Read tharaka 1 ATHESARONIKE 3 Bible Online

1 ATHESARONIKE 3 - tharaka bible

1 ATHESARONIKE 3

¹Tûgûkinya bantû tweegua tûtiûmîîria nkûrûki, i rîo twabangire twauga tiû tûtigwe taûni ya Athene,

²twatûma Timotheo, mûruayia ndeni ya Mwathani na mûruti ngûgî ya Ngai, ûra tûtambagia n'we ntheto îmbega ya Kîrîstû. Na twamûtûmire abûûmîîria wîtîgioni bwenu na abwîkîra wîru.

³Tûteendaga kwîgua kûrî we wacienu arî na kîmako wîtîgioni n'ûntû bwa mathîîna mara bûkwona. I mma ibwiyî bara tûrî eetîgîri nwa mwanka tûnyamaarue ûûgû.

⁴Rîra twarî kwenu itwabwîrire mathîîna makaaya, na wabu maaya wata bûra bwiyî.

⁵Kwoogu ngûkinyia bantû ndeegua ntiûmîîria nkûrûki, i rîo ndatûmire Timotheo aaya kûmenya bûra bûrî kîîwîtîgio. Indakuthûkaga wîgua Nkoma aabûthûngîîrie magerioni ngûgî yetû îtuîka ya ûtheri.

⁶Timotheo narakinyire akuuma kwenu na naratûreeteere mantû meega meenu îgûrû rîa wîtîgio bwenu na wendo bûra bûrî na bu. Na naratwîrire ibûtûririkanaga na njîra îmbega rîonthe, na bwenda mûno gûtwona ta bûra na tiû twenda kûbwona.

⁷Kwoogu, aruayia na aarayia, wîtîgio bwenu ibûtwîkîrîte wîru mathîînaani monthe na kûnyamaaruani kûra tûkûnyamaarua.

⁸Tûkwîgua ibwîrikîîtie kîrî Mwathani itweegiirue ûntû bûbu bwatwîkîra inya.

⁹Itûgûcookeria Ngai nkaatho mûno n'ûntû bwenu. Îndî tûtiona mîgambo ya kûgana ya kûmûcookeria nkaatho n'ûntû bwa gîkeno kîra kîonthe tûkwîgua tûrî na kîo n'ûntû bwenu.

¹⁰Mûthenya na ûtugû tûkaraga tûkîrombaga na nkoro yonthe tûbwona kaîrî tûbwaa kîra kîonthe ûûmba kwîgua kîûmba gûtûma bûkara na wîtîgio bûûriku.

¹¹Îromba rîetû kîrî Ngai Baaba wetû na Mwathani wetû Yiesû Kîrîstû, n'atî bagatûthuuranîra njîra tûûmbe kûûya.

¹²Inkûromba Mwathani atûme wendo bwenu bûkûre na bwingîe bwendage bara barî bacienu na antû bonthe, ta bûra tiû tûbwendeete.

¹³Inkûromba nkoro cienu ciîgue irikîîte, irî intheru, na itarî na mabîtia nwa aniini meethooni ma Ngai Baaba, rîra Mwathani wetû Yiesû Kîrîstû akaaya na atheru baake bonthe.