Read tharaka 2 ATHESARONIKE 2 Bible Online

2 ATHESARONIKE 2 - tharaka bible

2 ATHESARONIKE 2

¹Na îîndî, aruayia na aarayia, tûrî na ûntû bwa kûbwîra. Ûntû bûbû bûkoneetie gûcooka kwa Mwathani wetû Yiesû Kîrîstû na bûra tûkeethîrana amwe tûmûthagaanîîte.

²Bûtigeetîgîîrie kwindiganua woogu kana bûmakua i bara bakuuga Kîrîstû naacookire. Na wana bweegua antû bakîroria bakiugaga batongoreetue i Kîrundu wa Ngai, kana bagîtûmîîria ûntû bûbu, kana bakîthooma baarûa bakiugaga yumîîte kîrî tiû, bûtikaabeetîgie.

³Batikaabweneerie na njîra nwa îrîkû, n'ûntû ntugû ya gûcooka kwa Mwathani îtiikinya mbere ya kwîgua kûrî na kûrega kwathîkîra Ngai kûûnene na Muntû wa Meeyia aumbûka, ûra Ngai abangîîte kûthiria.

⁴Akeegua arî mwîkumia na mûkararia wa ûntû bunthe bûgwîtwa ‘ngai’, kana gîntû kîonthe kîra antû barombaga. Akaathi kinya akare nthî nyomba ya Ngai eetue n'we Ngai.

⁵Bûtikûririkana indabwîraga mantû wamama kaîrî rîra ndarî kwenu?

⁶Na kwoogu îîndî ibûkûmenya ûra arigîîrîîtie Muntû ûyu wa Meeyia aumbûrwa, kaingo akaumbûrwa îgiita rîake rîongwa rîakinya.

⁷Kinya ûkeegua wana îîndî inya ya ûthûûku nwa îkûruta ngûgî nthîgûrû na njîra îtakûmenyekana, bûra bûthiîte gûkarîka bûtiikarîka ûra amîrigagîîria atarutîîtwe oogo.

⁸Gwakarîka ûgu, rîru i rîo ûra ataathîkagîra watho bwa Ngai akaumbûrwa, Mwathani amûûrage na mîruke yake, amûthirie kûrû na mwago ûra akaaya na uu.

⁹Muntû ûyu wa Meeyia akaaya na inya înene ya Saitaani, amîtûmîre kûringa mîthemba yonthe ya biama bia ûrongo, iriga, na magegania.

¹⁰Agaatûmîra mîthemba yonthe ya ûthûûku kweneeria bara baûrîîte. Na bara akeeneeria ibakaathirua n'ûntû bwa kûrega kwenda kana gwîtîgîîria ûmma bûra bûkîûmba kûboonokia.

¹¹Kwoogu Ngai akaabaindigania batue gwîtîgagia mantû ma ûrongo.

¹²Na mûthiani abape îkaanûkia bonthe n'ûntû bwa gûkeneera kûrûtha ûthûûku, na n'ûntû bwa kûrega gwîtîgia ûmma.

¹³Aruayia na aarayia bara bwendeetwe i Ngai, tûbatîîrue tûcookagîria Ngai nkaatho rîonthe n'ûntû bwenu. Aabûthuurire kuuma kîambîrîria kaingo bwonokua kwa inya ya Kîrundu ûra abûtuîkithagia baatheru na n'ûntû bwa gwîtîgia ûmma.

¹⁴Ngai aabwîtire bwonokua na ntheto îmbega îra twabûtûmîîrie, kaingo bwîgua bûrî mwagooni amwe na Mwathani wetû Yiesû Kîrîstû.

¹⁵Kwoogu, aruayia na aarayia, rûngamaani bwîrikîîtie na bûthi na mbere kûgwata moorutani mara twabûrutanire na ntûmîîri na baarûa.

¹⁶Mwathani wetû Yiesû Kîrîstû na Ngai Baaba wetû baroobwîkîra wîru nkorooni cienu. Na baroobwîkîra inya ûntûûni bwega bunthe bûra bûkaarûthaga kana bûra bûkaaragia. Ngai aatwendire atwîkîra wîru bûtakîthira na atwa wîrîgîîro bwega kuumania na ûtugi bwake.