Read tharaka AKOROSAI 2 Bible Online

AKOROSAI 2 - tharaka bible

AKOROSAI 2

¹Inkwenda bûmenya bûra nng'ang'anaga na njîra ya maromba n'ûntû bwenu, n'ûntû bwa kanica ya Raondisia, na n'ûntû bwa kinya bara bataambona.

²Ndûthaga ûgu kaingo mbwîkîra wîru bwinthe na kaingo bûgwatithanua i wendo. Ndîenda bûciûkîrwa kûrû, bûmenya kîriga kîa Ngai kîra gîkoneetie Kîrîstû.

³Mantû marî gîtûmi monthe ma ûûme na ma ûmenyo marî kîrî Kîrîstû.

⁴Ndîbwîra ûgu kaingo bûteeneerua i muntû na mîgambo ya ûrongo wana weegua bûkîmîîgua îkeeguîka taka îrî îmîega.

⁵Wana weegua ntirî akubî naabi tûrî amwe gîînkoro. Na inkenaga rîra mbîgagua mûkarîre wenu n'ûmwega na atî wîtîgio bwenu kîrî Kîrîstû i bûûriku.

⁶Kwoogu n'ûntû ibwetîgîîre Yiesû Kîrîstû arî Mwathani wenu, karagaani ta we.

⁷Îbandeeni kîrî Kîrîstû bûkûre bûrî na wîtîgio bûûriku, wata bûra bwarutanirwe. Na cookagîriani Ngai nkaatho inyingî mûno.

⁸Muntû atikaabûte na ûûme kana na ûrutani bwa ûrongo bûtarî ara bûrî. Ûûme ta bûbu kana ûrutani ta bûbu bûtiumanagia na Kîrîstû, buumanagia na kîîwîthîre gîa antû kûringana na moorutani ma kîînthîgûrû.

⁹Kîrîstû i muntû arî na bûra bunthe Ngai akari ndeni yake.

¹⁰N'we mûnene wa anene bonthe na wathani bunthe. Na ndeni yake bûûyûrîîtwe n'ithaarimo bionthe bia gîîkîrundu.

¹¹Bûgwîtîgîra Kîrîstû i taka bwataanirwe. Bûtaataanwa bûra antû bataanagwa na kayiû. Bwataanirwe rûtaano rwa gîîkîrundu, ta ru rûtaano rwa gîîkîrîstû, bwatigana na mantû maathûûku ma kîîmwîrî.

¹²I taka bwathikanîîrue amwe na Kîrîstû kûbaatithuani kwenu na kûbaatithuani gûku bwariûkanîrua amwe n'we n'ûntû bwa gwîtîgia inya înene ya Ngai ûra aamûriûkiirie.

¹³Mbereeni bwarî baakuû n'ûntû ibwarî na meeyia na bûtaarî bûkûthirua mantû maathûûku ma kîîmwîrî. Îndî îîndî Ngai nabûrekerete meeyia meenu monthe na abwaa mwoyo amwe na Kîrîstû.

¹⁴Mawatho mara maandîke imaarûire naati matûgiitîra îgamba. Îndî na njîra ya kwambwa amwe na Kîrîstû mûtharabaani îgamba rîra twaandîkîrîtwe Ngai nabuutîîte rîo.

¹⁵Agu noogo Kîrîstû aacindîîre anene na aathani ba Nkoma abeekîrithia nthoni mbere ya mwingî akûbathiria inya rîra aambirwe.

¹⁶Muntû atikaabwîkîîre watho îgûrû rîa irio bira bûrîyaga, biakûnyua bira bûnyunyaga, biatho, kûyiûka kwa mweri, kana ntugû ya *Sabatû.

¹⁷Mantû ta mamu monthe n'irundu bia ûntû bungwa bûra bwayire nyumaani. Na Kîrîstû n'we ûntû bûbu.

¹⁸Antû bamwe beendaga gwîtuîkithia antû abooreeri. Barombaga araîka na baaragia bûra booneete bioneki. Antû ta babu batikaabûrute mabîtia babwîra îbûbîtagia n'ûntû bûtirûthaga ûgu barûthaga. Beekumagia mana kuumania na mathûgaania maao maathûûku,

¹⁹na batirikîîte kîrî Kîrîstû. Kîrîstû n'we kîongo kîa mwîrî ta uu kanica. N'we areraga mwîrî na n'we agwatithanîîtie tûrûngo mwanya mwanya amwe na mîkiia. N'we akûragia mwîrî kûringana na bûra Ngai akwenda.

²⁰Ibwakuyanîîrie na Kîrîstû abûtigithania na moorutani ma antû. N'ata îîndî kaîrî bûgûcooka kîrî maathana ma kîînthîgûrû mara maugaga,

²¹“Ûtikaagwate gîkî,” kana “Ûtikaarîe kîna,” kana “Ûtigaatonge kîna”?

²²Maathana ta mamu makoneetie into bira bithiraga biatûmîka. I maathana na moorutani matuîtwe n'antû.

²³Kwathîkîra maathana ta mamu gûkaraga ta kûûmea n'ûntû muntû kûmaathîkîra nwa mwanka eerute, eegue arî muntû mûbooreeri na eemenyeereete mûno mantûûni ma kîîmwîrî. Îndî tika mantû ta mamu maûmba mûtugo wa kîîmuntû, ta uu wa wîyia.