Read tharaka 1 ATHESARONIKE 5 Bible Online

1 ATHESARONIKE 5 - tharaka bible

1 ATHESARONIKE 5

¹Aruayia na aarayia, gûtirî na gîtûmi gîetû kûbwandîkîra tarîki kana îgiita rîra mantû mamu magaatuîkîka.

²Biû bwingwa ibwiyî atî Mwathani akaaya ta bûra mwamba aayaga ûtugû.

³Rîra antû bakuuga, “Kûrî na ûkiri gûtirî na ûgwati,” rîru i rîo bakeethîîrua bathirue! Gûgaakarîka ûgu nthûti îmwe ta bûra rûgakaî rwa kûgîa na mwana rûgwataga mwekûrû ateerîgîîrîîte. Bationoka.

⁴Îndî biû, aruayia na aarayia, tika bûkeethîîrua bûteerîgîîrîîte ta bûra mwamba aayaga ûtugû, n'ûntû biû bûtitûûraga mwinduuni.

⁵Biû bwinthe bûrî aana ba werû, aana ba mûthenya. Tûtirî ba ûtugû kana ba mwindu.

⁶Kwoogu tûtiagîrîtwe tûmaama toro ta bara bamaami. Tûbatîîrue tûkaraga twîthuuranîrîte na twîmenyeereete.

⁷Bara bamaamaga, bamaamaga ûtugû. Na bara batogoonaga, batogoonaga ûtugû.

⁸Îndî tiû tûrî ba mûthenya. Kwoogu tûkarageeni twîthuuranîrîte, twîrigîîrie na wîtîgio na wendo ta bûra mûcikaarî eekagîra îthaga rîa kwîrigîîria atigaatonywe kîbara. Na twîrigîîrie na wîrîgîîro bwa wonokio bûrî ta nkoobia îra îîkagîrwa kîongo kûrigîîria gîtigaatonywe.

⁹Na ririkanaani Ngai ataatûthuura atwonia mûthûûro wake. Aatûthuurire atwonokia gûkûrûkîîra kîrî Mwathani wetû Yiesû Kîrîstû.

¹⁰Kîrîstû aakuire n'ûntû bwetû kaingo tûtûûrania n'we, nwîgue tûrî mwoyo kana tûrî baakuû rîra agaacooka.

¹¹Kwoogu wata ûgu bûkûrûtha, îkanagîraani wîru na teethanagiani.

¹²Aruayia na aarayia, itûkûbûûria bweyage gîtîîyo bara babûtûmîkagîra barî atongoria beenu ndeni ya Mwathani, bara babûrutanaga njîra ya gûkara bwega.

¹³Ibûbatîîrue bûbatîîya na bûbeenda mûno n'ûntû bwa ngûgî îra babûrutagîra. Tûûranagiani na ûkiri.

¹⁴Na kaîrî, aruayia na aarayia, tûrîbwîra tûkîbûkinyagîîria atî, bûkaanagie bara barî athao. Îkagîraani wîru bara barî na ûguaya na teethagiani bara bakûremeerwa. Bûtikaathûûrangage n'antû na mpwî.

¹⁵Îmenyeereeni bûtikaarîithie ûthûûku na ûthûûku. Rîonthe cûûgagiani kûrûthîra bara barî bacienu na bara batarî bacienu mantû meega.

¹⁶Kenagaani magiita monthe.

¹⁷Bûtigaatige kûromba.

¹⁸Cookagîriani Ngai nkaatho mantûûni monthe, n'ûntû ûgu i bu eendaga bara barî ba Kîrîstû Yiesû barûtha.

¹⁹Bûtikoorie mwanki wa Kîrundu.

²⁰Bûtikaathûkie ûroria ta ûntû woogu.

²¹Îndî thimagaani mantû mara bûkeegagua, bwîtîgîre bûra bûkeegua bûrî bwega.

²²Îbathûraneeni na ûthûûku bwa mîthemba yonthe.

²³Itûkûromba Ngai ûra atweyaga ûkiri abûtuîkithie baatheru na njîra cionthe. Itûkûromba atûme nkoro cienu na mîîrî yenu îkarage îtarî na mabîtia, mwanka rîra Mwathani wetû Yiesû Kîrîstû agaacooka.

²⁴Ngai ûra abwîtîîte i mwîtîgua. Na kwoogu akaarûtha ûgu.

²⁵Aruayia na aarayia, tûrombagîreeni.

²⁶Keethanagiani na wendo bwa eetîgîri.

²⁷Nwa mwanka bûthoomere eetîgîri bonthe baarûa îno. Na ndauga bûrûthe ûgu kwa riîtwa rîa Mwathani.

²⁸Ûtugi bwa Mwathani wetû Kîrîstû Yiesû bûrookaraga naabi.