Read tharaka 1 TIMOTHEO 3 Bible Online

1 TIMOTHEO 3 - tharaka bible

1 TIMOTHEO 3

¹Kiugo gîkî i gîa gwîtîgîka atî, muntû ûra eendaga gûtuîka mûtongoria wa kanica, i ngûgî îmbega mûno eegagua akîenda.

²Mûtongoria wa kanica nwa mwanka eegue arî muntû arî riîtwa rîega kîrî antû. Na nwa mwanka eegue arî na mûka ûmwe weegua agûreene, na arî muntû wa gwîkaanagia wengwa kûrûthaga mantû mataagîrîte. Nwa mwanka eegue arî muntû arî na ûtombo bûûkûrû, muntû atarî mantû. Nwa mwanka eegue arî muntû wa nkoro ya kûgwataga antû ûgeni na arî muntû aûmba kûrutana.

³Atikeegue arî muntû wa ntogoona, kana arî muntû aûmba kûringana. Neegue arî muntû ûmûbooreru na wa ûkiri. Atikeegue arî muntû wa kwenda ûtonga.

⁴Nwa mwanka eegue arî muntû akûûmba kûmenyeera mûciî wake bwega, na akûûmba kûrutana aana baake bagatuîka aana aathîki, bagakaraga na nthoni imbega.

⁵Muntû akaremwa gûtongoreeria mûciî wake bwega rî, nwa kanica ya Ngai aûmba gûtongoreeria bwega?

⁶Muntû atuîkîîte mwîtîgîri warîru atigaatuîkithue mûtongoria wa kanica, n'ûntû aûmba kûgîa wîkumia bûkamûûyûra, Nkoma îgatûma agiitîrwa îgamba bûûthûûku.[2]

⁷Mûtongoria wa kanica nwa mwanka eegue arî muntû atîîyîîtwe i bara batarî eetîgîri, kaingo batamûcambia aaya kûgwa mûtegooni wa Nkoma.

⁸Ateetheeria ba atongoria ba kanica wana bo babatîîrue beegua barî antû bathûgaanagia bwega na batakari ta njoka ya mîromo îîrî. Batikeegue barî anyui ncoobi înyingî kana beerirîîria ûtonga.

⁹Nwa mwanka beegue barî antû barûmîîrîîte wîtîgio bûra twagwûrîîrwe, batakwîgambithia na nkoro.

¹⁰Îndî mbere nwa mwanka bagerue. Boonekana barî antû beega, rîru nwa barute ngûgî ya ateetheeria.

¹¹Aka ba ateetheeria ba atongoria ba kanica, wana bo nwa mwanka beegue barî antû bathûgaanagia bwega. Nwa mwanka beegue batatuuyanagîîra. Na nwa mwanka beegue barî eekûrû baûmba gwîkaania kûrûtha mantû mataagîrîte. Na nwa mwanka beegue barî eetîgua mantûûni monthe.

¹²Mûteetheeria wa mûtongoria wa kanica nwa mwanka eegue arî wa mûka ûmwe weegua agûreene. Na nwa mwanka eegue akîûmbaga gûtongoreeria aana baake bwega, amwe na mûciî wake unthe.

¹³Ateetheeria bara barutaga ngûgî yao bwega ibeeceragîria riîtwa rîega na bakagîa ûûmîîria bûûnene wîtîgioni bwao ndeni ya Kîrîstû Yiesû.

¹⁴Ndîkwandîkîra baarûa îno ndî na wîrîgîîro bwa kûûya gûkwona nyuma ya kagiita gatarî karaaya mûno kuuma îîndî.

¹⁵Îndî weegua ntiiya rua bûra nkûthûgaania, baarûa îno n'ya gûkûmenyithia bûra tûbatîîrue tûkaraga tûkari tûrî antû ba kanica ya Ngai ûra arî mwoyo, n'ûntû kanica n'yo îtûmaga ûmma bwa Ngai bûrika.

¹⁶Na gûtarî kîûria, kîriga kîra tûgwûrîrîtwe gûkonia kîîngai i gîa kûrigaria. “Oonekanire arî na mwîrî ta wa muntû na Kîrundu Ûmûtheru oonania mara aaragia na mara aarûthaga maarî ma mma. Araîka ibaamwonaga. Na athingati baake baatûmîîria mantû maake kîrî antû ba mîgongo yonthe na eetîgua n'antû ba nthîgûrû yonthe. Aathûkua, eetithua îgûrû mwagooni.”