Read tharaka 2 ATHESARONIKE 3 Bible Online

2 ATHESARONIKE 3 - tharaka bible

2 ATHESARONIKE 3

¹Na tûkîthiria, aruayia na aarayia, ga tûbûûrie bûtûrombagîre. Rombaani ntheto ya Mwathani îtambe na mpwî na îthûkue na gîtîîyo ta bûra bwamîthûkiirie.

²Na tûrombagîreeni tûkûûragwe kuuma kîrî bara batarî baagîru na baathûûku, n'ûntû t'antû bonthe beetîgîîtie.

³Îndî Mwathani i mwîtîgua. Kwoogu akabwaa inya na akabûrigîîria kîrî ûra mûthûûku.

⁴Mwathani natûmaga twîtîgia atî, na mma ibûrûthaga mantû mara twabwîrire bûrûthage, na atî bûkaathi na mbere kûmarûtha.

⁵Mwathani arootongagîîria nkoro cienu bûkamenya nkûrûki bûra Ngai abwendeete bûgana.[1] Na Mwathani arootûma bûkaraga bûûmîîrîîtie kûûmîîriani kûra Kîrîstû eeyanaga.

⁶Îîndî, aruayia na aarayia, riîtwaani rîa Mwathani wetû Yiesû Kîrîstû tûrîbwîra atî, nwa mwanka bwathûkane na eetîgîri bara baregaga kûruta ngûgî, bara baregaga kûthingata mantû mara twabûrutanire.

⁷Biû ibwiyî atî, nwa mwanka bûthingate ngerekano yetû. Tûtaarî ithao rîra twarî kwenu.

⁸Tûtigîîtîgîra kûrîa irio bia muntû tûtakîmûrîa bio. Mûthenya na ûtugû, twarutaga ngûgî na inya mûno kaingo tûtatuîka mûrigo kîrî biû.

⁹Itwarî na watho bwa kûbwîra bûtweyage ûteethio, îndî tûtaarûtha ûgu. Twarutaga ngûgî tûkeemenyeera twingwa kaingo twîgua tûrî ngerekano îra bûkaathingataga.

¹⁰Rîra twarî kwenu, itwabwere watho bûkuuga, “Ûra akaarega kûruta ngûgî atikaarûmue irio.”

¹¹Tûrîbwîra ûgu n'ûntû tûrîîgua bamwe beenu ibakûrega kûruta ngûgî. Atî bo gûtirî bu barûthaga, nwa kûriûnga bariûngaga bakîîthûngagîîria mantûûni ma itha.

¹²Riîtwaani rîa Mwathani wetû Yiesû Kîrîstû, tûrîbeera nwa mwanka barutage ngûgî ciao bakirîîrîîtie, bacûe mbia beegûrîre irio.

¹³Îndî biû, aruayia na aarayia, ndîbwîra bûtikaanoge i kûrûtha mantû meega.

¹⁴Ûkaaya kwîgua kûrî we akaarega kwathîkîra bûra tûbwîrîîte baarûani îno, bûmenye n'ûû. Bûtikaagwatanîre n'we kaingo eegua nthoni.

¹⁵Bûtikaamûthûkieni arî mûnthû, îndî mûkaanagieni arî ta mûruanyûkwe kana mwaranyûkwe ndeni ya Kîrîstû.

¹⁶Mwathani ûra eeyanaga ûkiri aroobweyaga ûkiri rîonthe na njîra cionthe na arookaraga naabi bwinthe.

¹⁷Îîndî i niû Paûrû nkwandîka ndî niû ningwa nkeethi ciakwa. Na rûrû i ru rwano rûra ntûmagîra, kwonania i niû mwandîki wa baarûa ciakwa cionthe. Ûûgû i bu mbandîkaga.

¹⁸Ûtugi bwa Mwathani wetû Yiesû Kîrîstû bûrookaraga naabi bwinthe.