Read tharaka 2 TIMOTHEO 1 Bible Online

2 TIMOTHEO 1 - tharaka bible

2 TIMOTHEO 1

¹I niû Paûrû, mûtûmwa wa Kîrîstû Yiesû ngûkwandîkîra. Ndathuurirwe i Ngai kaingo ntûmîîria kîrî antû mantû ma mwoyo ûra Ngai atwîrîîte agatwaa, ûra wonekaga ndeni ya Kîrîstû Yiesû.

²Ndîkwandîkîra, woû Timotheo, mwana wakwa ndeni ya wîtîgio, ûra mbendeete. Ngai Baaba na Kîrîstû Yiesû barookwaa ûtugi, kîao na ûkiri.

³Ingûcookia nkaatho kîrî Ngai ûra ndutagîra ngûgî ta bûra bakîûyûûyû baamûrutagîra, ntakwîgua nkoro yakwa îkîngambithia. Magiita monthe inkûririkanaga marombaani maakwa ma ûtugû na mûthenya na incookagîria Ngai nkaatho n'ûntû bwaku.

⁴Indirikanaga meethori mara weetûûrire. Na i kîo gîtûmaga mbîrîgîîra mûno gûkwona kaîrî, mbûyûrwa i gîkeno.

⁵Naka ntiriganagîrua i wîtîgio bwaku bwa mma. Wîtîgio bwaku i ta bûra ûyûûgu Ruis na nyûkwe Iunis baarî na bu. Ndî na mma kinya woû ûrî na wîtîgio ta bo.

⁶Kwoogu ndîenda gûkûririkania nkwîra cooka gûtûmîra kîewa kîra Ngai aakwere kagiita kara ndakwaigîîre njara.

⁷Kîrundu ûra Ngai aatwere ti kîrundu wa gûtûîkîra ûguaya. I kîrundu wa gûtwaa inya, wendo, na inya ya kûgiria mwîrî ûkwatha.

⁸Kwoogu ûtikeegue îgi ûkîruta ûkûûyî bwaku îgûrû rîa Mwathani wetû, kana i bûra ndî nceera n'ûntû bwake. Ûmîîria ûngwatie kûthîîna n'ûntû bwa ntheto îmbega, Ngai agakwa inya ya gûgwotithia.

⁹I Ngai aatwonokiirie atwîta tûtuîka antû baake baatheru, na t'ûntû bwa ngûgî imbega ira tûrutîîte. Îndî n'ûntû bwa mûbango wake we wengwa kûringana na ûtugi bwake. Na aatwere ûtugi ndeni ya Kîrîstû Yiesû kuuma wo tene mûno.

¹⁰Îîndî natwete ûtugi na njîra ya gûtûtûmîra Mwonokia wetû Kîrîstû Yiesû, ûra aayire aathiria gîkuû inya, oonania na ntheto îmbega njîra ya kûthi mwoyooni wa tene na tene.

¹¹Ngai aanthuurire ntuîka mûtûmîîria, mûtûmwa na mwarimû wa ntheto îmbega.

¹²Na i kîo gîgûtûma nnyamaarua ûûgû. Îndî amwe na ûgu ntikwîgua îgi n'ûntû inkûmenya ûra mbîtîgîîtie na imbiyî na mma arî na inya ya kûmenyeera bwega kîewa gîa ntûmwa ya ntheto îmbega kîra ampeere mwanka ntugû ya mûthia buru.

¹³Ririkanaga moorutani monthe ma mma mara nkûrutanîîte. Matûmagîre marî ngerekano ûrî na wîtîgio na wendo kuuma kîrî Kîrîstû Yiesû.

¹⁴Na kwa inya ya Kîrundu Ûmûtheru ûra atûûraga ndeni yetû, menyeera kîra wetwe ûkîmenyeera. I kîega.

¹⁵Wata bûra wiyî, eetîgîri ba nthîgûrû ya Îcia bonthe, kinya Baigîîras na Amogenes beene ibantoorookire.

¹⁶Inkûrombera Onesiboras na antû ba mûciî wake bonthe nkauga Mwathani nabeegue kîao n'ûntû magiita maingî naambûmagîîria nkoro na atoonaga rîrî îgi kwîgua ndî ûmûthaîke nceera.

¹⁷Akûûya aakinya Rooma ûgu, aanjîîrie gûncûa na inya mûno mwanka rîra angwatithaniirie ara ndarî.

¹⁸Inkûromba Mwathani amwîgue kîao ntugû ya mûthia. Naanteethiirie mûno rîra ndarî Ebeeso. Na wana woû nûkûmenya ûgu bwega.