Read tharaka 1 TIMOTHEO 2 Bible Online

1 TIMOTHEO 2 - tharaka bible

1 TIMOTHEO 2

¹Kwoogu ûntû bwa mbere bûra mbenda kûbûkinyîîria n'atî, rombagaani maromba ma mîthemba yonthe na cookagîriani Ngai nkaatho n'ûntû bwa wakîra muntû.

²Rombagîraani anene na antû bonthe bara barî na watho bwa kwathana, kaingo tûûmba gûtûûra ûtûûro bwa ûkiri na bwa thîîrî, tûrî na ûngai kûrû, na tûrî na nthoni imbega.

³Ûntû bûbu i bwega mûno na ibûkenagia Ngai Mwonokia wetû,

⁴n'ûntû we eendaga antû bonthe boonokua na bamenya ûmma, nwîgue n'ûû.

⁵Ngai n'ûmwe akî. Na kûrî muntû ûngî ûmwe ûra eeguithanagia antû na Ngai. N'we i muntû ûra eetagwa Kîrîstû Yiesû,

⁶ûra eepeeyanire kaingo akûûra kîrîndî kîonthe kiuma meeyiani, kagiita kara Ngai aabangîîte.

⁷Na gîkî i kîo gîtûmi gîakwa gûtûmwa ndî mûtûmwa na mwarimû kîrî antû ba nthîgûrû ira ingî, bara batarî Ayaundi, kaingo ntûmîîria ntûmwa ya wîtîgio na ûmma. N'ûmma nkwaria na t'ûrongo!

⁸Gûntû kunthe rîra bwîthîranaga amwe kûromba, ndîenda antû arûme bakîromba, barombe baûkîîrîtie njara ciao na njîra întheru, batarî na mûthûûro na batathetanîîtie.

⁹Na aka na bo ndîenda bakaraga na nthoni na ûûme bwa nkoro ciao mantûûni ma nguo ira beekagîra. Ibeekagîre nguo bwega bûra kwagîrîte, na batigaacukage ntundu, kana beegemia na tûnyamû twa goro, kana beekagîra nguo cia goro.

¹⁰Îndî, iboonanagie ûthongi bwao na mîkarîre ya kûrûthaga mantû meega akî, n'ûntû i bu kwagîrîte kîrî aka bara bakuthûkîîte Ngai.

¹¹Aka babatîîrue beerutanaga mantû kanicaani bakiri na beenyiîtie mûno.

¹²Ntigwîtîgîîria mûka arutana kana eegua arî na watho îgûrû rîa muntû mûrûme. Abatîîrue akaraga akiri.

¹³Gîtûmi n'atî, Andamu n'we aûmbirwe mbere rîru Awa aûmbwa.

¹⁴Na kaîrî Andamu t'we eeneerue. I mûka eeneerue auna watho bwa Ngai.

¹⁵Îndî amwe na ûgu, mûka ûra akaamenyagîîra twana twake,[1] na athi na mbere kûûmîîria ndeni ya wîtîgio, wendo, ûtheru bwa nkoro, na nthoni akaingia wonokio bwake.