Read tharaka 1 ATHESARONIKE 2 Bible Online

1 ATHESARONIKE 2 - tharaka bible

1 ATHESARONIKE 2

¹Aruayia na aarayia, biû bwingwa ibwiyî ndiûnga yetû kwenu îtaarî ya ûtheri.

²Ibwiyî bûra twanyamaarîîte bûgana na bûra twarumangîîrwe taûni ya Piripi, mbere ya tûkinya kwenu. Îndî Ngai naatûûmîîrie twaûmba kûbûtûmîîria ntheto yake îmbega amwe na kwîgua antû baingî ibaatûkararagia.

³Kwoogu tûtitûmagîîria ûrongo, kana tûrî na mworooto ûmûthûûku, kana tûkîenda kwenania.

⁴Ngai atwete ntheto îmbega tûmîtûmîîria n'ûntû nooneete tûrî eetîgua. Na tûtûmagîîria tûrî na mworooto wa gûkenia Ngai ûra atûgeragia akîenda kwona bûra nkoro cietû ikari, îndî t'antû.

⁵Gûtirî rîo twageria kûbûnaanûkîra. Na wana biû ibwiyî ûgu. Na gûtirî rîo twabweneeria tûkîenda bûtwaa mbia cienu, Ngai i mûkûûyî.

⁶Na tika twendaga biû kana antû bangî batûkumia.

⁷Tûrî atûmwa ba Kîrîstû, itwarî na watho bwa kûbwîra bûtûteethie. Îndî tûtaarûtha ûgu. Twabûmenyagîîra ta mwekûrû bûra amenyagîîra twana twake tûra tûniini.

⁸N'ûntû itwabwendeete mûno, i kîo n'ûntû twaranagîria naabi mantû ma ntheto îmbega ya Ngai tûkeneete. Na nkûrûki ya ûgu, tweeruta twingwa kûbûtûmîkîra.

⁹Aruayia na aarayia, ibûkûririkana rîra twarî kwenu bûra twarutaga ngûgî na inya îgana. Twarutaga ngûgî mûthenya na ûtugû kaingo tûtatuîka mûrigo kîrî biû tûkîbûtûmîîria ntheto îmbega ya Ngai.

¹⁰Biû bwingwa n'akûûyî na Ngai i mûkûûyî twarî baatheru, baagîru, na tûtaarî na mantû naabi, eetîgîri.

¹¹Na kaîrî ibwiyî twakari ta îthe wa twana na twana twake kîrî wakîra ûmwe wacienu.

¹²Twabwîkagîra wîru na tûkabûûmîîria tûkabwîra bwîgue bûrî ba mîkarîre ya gûtîîya Ngai ûra abwîtîîte ûneneeni bwake, ta ku mwagooni wake.

¹³Na kûrî na gîtûmi kîngî kîra gîtûmaga tûcookeria Ngai nkaatho. Bûkwîgua twabûtûmîîria kiugo kîa Ngai bûtaakîthûkia kiumanîîtie na muntû. Bwakîthûkiirie kîrî kiugo kîa Ngai, na wabu i gîake. Kiugo gîkî igîtûmaga bûrûtha mantû meega bara bwîtîgîîtie.

¹⁴Aruayia na aarayia, mantû mara maatuîkîkire kîrî biû nwa mo maatuîkîkire kîrî makanica ma Ngai ma Njundea marî ndeni ya Kîrîstû Yiesû. Mathîîna mara bwonire kuumania na antû beenu bongwa nwa ta mo boonire kuumania na Ayaundi.

¹⁵Ayaundi baûragire Mwathani Yiesû, iroria, na batwîngatia. Batikenagia Ngai na bakararagia muntû wonthe.

¹⁶Bacûûgagia gûtûrigîîria tûtigaatûmîîrie bara batarî Ayaundi baaya kwonoka. Rîra barûthaga ûgu ka boongagîîra meeyia maao. Îndî na rîo mûthiani mûthûûro wa Ngai nûbakinyîîrîîte.

¹⁷Aruayia na aarayia, nyuma ya tûgûtigithanua kwa îgiita rîîkai (îndî tûtaatigana gîînkoro), itweendaga mûno kûbûriûngîra. Na itwacûûgagia na inya mûno kwona kana gûkîûmbîka tûkaaya.

¹⁸Itweendaga mûno kûûya. Niû Paûrû ningwa indacûûgagia mûno îgiita na îgiita, i Saitaani aatûrigagîîria.

¹⁹Ibûtûmaga twîgua tûrî na wîrîgîîro na gîkeno. Na n'ûntû bwenu tûgaakena[2] tûrî mbere ya Mwathani wetû Yiesû Kîrîstû rîra agaacooka. Gûtirî bangî, nwa biû.

²⁰I mma i biû bûgaatûma twîgua tûkeneete mûno.