Read tharaka 1 ATHESARONIKE 1 Bible Online

1 ATHESARONIKE 1 - tharaka bible

1 ATHESARONIKE 1

¹I tiû Paûrû, Sairas na Timotheo tûkûbwandîkîra baarûa îno. Tûrîbwandîkîra biû antû ba kanica ya Thesaronike bûrî ndeni ya Ngai Baaba na Mwathani Yiesû Kîrîstû. Ngai aroobwaa ûtugi na ûkiri.[1]

²Rîonthe itûcookagîria Ngai nkaatho n'ûntû bwenu bwinthe rîra tûbûririkanaga marombaani meetû.

³Itûririkanaga mantû mara bûrûthaga n'ûntû bwa wîtîgio bwenu, ngûgî îra bûrutaga kuumania na wendo bwenu, na kûûmîîria kwenu n'ûntû bwa kwîrîgîîra Mwathani wetû Yiesû Kîrîstû. Na gîku i kîo gîtûmaga tûcookeria Ngai Baaba wetû nkaatho.

⁴Biû, aruayia na aarayia, bara bwendeetwe i Ngai, itwiyî abûthuurîîte bwîgua bûrî antû baake.

⁵Twiyî ûgu n'ûntû rîra twabûtûmîîrie ntheto îmbega, tûtaabûtûmîîria na mîgambo yonka. Ntûmîîri yetû nîarî kinya na inya, Kîrundu Ûmûtheru, na gûtaarî na nkanja yarî ntheto ya mma. Na rîru twakaranagia naabi, ibwiyî bûra twarî ba mûtugo ûkari kaingo bûteetheka.

⁶Kwoogu rîra bwetîgîîrie ntûmîîri yetû, i mûkarîre wetû na wa Mwathani bwakoobiirie. Ibwonire thîîna mûno, îndî Kîrundu Ûmûtheru naatûmaga bûkena.

⁷Na gîku i kîo gîatûmire bûtuîka ngerekano kîrî eetîgîri ba Macendonia na ba Akaaya.

⁸I biû bwatûmire ntûmîîri ya Mwathani îtamba îkinya Macendonia na Akaaya. Na ti Macendonia na Akaaya gunka. Nkuma ya wîtîgio bwenu kîrî Ngai îîndî yiyîkeene gûntû kunthe. Tûtirî na bwa kuuga îgûrû rîa wîtîgio bwenu.

⁹Gûntû kunthe antû ibakwîrana bûra bwatûgwatire ûgeni bwega tûkûbûriûngîra, na bûra bwatigire kûromba ngai cia ûrongo bwatua gûtûmîkîra Ngai ûra atûîre mwoyo na wa mma.

¹⁰Na ibakwîrana kinya bûra bweteereete Mwana wake ûra aariûkiirie acooka kuuma îgûrû. Mwana wake i Yiesû ûra atwonokagia mûthûûro ûra ûûyîîte wa Ngai.