Read tharaka 1 TIMOTHEO 4 Bible Online

1 TIMOTHEO 4 - tharaka bible

1 TIMOTHEO 4

¹Kîrundu Ûmûtheru nagweteete bwega auga atî, ntugû cia mûthia antû bamwe bakaaragaragia wîtîgio baathîkîre irundu bia wenania na bathingate moorutani ma irundu biithûûku.

²Moorutani ta mamu maumanagia na eebwithia bara bo ngûgî yao îrî ya kwenania akî batakwîgua nkoro ciao îkîbagambithia nwa aniini.[3]

³Antû ta babu beeraga antû batikaagûrane kana barîa irio bia mîthemba mîna. Îndî i Ngai aûmbire irio bionthe kaingo birîyagwa. Na kwoogu tiû bara tûrî eetîgîri na twiyî ûmma, tûbatîîrue tûbirîyaga tûrombeete îromba rîa gûcookia nkaatho.

⁴Gîntû kîonthe kîra Ngai aûmbîîte i kîega. Na gûtirî kîo kîagîrîte kûregwa gîkîîragwa ti kîega. Gîntû kîonthe kîbatîîrue kîthûkua na nkaatho

⁵n'ûntû kiugo kîa Ngai na îromba i bio bitûmaga gîntû gîku gîtuîka kîîtheru.

⁶Ûkaaya kwîgua ûgaatua kûririkanagia eetîgîri bara bangî mantû mamu watuîka mûruti ngûgî ûmwega wa Kîrîstû Yiesû, na weekûria nkûrûki gîînkoro mîgambooni înu ya wîtîgio na ya ûrutani bwa mma bûra ûthingatîîte.

⁷Îndî regana na ngono ira itarî cia kîîngai, kana cia ûrongo. Îthi na mbere kwîrutana gûtûûraga mûtûûrîre wa kîîngai.

⁸Kûrûthithia mwîrî mîceetho n'ûntû bûrî gîtûmi kîna. Îndî kûmenyeeria kûrûthaga mantû mara Ngai eendaga marûthwa i ku kûrî gîtûmi nkûrûki, n'ûntû i ku kûrî baita ûtûûrooni bûbû tûrî na bu îîndî gûkû nthîgûrû, na ûtûûrooni bûra bûkaaya nyuma ya twakua.

⁹Kiugo gîkî i gîa gwîtîgîka na ikîagîîrwe gwîtîgîrwa kûrû

¹⁰atî, twînogagia na kûruta ngûgî na inya n'ûntû bwa wîrîgîîro bûra tûrî na bu kîrî Ngai ûra atûîre mwoyo, ûra arî Mwonokia wa antû bonthe. Na oonokagia bara bamwîtîgagia.

¹¹Beere nwa mwanka barûthe mantû mamu na bamarutane mo.

¹²Ûtikaareke muntû akûbûthia n'ûntû bwa wîthî bwaku. Îndî tuîka ngerekano îmbega kîrî bara bangî beetîgîîtie Ngai, boone kuumania na rwaria rwaku rûra waaragia, mûkarîre waku, wendo, wîtîgio na ûtheru bwaku bwa nkoro.

¹³Înenkanîre kûthooma *Maandîko Maatheru kîrî antû, ûkîbatûmagîîria na ûkîbarutanaga mwanka rîra nkaaya.

¹⁴Ûtikaareke kîewa gîaku gîa Kîrundu Ûmûtheru kîûrîra nthî, kîra wetwe kûringana na mîgambo ya ûroria bûra bwaroriirue rîra waigîîrwe njara i kîama gîa akûrû.

¹⁵Ingia mantû mamu na înenkanîre kîrî mo, kaingo antû bara bangî bonthe bakoona nûgûkûra ndeni ya wîtîgio.

¹⁶Îmenyagîîre mûno na îthûgaanagîria mûno mantû mara ûrutanaga. Karaga ûkîathîkagîra mantû mamu, n'ûntû wamaathîkîra i rîo ûkaûmba kûmenyeera wonokio bwaku amwe na bwa antû bara bagaakûthikagîîria.