Read tharaka 1 ATHESARONIKE 4 Bible Online

1 ATHESARONIKE 4 - tharaka bible

1 ATHESARONIKE 4

¹Îîndî, aruayia na aarayia, itûkûbûûria tûkîbûkinyagîîria kwa riîtwa rîa Mwathani Yiesû, ta bûra twabûrutanire, îthiini na mbere gûtûûra mûtûûrîre ûra ûkenagia Ngai. Tûûragaani ûgu rîonthe.

²Ibwiyî maathana mara twabûrutanire tûrî na watho bwa Mwathani wetû Yiesû.

³Ngai eendaga bûkaraga bûrî baatheru na bûtakûruta ngûgî cia ûmaramari.

⁴Woora ûmwe wacienu nabatîîrue eemenyeera atikaathwe i mwîrî wake. Bûbatîîrue bûkaraga bûrî baatheru na bûgîtîîyanaga.[3]

⁵Bûtikeende kwathagwa i wîrirîîria bwa mwîrî ta bara bataiyî Ngai.

⁶Bûtikaabîtîrie bara bangî ûntûûni bûbû. Wata bûra twabûkaaniirie twabwîra, Ngai agaakaanûkia bara bonthe barûthaga meeyia ta mamu.

⁷Ngai atwîtîîte tûtûûraga tûrî baatheru, ti tûtûûraga tûkîrûthaga meeyia.

⁸Kwoogu ûra aregaga kûrûtha ûgu twîrîîtwe t'antû aregaga kwathîkîra, i Ngai ûra atweyaga Kîrundu wake Ûmûtheru aregaga kwathîkîra.

⁹Gûtirî na gîtûmi gîetû kûbwandîkîra tûbwîra bwendage eetîgîri bara bangî, n'ûntû biû bwingwa ibûrutanîîtwe i Ngai kwendanaga.

¹⁰I mma ibwendeete eetîgîri bonthe bara barî Macendonia. Îndî amwe na ûgu, aruayia na aarayia, ga tûbûkinyîîrie tûbwîre bûbeende nkûrûki.

¹¹Cûûgiani bûra kûûmbîka bûtûûranagie na ûkiri. Woora muntû narute ngûgî yake, acûe biake ta bûra twabwîrire.

¹²Bûkarûtha ûgu bara bateetîgîîtie bakabûtîîya na bûtiîgwatia kwewa gîntû i muntû.

¹³Aruayia na aarayia, ndeenda bûmenya bûra gûkari kîrî eetîgîri bara bakuîte, kaingo bûteegua bûrî na kîeba ta antû batarî na wîrîgîîro.

¹⁴Twîtîgîîtie Yiesû naakuire na aariûka. Na n'ûntû naariûkire, itwîtîgîîtie kaîrî atî, rîra agaacooka Ngai akaariûkia eetîgîri bara bakuû, baayanie n'we.

¹⁵Mantû mama tûkûbwîra maumîîte kîrî Mwathani. Bara ûkeegua tûrî mwoyo rîra Mwathani agaacooka tika tûkaamûthagaana mbere ya bara bakuû.

¹⁶Rîra Mwathani akaaya kuuma îgûrû gûkeeguîka kayû ga kûruta watho, kayû ka mûraîka ûra mûnene, na ga karumbeeta ka Ngai. Na ûntû bwa mbere, i bara baakuire beetîgîîtie Kîrîstû bakaariûka.

¹⁷Baariûka, bara ûkeegua tûrî mwoyo tûthûkanîrue amwe na bo twirwe matuuni kaingo tûthi kûthagaana Mwathani maanganyoni. Na kuuma agu tûgaatûûranagia na Mwathani rîonthe.

¹⁸Îkanagîraani wîru na mîgambo înu.