Read tharaka AKOROSAI 4 Bible Online

AKOROSAI 4 - tharaka bible

AKOROSAI 4

¹Naabi anene ba nkombo, rûthagîraani nkombo cienu bûra kwagîrîte. Ririkanagaani wana biû bûrî na mûnene wenu îgûrû.

²Rîonthe rombagaani bûkîîmenyagîîra na bûgîcookagîria Ngai nkaatho.

³Tûrombagîreeni na tiû Ngai atwe kaanya ga gûtûmîîria kîriga kîa mantû ma Kîrîstû. Nthaîkîîtwe n'ûntû bwa gûtûmîîria mantû mamu.

⁴Ndombagîraani ntûmagîîrie ntheto îno îmbega ngîtaragîîria bwega bûra mbagîrîtwe.

⁵Karagaani na ûûme rîra bûrî amwe na bara batarî eetîgîri. Na tûmagîraani îgiita rîenu bwega.

⁶Mîgambo yonthe îra bûkaaria nîîgue îrî mîgambo ya ûtugi. Bûbatîîrue antû babûûria biûria bûmenya kûbacookagîria bûra kwagîrîte.

⁷Tikikas, mûruayia mwendwa, na mwîtîgua ngûgîîni îmwe naati îra tûrutagîra Mwathani akabwîra mantû maakwa bûmenye bûra ndî.

⁸Ndamûtûma kîrî biû kaingo abwîra bûra tûrî na akîbwîkîra wîru.

⁹Ndabatûma barî na Onesimas wa kuuma naagu kwenu. Wana we i mûruayia, mwendwa na mwîtîgua. Baaya bakabwîra bûra mantû marî naaga.

¹⁰Bûgûkeethua n'Arîstakas. Tûthaîkîîtwe n'we nceera. Na wana Maariko mûruagina wa kîîmûciî wa Baranaba akûbûkeethia. Maariko aaya bûmûgwate ûgeni wabûra bweerirwe.

¹¹Yiesû, ûra kaîrî eetagwa Njastas wana we akûbûkeethia. Babu i bo Ayaundi eetîgîri bara tûkûruta na bo ngûgî ya ûnene bwa Ngai na ibambîkagîra wîru.

¹²Epabaras, mûruti ngûgî wa Kîrîstû wa kuuma naagu kwenu, wana we akûbûkeethia. Rîonthe nabûrombagîra mûno akîûragia Ngai abûteethie bûtuîke agima wîtîgioni na bûmenye mantû monthe mara Ngai eendaga bûrûtha.

¹³Ndî mûkûûyî wa bûra eethangîkagia n'ûntû bwenu na n'ûntû bwa eetîgîri ba taûni ya Raondisia na ya Ieraporis.

¹⁴Ndagitaarî mwendwa, Ruka, na Ndemas bakûbûkeethia.

¹⁵Nkeetheriani aruayia na aarayia bara barî Raondisia. Na nkeetheriani Nimpa[6] na eetîgîri bonthe bara bakomanaga mûciî wake.

¹⁶Bwathooma baarûa îno bwone îgûkinyîîra antû ba kanica ya Raondisia kaingo wana bo bamîthooma. Na naabi bûthoome baarûa îra ndabaandîkîîre.

¹⁷Na bwîre Arikipas oone akwingia ngûgî îra Mwathani aamwere.

¹⁸I niû Paûrû ndaandîka nkeethi ino na njara ciakwa. Ndirikanagaani ndî gûkû nceera. Ûtugi bwa Ngai bûrookaraga naabi.