteethie eekûrû babu, woû mwîtîgua. Itwarutîîte ngûgî ya gûtambia ntheto îmbega na bo na inya mûno tûrî na Kîrementi na bara bangî twarî na bo. Mariîtwa maao imaandîke îbukuuni rîa mwoyo.

⁴Rîonthe karagaani bûûyûrîîtwe i gîkeno ndeni ya Mwathani. Na ka mbwîreeni kaîrî, ûyûragwaani i gîkeno!

⁵Îgaguani bûrî abooreeri kîrî antû bonthe. Na bûtikaariganîrueni Mwathani neengeerie kûûya.

⁶Bûtikaamakue n'ûntû nwa bûrîkû, rombagaani rîonthe thîîna yaya. Îragaani Ngai mara bûkwenda abûrûthîra. Cookagîriani Ngai nkaatho rîra bûkûromba.

⁷Bwarûtha ûgu bûkoona ûkiri kuuma kîrî Ngai, ûkiri bûra bûtamenyeka bûra bûgana na mathûgaania ma muntû. Na ûkiri bûbu bûkaamenyeera nkoro cienu na mathûgaania meenu ndeni ya Kîrîstû Yiesû.

⁸Nkîthiria, aruayia na aarayia, ka mbwîreeni ûûgû—thûgaanagîriani mantû ma mma, na mara meetîgîîrîkîîte, na mara maagîrîte, na mara matheru, na mara mathongi na mara marî îgweta. Thûgaanagîriani mantû mara meega, na mara maagîrîte gûkaathwa.

⁹Rûthagaani mantû mara bwerutanire bwamagwata kuumania naani, mara bweegiirue nkiuga na bwona nkîrûtha. Bûkarûtha ûgu Ngai wa ûkiri akeegua arî amwe naabi.

¹⁰Mwathani natûmîîte nkena mûno n'ûntû bwa bûra bûcookeete gûnteethia kaîrî. Imbiyî gûtirî rîo bwandiganîrua, îndî bantû a kagiita kagana ûna bûtaarî na kaanya ga kûmbonia bûtindiganîrîtue.

¹¹Na ntikuuga ûgu n'ûntû ndî na thîîna. Indeerutanire kûganîrwa i bira ndî na bio.

¹²Imbiyî bûra gûkari muntû arî na biiniini kana arî na biingî. Indîîrutanîîte witho bûbu bwa kûganîrwa mbai kana ndî na yûûra, ndî na biingî kana biiniini.

¹³Kwa inya ya Kîrîstû gûtirî ûntû ntaûmba kûrûtha.

¹⁴Ibwarûthire bwega bwanteethia mathîînaani maakwa.

¹⁵Biû bwingwa ibwiyî nkuuma gûtûmîîria ntheto îmbega gîteere kîa Macendonia ntugûûni cia mbere, gûtirî kanica îngî yanteethia împa gîntû, tatiga biû Apiripi. Twatumîîte ûnyanya bwa kwewa na kweyana.

¹⁶Rîra ndarî Thesaronike ibwantûmîîre ûteethio maita magana ûna.

¹⁷Na ntikuuga ûgu n'ûntû bwa kwenda bûntûmagîra biewa. Ga nkwenda bûthaarimwa n'ûntû bwa bûra bûndûthîrîte.

¹⁸Îîndî ndî na bia kûgana na biakûrûkîîria! Ndî ûmûganîre mûno nkûrûki i biewa bira bwanenkeere Epabironditas aandeetera. Biewa bienu bikari ta kîgongwana kîrî mûcinko ûrî mûrîo, kîra Ngai eetîgîîrîîtie na gîkûmûkenia.

¹⁹Ngai ûra ntûmîkagîra akabwaa bionthe bira bûrî bata na bio. Arî ûtonga bwa kûrigaria ndeni ya Kîrîstû Yiesû.

²⁰Ngai Baaba wetû arookumagua tene na tene. Aameni.

²¹Nkeetheriani woora ûmwe wa antû ba Ngai ndeni ya Kîrîstû Yiesû. Aruayia bonthe bara tûrî na bo naaga bakûbûkeethia.

²²Bûgûkeethua n'antû ba Ngai bonthe bara barî naaga, na mûno mûno, n'aruti ngûgî ba Kaisaarî.

²³Ûtugi bwa Mwathani wetû Yiesû Kîrîstû bûrookaraga naabi.