Read tharaka AKOROSAI 3 Bible Online

AKOROSAI 3 - tharaka bible

AKOROSAI 3

¹Woona bwariûkanîîrue amwe na Kîrîstû, mworooto wenu nwîgague ûrî wa mantû mara marî îgûrû kûra Kîrîstû akari nthî rûteere rwa njara ya ûrîo ya Ngai.

²Bûtikaathûgaanagîrieni mantû ma aaga nthîgûrû. Thûgaanagîriani mantû ma îgûrû,

³n'ûntû ibwakuyanîîrie na Kîrîstû mwoyo wenu waigwa kîrî we ndeni ya Ngai.

⁴Rîra Kîrîstû akoonanua, ta we mwoyo wenu, wana biû bûkoonanua amwe n'we mwagooni.

⁵Kwoogu karagaani taka bûrî baakuû kîrî mantû ma kîînthîgûrû: mantû ta ûmaramari, mantû ma rûko, na bata ya kûrûtha mantû maathûûku. Bûtikeerirîîrie into bia antû kwîrirîîria gûku kûthûkia kaanya ka Ngai.

⁶Ngai agaakaanûkia bara batamwathîkagîra, bara barûthaga mantû ta mamu.

⁷Wana biû mbere bûtuîka eetîgîri ibwarûthaga mantû ta mamu.

⁸Îndî îîndî bûtibatîîrue bûthûûra, kana bwîgua bûrî antû ba marûrû, kana bûrûtha ûthûûku, kana bûrumana kana bwaria mantû ma nthoni.

⁹Na bûtibatîîrue bûrongoania n'ûntû ibwatiganire na mîtugo îmîthûûku îra bwatûûraga n'yo mbereeni.

¹⁰Îîndî bûtûûraga bûrî antû ba mûtugo ûngî ûra uumanagia na Ngai.[5] Athiîte na mbere akîbûgarûraga meeciiria kaingo bûthi bûkîgarûkaga bûkara ta we.

¹¹Mûtûûrîreeni ûyû, gûtirî mwanya kaîrî wa Mûyaundi na ûra atarî Mûyaundi. Gûtirî kuuga ûyû n'ûmûtaane na ûyû ti mûtaane. Kana îno i nkombo na ûyû ti nkombo. Na kîthoomo ti kîo kîrî gîtûmi mûno. Kîrîstû wenka n'we arî gîtûmi na arî ndeni yetû twinthe.

¹²Biû bûrî antû ba Ngai bara aathuurire. Bûrî baatheru na bûrî eendwa baake. Kwoogu îgaguani bûrî na nkoro cia kwîganagîîrua kîao. Îgaguani bûrî antû ba kûrûthaga mantû meega na ba kwînyithia, bûrî antû ba ûkiri na bûkîûmagîîria mantû.

¹³Inyîkanagîriani na rekanagîraani bwabîtanîria. Wata bûra Kîrîstû aabûrekeere, wana biû ibûbatîîrue bûrekagîra bara bangî babûbîtîria.

¹⁴Na nkûrûki ya mantû monthe endanagaani n'ûntû wendo i bu bûtûgwatithanagia kûrû.

¹⁵Nkoro cienu iciûyûrwe n'ûkiri bwa Ngai n'ûntû Ngai aabwîtire bûkaraga na ûkiri ta tûcuncî twa mwîrî ûmwe. Na rîonthe cookagîriani Ngai nkaatho.

¹⁶Kiugo gîa Kîrîstû ikîbûûyûre nkorooni cienu. Tûmagîraani ûûme bunthe bwîrutanage na bweyanage ûkûrû bwingwa. Inagaani cabuurî, nyîmbo cia Ngai, na nyîmbo cia gîîkîrundu bûgîcookagîria Ngai nkaatho nkorooni cienu.

¹⁷Mantû monthe mara bûkaarûthaga, kana mara bûkaaragia, marûthageeni riîtwaani rîa Mwathani Yiesû bûgîcookagîria Ngai Baaba nkaatho gûkûrûkîîra kîrî Yiesû.

¹⁸Biû eekûrû, înyithagieni kîrî arûme beenu n'ûntû i bu kwagîrîte kîrî bara beetîgîîtie Mwathani.

¹⁹Naabi arûme, endagaani eekûrû beenu. Bûtikaabeegue marûrû.

²⁰Naabi aana, athîkagîraani aciari beenu mantûûni monthe, n'ûntû ûgu i bu Mwathani akenagîîra.

²¹Naabi beethe ba aana, bûtikaathûûrie aana beenu baaya gûkua nkoro.

²²Naabi nkombo, athîkagîraani anene beenu ba aaga nthîgûrû mantûûni monthe. Na ti kuuga bûbaathîkagîre warîra babûrûngamîîrîîte kaingo bûbakenia. Baathîkagîreeni na nkoro imbega bûgîkuthûkaga Ngai.

²³Barutagîreeni ngûgî mantûûni monthe bûrî na nkoro imbega ta Mwathani bûkûrutîra ngûgî na t'antû.

²⁴Wata bûra bûkûmenya bûkeewa rûgai i Mwathani rûrî kîewa. Ririkanagaani atî, i Mwathani Kîrîstû bûkûrutîra ngûgî.

²⁵Muntû wonthe ûra akaarûtha mabîtia akeewa îkaanûkia rîganeene na mabîtia mara arûthîîte. Ngai agambithagia antû gûtarî kîmenyano.