Read tharaka 2 ATHESARONIKE 1 Bible Online

2 ATHESARONIKE 1 - tharaka bible

2 ATHESARONIKE 1

¹I tiû Paûrû, Sairas na Timotheo tûkûbwandîkîra, biû antû ba kanica ya Thesaronike. Bûrî ndeni ya Ngai Baaba wetû na ndeni ya Mwathani Yiesû Kîrîstû.

²Ngai Baaba wetû, na Mwathani, Yiesû Kîrîstû baroobwaa ûtugi na ûkiri.

³Rîonthe itûbatîîrue tûcookagîria Ngai nkaatho n'ûntû bwenu, biû aruayia na aarayia. Na ûgu i bu kwagîrîte n'ûntû bwa bûra wîtîgio bwenu bûthiîte bûkîongeerekaga, na n'ûntû bwa bûra wendo bwa wakîra ûmwe wacienu kîrî muntû ûra ûngî bwongeerekeete.

⁴Gîku i kîo gîtûmaga twîra makanica mara mangî ma Ngai bûra bûrî beega. Tûbeeraga bûra bûthiîte na mbere na kûûmîîria mathîîna mara bûrî na mo, na bûra bûthiîte na mbere kwîgua bûrî na wîtîgio kûnyamaaruani kûra kunthe bûnyamaaragua.

⁵Ûgu ikwonania Ngai agiitaga magamba bûra kwagîrîte. Na kwoogu arîbûtuîkithia antû baagîru baagîrîte kûthûngîra ûneneeni bwake bûra bûtûmaga bûnyamaarua.

⁶Ngai agaakaanûkia bara babûnyamaaragia. Na ûgu i bu oonaga baagîrîtwe barûthwa.

⁷Biû bûkûnyamaarua, Ngai agîtûnogokia akabûnogokia na biû, rîra Mwathani Yiesû akaaya kuuma îgûrû arî na araîka baake barî inya.

⁸Akaaya na mwanki ûgîakanaga wa gûkaanûkia bara bataiyî Ngai na bara bateetîgagîra ntheto îmbega ya Mwathani wetû Yiesû.

⁹Na îkaanûkia rîra akaabaa ûkeegua rîrî kûbeenyangia kûrû, abaathûre baume ara Mwathani arî, ara inya yake îra îrî mwago îrî.

¹⁰Mantû mamu magaakarîka rîra Mwathani akaaya gûkaathwa mwago wake n'antû baake bara bamwitîgîîtie bamûkumue. Bûkeegua bûrî bamwe ba antû baake ntugû înu n'ûntû ibweetîgiirie ûkûûyî bwetû.

¹¹Na gîku i kîo gîtûmaga tûbûrombera rîonthe. Tûûragia Ngai atûme bwîgue bûrî ba mûkarîre ûkûgwatanîra na mwîto ûra aabwîtire. Na kwa inya yake atûme bûrûtha ûntû bwega bunthe bûra bûbangîîte kûrûtha na bûra bunthe wîtîgio bwenu bûgaatûma bûrûtha.

¹²Gûkari ûgu, bûgaakumia riîtwa rîa Mwathani wetû Yiesû na akabûkumia kûringana na ûtugi bwa Ngai wetû na Mwathani Yiesû Kîrîstû.