Read tharaka AKOROSAI 1 Bible Online

AKOROSAI 1 - tharaka bible

AKOROSAI 1

¹I niû Paûrû nkûbwandîkîra tûrî na mûruayia wetû Timotheo. Ntuîkithîîtue mûtûmwa wa Kîrîstû Yiesû wata bûra kwarî kwenda kwa Ngai.

²Tûbwandîkîrîte biû antû ba Ngai bûtûîre Korosai. Bûrî aruayia na aarayia eetîgua ndeni ya Kîrîstû. Ngai Baaba wetû aroobwaa ûtugi na ûkiri.[1]

³Rîra tûbûrombagîra, rîonthe itûcookagîria Ngai nkaatho, Îthe wa Mwathani wetû Yiesû Kîrîstû,

⁴n'ûntû itwîgîîtue bûra bwîtîgîîtie Kîrîstû Yiesû na bûra bwendeete antû bonthe ba Ngai.

⁵Bûrûthaga ûgu n'ûntû bwa kwîgua bûrî na wîrîgîîro bwa kîra bwaigîrîtwe îgûrû. Na wîrîgîîro bûbu, i bûra bweegiirue kuuma wo rîra bwatûmîîrue ntheto îmbega ya mma.

⁶Ntheto înu îmbega bwatûmîîrue nîtambîîte nthîgûrû yonthe, yagarûra mîoyo ya antû gûntû kunthe ta bûra yabûgarûrire bûkûmîîgua rîa mbere, bwamenya ûmma bwa ûtugi bwa Ngai.

⁷Bwarutanirwe ntheto îmbega i mwendwa Epabaras, mûruti ngûgî wa Ngai amwe naati. Epabaras i mwîtîgua ngûgîîni ya Kîrîstû îra akûmûrutîra naaga bantû eenu.

⁸N'we aatûmenyithiirie bûra Kîrundu atûmîîte bwîgua bûrî na wendo bûgana.

⁹N'ûntû bwa ûgu, tûkwîgua mantû meenu wana tiû itûbûrombagîra rîonthe. Tûrombaga Ngai atûme bûmenye bunthe bûra eendaga. Na itûmûûragia abwe ûûme bunthe na atûme bûmenye mantû ma gîîkîrundu.

¹⁰Rîru mûtûûrîre wenu ûkeegua ûkîonania bûrî antû ba Mwathani na bûkamûkenagia na njîra cionthe. Bûkaathi na mbere kûrûtha mantû meega ma mîthemba yonthe na bûkeerutana kûmenya Ngai nkûrûki.

¹¹Marombaani meetû itûûragia Ngai abwongeere kwa wingî inya yake îrî mwago kaingo bwetagîîra na bûûmagîîria mantû monthe bûkeneete

¹²bûgîcookagia nkaatho kîrî Baaba. N'we aatûmire twona rûgai ûneneeni bwa werû bûra athuuranîrîte antû baake.[2]

¹³Naatûrutire inyaani ya ûra aathanaga mwinduuni atwira ûneneeni bwa Mwana wake ûra eendeete mûno.

¹⁴Ngai aatûkûûrire na Mwana wake atûrekera meeyia meetû.

¹⁵Kîrîstû atuatîîtie Ngai ûra atooneka na meetho, na i mûnene mûno kîrî biûmbe bionthe.

¹⁶Into bionthe bia îgûrû na bia nthîgûrû biaûmbirwe n'we. Bira bionagwa na bira bitoonagwa, anene, aathani, atongoria, na bara barî na watho baûmbirwe n'we. Into bionthe biaûmbirwe gûkûrûkîîra kîrî we na birî oogo n'ûntû bwake.

¹⁷Kîrîstû nwa aarî oogo wana mbere ya into biûmbwa na n'we abitûîrie bionthe.

¹⁸Kîrîstû n'we kîongo gîa kanica, kanica i mwîrî wake. N'we mwambia. Aariûkire arî wa mbere kaingo eegua arî mûnene wa mantû monthe.

¹⁹I Ngai eendire bûra bunthe akari bûtûûra ndeni ya Kîrîstû.

²⁰Na gûkûrûkîîra kîrî Kîrîstû, Ngai naathiriirie ûthû bûra aarî na bu na antû. Aareetire ûkiri kîrî into bionthe bia îgûrû na bia nthîgûrû n'ûntû bwa nthakame ya Kîrîstû îra yeetîgire mûtharabaani.

²¹Bûtikaariganîrueni kûrî rîra bwarî aaraaya na Ngai. Bwarî anthû baake n'ûntû bwarî na mathûgaanio maathûûku na bwarûthaga mantû maathûûku.

²²Îndî îîndî Ngai nabûtumîîte ûcoore gûkûrûkîîra kîrî gîkuû gîa Kîrîstû arî mwîrîîni wa kîîmuntû. Na Kîrîstû aarûthire ûgu kaingo abwira kîrî Ngai bûrî baatheru, bûtarî na mabîtia, na bûrî na riîtwa rîega.

²³Îndî ingî nwa mwanka bûthi na mbere kwîgua bûrî na wîtîgio bwîbandîîte kîrî bu bwarika. Bûtikeenyenye buuma wîrîgîîrooni bûra bwagîîre na bu rîra bweegiirue ntheto îmbega. Ntheto îno îmbega nîtûmîîrîîtue nthîgûrû yonthe. Na niû Paûrû, Ngai nanthuurîîte ntuîka mûruti ngûgî wake n'ûntû bwa yo.

²⁴Inkeneete i bûra nnyamaaraga n'ûntû bwenu nkîûyûrîîria kûnyamaara kûra mwîrî wa Kîrîstû ûbatîîrue ûnyamaara kinya îîndî. Mwîrî wa Kîrîstû i kanica. Na mathîîna mama mwîrî wakwa wonaga, wonaga mo n'ûntû bwa kanica.[3]

²⁵Ngai aantuîkithiirie mûruti ngûgî ya kanica mbingia mwîto ûyu na kûbûtûmîîria kiugo gîake.[4]

²⁶Mûbango ûyu wa Ngai kîrî biû bûtarî Ayaundi warî kîriga kuuma îgiita rîa antû ba tene. Antû bataumenya n'ûntû warî ûmwithe. Îîndî i rîo Ngai augwûrîrîte antû baake.

²⁷Îndî Ngai neendire kûmenyithia antû bûra kîriga gîku kîrî ithaarimo birî mwago ûgana kîrî bara batarî Ayaundi. Na kîriga gîku i kwîgua Kîrîstû ûra bwîrîgîîrîîte kwîgua bûrî amwe n'we mwagooni wake, arî ndeni yenu.

²⁸Tûtûmagîîria antû bonthe Kîrîstû. Tûbakaanagia na tûkabarutana na ûûme bunthe kaingo tûbanenkanîra kîrî Ngai barî eetîgîri baûyûru ndeni ya Kîrîstû.

²⁹Na kûng'ang'anaani kûra nng'ang'anaga na ngûgî îno, n'inya înene ya Kîrîstû îrutaga ngûgî naani.